Discours du Président en Dgèrnésy, lé 30 d'Novembre 2000
Nou m'dit qu'les miyieurs discours sont les pus courts, mais i'm'semblye qu' ch'est dêjà trop tard pour lé raccourchi auprès eune întroduction comme chenna - mais j'm'en vais tâchi dé l'garder aussi court que pôssibl'ye tout d'même.
Hièr dans l'office, deux Jèrriais, Roy et Christine, vîntent m'vaie pour faithe les prépathâtis pour not' sèrvice d'Noué, et j'étions à distchutter ma visite à chu dinner à ces sé. En pâlant, i'disent comme tchi qu'il aiment la campagne ichîn en Dgèrnésy, eyou qu'nou peut vaie autant des caumièthes, des bungalows comme j'n'avons pon en Jèrri. I' trouvîtent ch'là eune grande difféthence entre les deux îles, et i'l'aimaient hardi. Pour d'mé, j'ai trèjous considéthé les difféthences entre les îles sont mains înmportantes que les sînmilitudes, et j'm' d'mande pourtchi qu'i' y avait trejous ieu du brit entre les Jèrriais et les Dgèrnésiais. Par exempl'ye, au mais d'Mai, quand j'étions ichîn pour la Fête Normande, La Presse m'd'mandit eune entreveue, qu'i' publyîtent sous l'titre "Can Jersey teach us to save our language?" I'pensit en l'viyant que si j'tais Dgèrnésiais, j'éthais dit "Nannîn, mèrcie!"
J'ai ouï pâler dreinement d'un Dgèrnésiais tchi mouothit et s'trouvit au hechot d'Paradis, eyou qu'St. Pièrre li d'mandit san nom. En examinant dans san livre, St. Pièrre trouvit qu'l'bouonhomme avait pâssé eune bouanne vie sus la tèrre. Il li dit qu'i' y avait eune seule êpreuve à faithe d'vant entrer au Paradis, et ch'tait d'êpeler l'mot l'pus înmportant dans la vie, l'mot "Amour". A-M-O-U-R fit l'Dgèrnésiais, et St. Pièrre l'fit entrer. I' trouvit qu'l'rouoyaume des cieux 'tait justement comme nou l'imaginne, bein paisîbl'ye et ch'na li donnit bein du pliaîsi. Mais auprès eune s'maine, i'tait explyitchi qu'les nouvieaux-v'nus avaient eune tâche à faithe. St. Pièrre aimait jouer au golf touos les Sanm'dis - j'n'sai pon san handicap - et les siens tchi 'taient arrivés dreinement prîntent sa pliaiche à la porte des cieux. Sanm'di vînt, et l'Dgèrnésiais vînt faithe san d'vé, et auprès tchique temps, il avait d'mandé à tchique douzaines d'êpeler "Amour" d'vant lus admettre, quand i' viyait un Jèrriais arriver à la porte. I' r'gardit dans san livre, et trouvit qu'il avait m'né eune bouanne vie etout, et pis, l'êpreuve finale pour chu Jèrriais - "pouv'ous êpeler l'mot l'pus înmportant ichîn man vyi? L'mot - tchècoslovaquie!"
J'n' pâssit pon des vacances en Dgèrnésy quand j'tais mousse - la preunmiéthe fais qu'j'visitis l'île 'tait auve eune jolie janne fil'ye - et chutte fil'ye d'vînt ma bouannefemme. J'm'rappelle d'aver fait eune promenade en vouaituthe et d'aver mangi un bouan r'pas au restaurant "Absolute End".
Ch'tait vraiement en travaillant pour Channel Television qu'j'fis des visites en Dgèrnésy assez souvent. J' c'menchis à apprendre l'Jèrriais en 1985 (et j'continnue au jour d'aniet), et auprès tchiques années, Michael Lucas m' d'mandit d'faithe eune douzaine d'court programmes en Jèrriais. I' pathait qu'ils rêussîtent, car l'année suivante, i'm' d'mandit d'en faithe en Dgèrnésiais. Ch'na m'donnit un p'tit problième, car à chu temps-là, j'n' connaissais pèrsonne tchi pâlait vot' langue. Michael m'donnit deux noms, et i'm' dit tchi n'y éthait pon autcheune diffitchulté. Il avait raison, viyant que les noms 'taient les siens dé Mabel et Morrison Torode. J'lus visitis, i'm' trouvîtent des victimes - mes apologies, des gens à prendre part, et i'm'introduithaient ès autres tchi m'aidgîtent dans l's années suivantes - j'n' m'en vais pon mentionner touos, car ch'na prendréthais trop longtemps, mais chutte fais ch'tait Bill Gallienne et les siens tch'organisîtent La Fête Normande, et j'veurs vos dithe qu' les deux programmes qu'j'fis es'sont sus Channel les semaines tchi veinnent - mais i'faut programmer vos videos, car i' s'sont diffusés Mardi à 11.30 du sé jusqu'à minniet et la même heuthe Mardi en huit.
Mes anmins, j'sommes dans d's années critiques pour nos langues. J' sai bein qu' i'y en a, especiallement dans l's îles, tchi disent que les langues s'en vont s'perdre, même qu' ch'est eune bouanne chose s'il' mouothîtent, mais à m'n idée, i' faut faithe autant qu'possibl'ye pour les saufgarder.
I' y a pus d'întéthêt en d'houors d'Dgèrnésy et d'Jèrri qu'i' y en a en d'dans - par exempl'ye, Prof Richard Coates dé l'Unniversité d'Sussex est en train d'chèrchi les sou pour faithe des catalogues d'l'êcrituthe dans l'Jèrriais et l'Dgèrnésiais, Mari Jones à Cambridge a ieue eune commission pour un livre tchi s'sa diffusé partout l'monde, et i' y a un tas d'autres comme eune êtudgiante Dgèrnésiaise, Julia Sallabank, dans l's Unniversités et dans les pays francophones tchi lus întérêssent.
Mais pour les garder en allant, i'faut întérêssi les jannes, et comme ou savez, aniet en Jèrri, j'avons dans les deux chents mousses dans vingt'huit clâsses par s'maine, et j'avons ieu du grand succès - par exempl'ye, pus qu' quarante prîntent part dans l'Eisteddfod la semaine pâssée dans les difféthentes clâsses. J'avons des sites sus l'Înternet eyou qu'ous pouvez liéthe tout entouor chein qu' j'avons fait.
Comme Président d'L'Assembliée d'Jèrriais, j'voudrais encouothagi tout l'monde d'apprécier not' langue et j'veurs l'vaie ravigotté par autchun moyen.
J'vos r'mèrcie tout et especiallement Moussieu d'Garis d'la part des Jèrriais ichîn pour vot' hospitalité à ces sé, et j' d'mande à touos les Jèrriais d'vos l'ver et d'baithe à la santé d'l' Assembliaï d'Dgèrnésiais.
Anthony Scott Warren
Viyiz étout: