Fort Lauderdale, Florida,
USA.
Le 2 d'avri, 1977
Moussieu l'Rédacteu,
Il est grand temps d'vouos mater sus vouos pids d'drièthe, touos les Jèrriais, et d'avèrti l'gouvèrnément national dé France qu'ou-s-êtes dans La Manche à eune vîngtaine dé milles d'un projet tch'il a das l'idée d'bâti l'long d'la côte dé Nouormandie et tchi pouorrait aver un bein mauvais êffet sus l'bein-être des Îles dé La Manche et la santé d'ses habitants. Et i' faut vouos r'binfrer contre à tigue dé corps.
Lé monstre dé tchi j'vouos pâle est un grand bâtiment central atonmique dé machinn'nie "nucléaire". Si l'gouvèrnément Français voulait l'bâti dans l'mitan d'la France, i' n'y'éthait rein à dithe. Mais l'long d'la côte dé Nouormandie et si pres d'Jèrri, ch'est eune aut' affaithe. Ch'est à Flamanville, sus la côte ouest du Cotentin juste en fache dé Jèrri et d'Dgèrnésy.
Sav'ous tch'est tch'i' peut êt' les mauvaises conséquenches du dêveloppement d'chu pouvé "nucléaire"? Ch'est si dangereux qué même les Améthitchains, tch'en ont fait pus qu'autcheune aut' nâtion, c'menchent à aver des doutes ieux-memes au sujet d'la seûtheté d'la population ès alentours des "rêacteurs nucléaires". Ch'est eune méthode dé traitement dé l' "atôme" pour créer d'l'êlectricité en grandes quantités et autcheun traitement d'mème donne des risques dé "radiation" ou dé contaminnation tchi sont dangereuses pour hommes et criatuthes vivantes.
Iun des grands bésoins d'un bâtiment ou "usine nucléaire" est d'l'ieau. Il y faut un tas dg'ieau en mouvement continnuel, et ch'est pour chenna qué les Français veulent mettre lus "Central nucléaire" à Flamanville, au côté d'la mé. Quand l'ieau a pâssé à travèrs dé la machinn'nie nucléaire oulle est caude, et naturellement oulle ècaûffe la mé a m'suthe qu'oulle est dêchèrgie d'dans. Ou-s allez m'dithe qué ch'est impôssibl'ye d'êcaûffer la mé d'mème. Mais i'faut considether qué ch'est comme eune riviéthe dg'ieau caude tchi continnue à s'viédgi d'dans niet et jour à londgieu d'temps et qu'à forche dé continnuation v'la tch'a d'l'êffet sus eune grande êtendue, et j'sommes gentiment près d'Flamanville. Pas seulement ch'la, mais oulle est probabliément empouaîsonnée d'radiation tch'est apte à pénêtrer crabes et paîssons et les rendre dangereux et malsains comme nouorrituthe humaine.
Ou-s-allez sans doute dithe: "Tch'est qué j'peux y faithe - jé n'peux pon aller protester contre lé Gouvèrnément Français!" Sans doute, ou n'pouvez pon. Ch'est bein entendu. Mais ch'n'est pon nécessaithe. Ch'est ès Êtats ou au Gouvèrnément Angliais d'protester "diplomatiquement" comme nou dit. Mais ou pouvez en pâler à vouos Députés et lus d'mander d'entanmer l'affaithe officiellement dans L's Etats. M'n idée est qué si l's autorités d'Jèrri et d'Dgèrnésy protestent à hautes vouaix, lé Gouvèrnément Français s'en va r'considéther l'affaithe dé peux de trop offenser l'Angliétèrre.
Ch'est vrai qu'ch'est dû d'arrêter l'progrés. Mais les gens scientifiques d'veinnent dé pus en pus conscients du dangi d'expérimenter atout l'atôme. Et la populâtion ordinnaithe c'menche à s'èrbînfrer, mème ichîn en Améthique, contre la construction d'un "réacteur nucléaire" dans san vaîthinné ouaithe tch'il est admîns qué j'en avons grand bésouain ches jours pour suffithe ès bésoins d'production d'êlectricité.
Faites tout vouot' pôssibl'ye pour attither l'attention d's autorités en Jèrri au dangi tchi vouos m'niche à Flamanville. N'ayiz pon d'peux d'en pâler ès mêssieux et ès grosses têtes dé la Cour et d's Êtats. S'ou faites vouos vouaix la vouaix des Îles, tchitchun s'en va vouos êcouter!
George d'La Forge
Viyiz étout: