L'êtchusson d'Jèrri est les trais fanmeurs léopards d'or sus un rouoge fond. Nou les vait par chîn et par là, sus des billes et des dotchûments, sus des bâtisses et sus les couleurs dé Jèrri.
L'originne dé l'êtchusson est l'don d'un scêlle au Bailli d's Îles d'la Manche en 1279 par l'Rouai Douard I. Auprès 1302 y'avait un bailli pouor châque Bailliage et les scêlles 'taient distîndgis par les fielles à Dgèrnésy. D'pis chu temps-là ch'tait l'sceau d'l'Île ou l'scêlle du Bailliage. L'Code des Louais d'1771 lé dêcrivit coumme lé scêlle d'l'Île. Quand des pièches Jèrriaises fûdrent êmînses au 19e siècl'ye ch't êtchusson fut fait sèrvi, coumme dé raison, et l's Êtats continnuaient d'faithe sèrvi l'êtchusson pouor èrprésenter l'Île.
Ch'fut ravissant don en 1905 quand nou proposit eune couleu pouor l'baté d's Êtats qu'l'êtchusson fut tchestchionné par l'Amithaûté à Londres. Y'eut d'l'entre'-êcrithie du Bailli d'Jèrri et d's autorités du Rouoyaume Unni pouor prouver qu'l'usage d'l'êtchusson 'tait du temps du Rouai Jean (ou quâsiment). Lé rêsultat: l'Rouai Douard VII confirmit qu'Jèrri pouôrrait continner l'usage d'l'êtchusson coumme d'vant.
En 1981 l'êtchusson fut ajouôté à la couleu d'Jèrri.
Viyiz étout: