Moussieu l'Editeu
Ah chêsque la Merrienne n'tait pas contente l'autre matin quand ou liut dans votre gâzette que y'avait tchestchon de donné les Mintchiers à ches Français-là.
Ou n'pâsle que d'chonna ches jours et même ou m'rêvillye dans le mitan d'la niet pour me dithe tchiquechose de nouvé tchi y'est v'nu à l'idée.
A l'êcouté n'y'a qu'eune chose à faithe et ch'est d'envié eune bouonne compagnie d'Saint Ouennais ès Mintchiers pour les d'fendre.
Quant à mé je n'prends pas l'affaithe si sérieusement, car, à c'menchi je n'craithai jamais que l'gouvernement nos jouothait chutte salle farce là, épis, pour dithe vrai je n'sis pas aussi intérêssi comme j'éthais tait aut'fais viyant qu'je a'sis pas d'âge ach'teu pour allé à la pêque des ormers.
La dernié fais qu'j'y fut, tchiques années d'vant la djêrre, j'en attrapit plien mes braies et quand j'm r'trouvit sain et sauf à terre je juthit que jamais d'autre j'ithais ristchi ma vie et enduthé tant d'minséthe sus ches fichus rotchiers pour tchiques minséthablyes ormers.
Le temps, chu matin-là n'tait pas trop bé, car y tchiyait des brins d'plyie quand j'vinmes sus la cauchie pour embertchi, et y m'sembliait que l'vent s'crâissait.
D'vant v'nin au Châté y tchiyait d'la plyie à verse, et comme y n'y'avait autchun abri à bord j'fut bétôt trempé jusqu'a le pé. Heutheûsement j'avais apporté deux d'goûts d'tchique chose dans eune bouteille, mais v'la tchi n'duthit pas longtemps et j'tais bétôt au m'séspé quand tout d'un coup, nos v'la là.
J'nos en fûmes trais d'nous, dans un p'tit bâté sûs un rotchi ouêsque, à chen qu'nou nôs avait dit, y'avait d's'ormers en mâsse. Le Liaiësse, man biau-fils m'avait raconté, l'menteux, qu'une bordée il avait remplyi sa poque là dans mains d'eune heuthe, épis, comme y s'faisait, “ch'tait d's'ormers gros comme ma patte.” Mais y n'tait pas v'nu chu jour-là car sa bouonne vaque tait malade. Il a toutes les chances, chu balloque-là!
J'mé mint en travâs tout-d'suite, pour tâchi de m'rêcauffé, car je trembliais comme eune fiéille. Je qu'menchit dans un maniéthe de cané, ouêsque y'avait hardi de grôsses pierres, et presque deux pids d'iaux et j'en l'vit des doûzaines, mais au but d'vingt minutes tout chen qu'avais attrapé ch'tait un ma dans l'dôs, deux g'nors à sang et deus bras et deux gambes bétôt rompus.
Oh, grand doûx d'la vie, tchi bordée! Des rotchers, des pierres, du vraic en mâsse, mais pour d's'ormers, si y'en avait y taient si ben muchis que je n'tais pas fichu d'en trouvé pûs d'un couplye, mais chen tchi m'fit mârri ch'fut d'vais quand l'temps vint pour nos en r'allé, que presque tous l's'autres avaient fait eune bouonne pêque et j'ai tréjous tait sêux qu'nou m'avait envié sus chu rotchi-là par exprès.
J'fut forchi d'en accaté trais doûzaines car j'n'ôsais pas m'en allé siez nous avec ma pêque. Mais je'n'tais pas ocquo au but d'mes minséthes car je fut malade comme un tchan tout l'long du qu'min en r'venant et je r'vint avec eune dôse de fraid tchi m'mint au liet pour eune sémaine.
Ch'estenchi Moussieu ou comprendrez que j'n'y tchâins pas pûs qu'chonna à ches maudits Mintchiers, mais j'n'ôse pas l'dithe à la Merrienne, car seûx et certain que j'n'en ouïthais jamais la fin. Et j'vos priethai de n'nos envié pas la gâzette sam'di, car che s'sait agvé tout.
PH'LIP
15/2/1947
Viyiz étout: