Les Pages Jèrriaises

La Belle èt Brave P'tite Ile,


ou
L'Chant des Actes dé Valeur
des
Jerriais.

 

Dédiè à tous les Garçons d'la P'tite Ile qui n'ont pon dêgénérè dé lus braves et intrèpides Anchêtres,

Par un Fidèle Esfant d'la Vieille Cêsarée.

I.

D'pis qu'les Druid's vinr'nt pianté
Lus pièr's à sacrifié
Sus touots les points dé not' bell' p'tite île
Châqu' peuple a, en san tou,
Sans même ofri un sou,
Voulu dé forch' prendr' not' bell' p'tite île.
Car tout l'mond' convouètait l'île ;
Oui, ch'tait au chain qu'érait l'île :
I vinr'nt y dêbertchi,
Et coudpisir'nt l'ponsi
Pour dév'nin maîtr's d'la p'tite île !

II.

Gil's-Cêzard - lé grand-houm',
Qui 'tait Empéreur d'Roum',
Sautit l'prumi sus la bell' p'tite île.
J'nos batîm's dé not' mux,
Et quand j'n'en pouvîm's pus
I s'êlanchit sus la bell' p'tite île.
I n'vint pas tout seu dans l'île :
I-l-'taient eun' tapè' sus lîle.
A ses douz' favoris,
Gil's criyit : "Partagis
"Entr' vous, mes brav's, la p'tite île !"

III.

Tchêqu' chés nouviaux maîtr's fir'nt ?
Contens d'lus chef, i dir'nt :
"Noumons en s'n-honneu la bell' p'tite île !"
Et i la bâtisir'nt
"Cêsarée," hè-pis fir'nt
Fortifié partout not' bell' p'tite île.
I-l-avaient grand peux d'perdr' l'île :
I voulaient resté dans l'île ;
Osin, ch'est chain qu'i fir'nt,
Tout l'temps qu'i-l-y restir'nt
A gouverné la p'tite île !

IV.

Au but d'eun' fichue paus',
J'sentîm's ch'qui n'tait pas ros' :
J'vîm's dêbertchi dans not' bell' p'tite île ;
Eun' racachie d'Saxons,
Ove hach's, lanc's èt bâtons,
Pour achoinmi l'peupl' d'la bell' p'tite île ;
Touots chés marâtr's s'ruîr'nt sus l'île,
Et, dans mains qu'un rain d'temps, lîle
Fut arousè' du sang
Dé presqu' tous ses èsfans,
Tuès en d'fendant lus p'tite île ! . . .

V.

Eun' volè' oprès chlà,
Pensant nos fair' du ma,
D'autr's Saxons vinr'nt dans not' bell' p'tite île ;
Pon contents d'nos volé,
I tuîr'nt l'bouan Saint Héyé ;
Mais i n'pur'nt pon prendr' not' bell' p'tite île.
I-l-eur'nt lus tchoeu content d'l'île ;
Car touots les brav's garçons d'l'île
Tout d'un coup lus mârir'nt,
Et l'z-autr's lus dêpêchir'nt
D'fichi lus camp d'la p'tite île !

VI.

Pus tard, j'fûm's sacagis
Par d'autr's barbâr's hardis,
Qui v'naient souvent dans not' bell' p'tite île
Pilis, volé, brûlé
Et nos martérîsé ;
Mais ch'tait pas là prendr' not' bell' p'tite île.
L'coyrag' n'tait pas mort dans l'île,
Et j'restîm's occouo maîtr's d'l'île :
J'nos batîm's pour not' drouèt,
Et j'lus bâyîm's du sèt
Pour les chasé d'la p'tite île !

VII.

Tchiqu' temps oprès, Rouôlot
Batit d'z-ail's coume un cot, -
Pens'-ous qué ch'tait sus la brav' p'tite île ?
Nannin ; car i criyait
Qué, viyant qu'i-l'avait
Normandie, qu'i t'nait la brav' p'tite île.
I s'trompait - ch'tait à nous l'île, -
Et d'pus, jé jurîm's qué l'île
N's'rendrait pas pour si p'tit,
Qu'i falait feu satchi
Dévant qué d't'nin la p'tite île !

VIII.

Quand les Seigneurs Normands
Vinr'nt, coume autant d'brigands,
Pour saisi les tèr's d'la brav' p'tite île
Et nos fair' lus escliav's,
J'nos l'vîm's touots en brav's ;
Et ch't-insult' faite à la brav' p'tite île
Fut vangée des houm's libr's d'l'île,
Et chlà, pour pus d'chant ans ;
A la fin, ès tyrans,
J'eûm's à cédé la p'tite île !

IX.

Dêqu' l'Ré d'Franc' heu creu bouan
D'dêposédé l'Duc Jean,
Ses fidèl's sujets d'la brav' p'tite île
S'dêcliarir'nt tous d'ov' li,
Et i-l-en fut bain fi,
Car i 'rcompensit la brav' p'tite île.
Mais les "Normands" voulaient l'île
Et L'Mouann' fut enviè dans l'île ;
Mais i-l-en heu du pièr',
Car j'y-ordonnîm's dé s'tèr'
Et d'dêcampé d'la p'tite île !

X.

Septant'-neu-v-ans oprès
Les "Normands" ervinr'nt vès
Ch'qu'i pouôraient fair' dans la brav' p'tite île.
I s'n-alaient - disaient-i -
"L'Angliétèr' contchéri" . . . .
Et "hapé en qu'min" la brav' p'tite île !
Mais i comptaient sans l'z-houm's d'l'île ;
Car, quoèqu' tout l'êtè d'vant lîle,
I n'pûr'nt pon apréchi, -
Et mains qu' chlà - dêbertchi
Ou maîtrîsé la p'tite île !

XI.

Tchérantain' d'ans pus tard,
Les mêm's fir'nt un aut' vard
Pour atèré dans la brav' p'tite île :
I-l-acouorir'nt campé
A Gouorè - d'vant l'Châté,
Qui domptit l'z-enn'mins d'la brav' p'tite île.
Mais tchi deu profond pour lîle,
Lé fenmeux Gouvèrneux d'l'île -
Dé Barentin - fut tuè . . . .
Oui ! en Jerriais dévouè,
I mouorit pour sa p'tite île

XII.

Pis vint l'grand Du-jeu-clyin, -
Ché n'tait pas du niolin :
Ch'tait fini chut' fès d'la brav' p'tite île . . . .
I s'n-alait tout râsé,
Tchul'buté l'Vièr-Châté
Et soumètre à li la brav' p'tite île !
Mais l'fenmeux R'naud d'Cart'rèt d'l'île
'Tait là pour d'fendr' l'châté d'l'île ;
Et l'bieaux Connêtabl' vit -
Qu'ch'tait pus pèrt' qué profit
D'cherchi à prendr' la p'tite île !

XIII.

Eune armè' d'Espénnyos
D'Brétons èt ditès cots
Vint oprès ; mais l'z-houm's d'la brav' p'tite île
Li dir'nt : "Halt'! si vos piès ! . . . .
"N'apréchis pas trop près !
"Car, jusqu'au derny d'la brav' p'tite île,
"S'bat'ra à la mort pour s'n-île !"
Mais l'enn'min, pour tchité l'île,
D'mandit d'l'or - mais pas d'ca !
Ch'tait mux d'li donné chlà
Qu' d'êtr' tuès èt perdr' la p'tite île !

XIV.

Penhouèt s'contentit, li,
Dé v'nin nos ravagi,
Sans s'avîsé d'prendr' la brav' p'tite île ;
Mais ch'tait eune aut' chanson
Quand Fieutchèt 'rchu mission
D'Man-lévri, d'v'nin dans la brav' p'tite île,
Pour saîsi en san nom l'île ;
Car, par eun' trahîson, l'île
V'nait d'l'-i-êtr' vendue sans drouèt
Par Henri-l'bel-objèt -
Lé Roué traître à sa p'tite île ! . . . .

XV.

Fieutchèt nos dît d'nos rendr',
Qué j'gannions rain d'nos d'fendr', -
Qu'i sérait bain r'duir' la brav' p'tite île ! . . . .
Bah ! i-l-est, ma fé vèr',
Pus aîsi d'dir' qué d'fair' :
I n'eut qu'siès pâress's d'la brav' p'tite île . . . .
Et j'gardîm's l'aut' maintchi d'l'île.
J'fîm's pus qu' chlà : Phlip d'Cart'rèt d'l'île
Et l'brav' Harleston s'minr'nt
A not' têt' èt li 'rprinr'nt
Chain qu'i-l-avait d'la p'tite île !

XVI.

J'fîm's moli par not' jeu
Les "Normands" d'lus ardeu,
Car i n'ervinr'nt vès la brav' p'tite île
Qu'au but d'pus d'trais chants ans, -
S'nou except' les forbans
Qui pâsir'nt au Nord d'la brav' p'tite île -
Pour pilyis chut' partie d'l'île,
Mais qui n'fir'nt qué senti l'île ;
Car, au-yeu d'fair' butin,
I 'rchûr'nt du "cach'-couôsin,"
Et v'là ch'qu'i-l-eur'nt d'la p'tite île !

XVII

Ch'tait lé Princ' dé Naseau
Qui fut l'préchain bégaud
"Qu'êconit sa raie" pour la brav' p'tite île ;
I vint - pensant d'fair' bain -
Par dans la baie d'Saint-Ouen,
Criyant tout bouann'ment qu'la brav' p'tite île,
Ou pûtôt, qu'les houm's dé l'île
S'rendraient, en li livrant l'île ;
Mais l'pouôr' Princ' s'fichit
Brav'ment lé dé dans l'yi :
I-l-eut mains qu' chlà d'la p'tite île !

XVIII.

Du coup, pour en fini,
Rouôl'court, l'aventuri,
Atère eun' gnièt sus la brav' p'tite île :
I camp' dans l'Vièr-Marchi
S'n-armè' d'papi-mâchi,
M'nich' dé feu èt d'sang la brav' p'tite île,
Prend d'san yèt l'Gouverneux d'l'île
Et s'crait grand-roué dé tout' l'île !
Mais, tandis qu'not' grivouès
S'rêjouît dé san succès,
Châqu' houm' s'arm' dans la p'tite île

XIX.

Lé Donn'-Tchichott' français
Aprend qué les Jerriais
S'aprêt'nt à d'livré lux brav' p'tite île :
Lé v'là qu'i fil' tout drèt
Au Châté Lizabèt,
Pensant qu'chut' fort'ress' d'la brav' p'tite île
L'erconnaîtra maîtr' dé l'île ;
Mais, parmi les brav's dé l'île,
S'trouv' là, Meul'kesteur, prêt
A y-aprendr' qu'i-l-est
Mains qu' bain-v'nu dans la p'tite île !

XX.
Rouôl'-court, contrarièt
D'êtr' 'rchu à coups d'boulèt,
'Rvain à la "Cohue" d'la brav' p'tite île,
 Et qu'mande à ses soudards
Dé s'mennié coum' d'z-êpars.
- Lé Mâjeur Pierson, d'la brav' p'tite île,
En têt' d'la Milic' dé l'île,
Ouvr' san feu sus l'z-enn'mins d'l'île ;
Mais chu nobl' dghèri tchèt . . .
Oui ! mortell'ment bièsè ! . . . .
Dans la d'livranc' d'la p'tite île !

XXI.

Dumaresq prend vit'ment
D'nos troup's lé coumand'ment
Pour vaincr' l'enn'min dé la brav' p'tite île :
Dans s'n-intrépide ardeu -
Afrontant fé èt feu -
Chu dègn' ofici d'la brav' p'tite île
Remport' la victouèr' pour s'n-île !
- Quant au presqu' Contchérant d'l'île,
I n'a "ni fich' ni bran" -
Nou l'a tuè coume un tchan,
Au cri dé "Viv' la P'tite Ile !"

 

(Commencé à Jersey en 1863, achevé à Londres au commencement de 1864, par J.D.R.)

 

Viyiz étout:

 

Les Pages Jèrriaises