Lé Bliantch'Île et La Marmotchiéthe
(Mèrcie bein des fais à Eric de Bondy pouor l'portrait)
Y'a chînquante ans ch't' année d'pis qu'la Cour Întèrnâtionale confirmit qu'Les Êcréhos et Les Mîntchièrs sont à nous - en 1953.
J'mé d'mande combein d'gens d'Jèrri - les pêtcheurs exceptés - ont vîsité ches rotchièrs Jèrriais - et combein qu'i' y'a d'gens tchi connaîssent les noms des rotchièrs? Pouor dé mé, j'ai 'té oblyigi dé r'gardé dans des livres à seule fîn d'dêcouvri touos les noms - ch'est eune bouonne chose qué l'Docteu Fraînque Le Maistre avait fait ses r'chèrches y'a d's années.
Les pus grandes dé ches p'tites îles sont assez bein connues, par exempl'ye La Maîtr'Île, La Marmotchiéthe, et Lé Bliantch'Île. Mais y'a d'aut's noms întérêssants étout. Y'a Les Trais Greunes - eune greune est un pliat rotchi tch'est juste en d'ssous d'la mé au bas dg'ieau, ou tchi s'dêcouvre un brîn seul'ment. Et né v'là un mot tch'est s'posé d'êt' Norrouais en originne.
L'Êtchièrviéthe est acouo un rotchi tch'a un nom tchi veint du Norrouais. Ch'est la p'tite île ès cormouothans, mais nou n'y r'connaîtrait dgéthe l'vièr mot Norrouais “skarfr” (cormouothan).
Chu rotchi a nom étout La Pièrre ès Femmes - né v'chîn l'histouaithe qué nou-s'a raconté: des pêtcheurs abandonnîtent eune femme cruellement sus chu rotchi. Mais sa vouaix continnuait à v'nîn d'ilà, en dithant "Souky Gaudîn est man nom, Souky Gaudîn est man nom......" Et d'pis chu temps-là des pêtcheurs ont creu ouï chu cri sus l'vent.
I' sembliéthait qué s'lon la Cour Întèrnâtionale y'a des r'vénants tchi sont à nous étout!
