Dépis qu' j'avais liu y'a eune souaixantaine d'années "Les Travailleurs de la Mer" par Victor Hugo, j'ai tréjous 'té êprîns dé l'êtendue des rotchièrs tch'i' nommait Les Douvres et tchi sont connus à ch't heu sus les cartes comme Les Roches Douvres. I' sont eune affaithe dé vîngt milles au seur-vouêt dé Dgèrnésy, dans les tchînze milles au ouêst-seur-vouêt dé Jèrri, hardi la même distance au nord-nord-êt dé l'entrée dé Lézardrieux, Les Côtes du Nord en Brétangne, et, sustout, à tchînze milles et d'mi dé chein tch'est Les Héaux, tch'est tout près dé chu hâvre-là.
Ches rotchièrs étaient où'est qu'Gilliatt, l'homme tch'a lé rôle principa dans l'roman dé Hugo, èrpêtchit la machinn'nie et l's aut'es parties essentielles dé La Durande, "lé stînme du Dgiâbl'ye" dé Mess Lethierry, et iou étout qué Gilliatt sé battit auve succès contre "lé paîsson du Dgiâbl'ye", la grand' pieuvre.
Pa'ce qué, d'un jour bein cliai - quand, disons, la visibilité est bein bouonne aupres un ôrage - j'peux vaie en r'gardant ouêst en mé dé nouotre Grand Clios d'la Maîson sus La Campangne à St. Ouën chein tchi pathaît être deux tours, ieune haute et l'aut'e pus courte, mâtées à l'horizon, fait ches rotchièrs des pus tentants.
N'étant pas bouôn matelot - en êffet, probabliément iun des piéthes souffrants du ma d'la mé - janmais jé n'les vèrrai tout près dé sus la mé, et l's avions dans tchi nou viage pouor la Brétangne né pathaissent pon pâsser en d'ssus comme i' font sus Les Mîntchiers. Et don j'étais hardi intérêssi quand man fis Hélyi apportit à la maîson à ches drein eune copie dé "Motor Boat and Yachting" pour Dézembre, 1990. Là-d'dans i' y'a eune articl'ye illustrée, "On the Rocks", par Peter Cumberlidge tchi donne eune description dé sa visite ès rotchièrs en viage dé St. Pièrre Port, Dgèrnésy, à l'Ile dé Bréhat.
Victor Hugo dit qué l'mot Douvres 'tait souvent donné à des rotchièrs et falaises, mais nou n'lé trouve pon dans les dictionnaithes Français d'à ch't heu, sinon pouor l'nom du grand port Angliais. Enfîn, nou l'trouve dans lé Dictionnaire Jersiais-Français du Docteu Frank Lé Maistre souos la mention "drove, dovre ou douvre ». I' donne la sîngnificâtion comme étant "Tranchée à ciel ouvert, pratiquée dans un champ qui a un sous-sol aqueux, aux fins de drainage ... À St. Ouën on dit drove, dans le Centre, etc., c'est dovre et dans l'Est douvre. Nous avons entendu une variante, drogue, à plusieurs reprises dans l'Est. C'est par confusion, ce qui arrive assez souvent quand les gens perdent l'usage des mots... Par extension on se sert du terme pour une tranchée quelconque. Jadis on creusait des dovres au-tour des cotes ... pour mettre les hommes en embuscade. 'Aller es dovres deux fais la s'maine' - un des services militaires d'autrefois... dans des textes du 17e siècle on lit: 'par voyes de douvres' - par voie de corvées. Donc, par extension, corvées quelconques. Enfin, c'était la douve ou le fossé d'un château, d'un manoir".
Mais chutte explyicâtion né mentionne pon Les Roches Douvres et pouor bouonne raison, car ches rotchièrs connus en Jèrri, et partitchuliéthement ès vièrs St. Ouënais comme Les Rocques dg'Hieaux, probabliément un hardi pus correct et vièr nom qué chein tch'est pôssibliément eune corruption officielle des prononciâtions originnelles, car i' y'a' eune variante. Ch'est Les Rocques Dos, donné un mio difféthent dans l'Journal dé Jean J'valyi dans la phrase "aux pres de rocque dos". Comme dit lé Docteu L'Maistre, ch'la étha peu pathaître eune autre întèrprétâtion, Les Rocques dg'Ieau. Mais, comme dans l'cas des Pièrres dé Lé, ch'est hardi pus criabl'ye qué les rotchièrs fûdrent nommés d'après lé lieu distînctif lé pus près, Les Héaux, en Jèrriais Les Hieaux. Les auteurs dé "Jersey Place Names" craient qu' la raison pouortchi qué l'êtché fut nommé Les Roches Douvres n'est pon seûthe "à mains qué ch' né s'sait qué cèrtains t'nants avaient lé d'vé d'prendre du paîsson d'ilà pouor la tabl'ye au seigneu". Chutte théorie est hardi mains probabl'ye qu' ché n'tait qu' les rotchièrs fûssent nommés d'après Les Héaux.
Si eune description donnée par Victor Hugo était correcte, lé nom Les Roches Douvres éthait peu être à cause dé chein tch'i' dit tch'était lé pâssage êtrait (p't-être comme eune tranchie ou fôsse?) entre les rotchièrs jeunmieaux La Grand' Douvre (souaixante pids d'haut) et La P'tite Douvre (quarante pids), où'est qu'les louêmes couothaient à toute vitesse à travers. I' dit qué l'vîngt-six d'Octobre mil huit chent chînquante-neu eune forte tempête d'êtchinnoxe en tchulbutit iun. Un autre rotchi, d'après l'auteur, était L'Homme, mais ch'tait ofuche, et p't-être est acouo, Lé Hommet, ch'la étant lé pus probabl'ye dans ches ieaux pouor “un îlot plat et arrondi".
Dans s'n articl'ye, Moussieu Cumberlidge dit qué d'amors les naviguants s'êcartéthaient gentiment des Rocques dg'Hieaux en laîssant lé phare, haut dé deux chents pids sus les rocques, un bouôn trais milles à l'êst en d'valant au ouêst et préféthabliément deux milles au ouêst en allant êst. Les couothants sont piêssants, i' dit, et pûtôt à n'pas s'y fier en direction l'tout des rotchièrs. Nou peut rencontrer eune forche magnétique au su'êt des Rocques dg'Hieaux, "eune sensâtion mystéthieuse”. Lé Sieur Cumberlidge subit eune fais eune dêviâtion temporaithe dé vîngt dégrés, tch'i' criyait, à ch't' endrait.
Ch'la confirme don tchiquechose dé l'hyperbole à Victor Hugo:
"Pas de rencontre plus redoutée ... La rafale, l'eau, la nuée, l'illimité, l'inhabité. Nul ne passe aux rochers Douvres qu'égaré. Les granits sont d'une stature brutale et hideuse. Partout l'escarpement. L'inhospitalité sévère de l'abîme".
Le "Portulan des Câtes de la Manche" (1855) dit: "L'espace compris entre Les Roches Douvres, Guernesey, Jersey et Les Minquiers est désigné sous le nom de Grand Ruet. Les courants, lorsqu'ils sont dans leur plus grande force, y portent en travers, et la profondeur de l'eau et la mauvaise qualité du fond empêchent qu'on y mouille avec sécurité. Aussi est-il prudent de ne s'y engager qu'avec une brise favorable et de la vue, surtout en grandes marées... La partie Ouest des côtes comprises entre le Cap Fréhel et Les Héaux est signalée, de nuit, par le phare des Héaux de Bréhat (feu fixe)..."
Lé Sieur Cumberlidge êcrit qué "En dépit dé s'n aspect âffreux, il est pôssibl'ye d'attèrrer sus Les Roches Douvres par un temps calme... Bein seux i' faut eune visibilité raisonnabl'ye, mais autrément l'obstacl'ye lé pus împortant est psychologique; il faut, en effêt, sé pèrsuader qué nou-s-appraiche eune île et un mouoillage fascinnants pûtôt qué iun des pus âffreux êtchés dans La Manche. Nou trouve un tchai en pièrre et eune pétite caûchie du côté êst du pus grand îlot et eune j'tée pouor attèrrer au ouêst".
Lé phare est bâti sus eune rondasse comme un fort, tch'est dé chînq êtages, et "juste au ouêst est la fondâtion en chînment du vièr phare, tchi 'tait hardi pus p'tit qué la tour d'à ch't heu dé souaixante mètres dé granit rose venant d's alentours.
"Sont hors les jours des gardgiens du phare tch'éthaient offèrt la beinv'nue d'un naûfragi à autchun tchi s'trouvait là l'tou. La piêssante veue" (qu' nou vait lithe brillamment au liain la niet dé La Campangne, St. Ouen) "et l'bêtchi R.D.F." ("radio direction finding beacon" en Angliais et "balise de radiogoniométrie" en Français) "sont contrôlés à ch't heu par microprocesseurs".
Un p'tit but au seur-vouêt du phare nou vait les deux hautes et bianches colonnes des moulîns à vent tchi fournissent l'ênèrgie supplémentaithe pouor lé phare. Chein qu'nou vait sus l'horizon des haûteurs en d'ssus d'La Baie d'St. Ouën pathaît être la tour du phare et la cheinne dé iun des moulîns à vent, tchi n'sont pon si hautes.
Lé Sieur Cumberlidge attèrrit sus la j'tée du ouêst et il dit: "Dé la vielle fondâtion nou-s-a eune veue assez êffritante au ouêst et au nord-vouêt à travèrs la pus grand' partie des rotchièrs. Dans lé d'hors dé l'êtché hardi des rotchièrs sont en d'ssus d'l'ieau, mais pas bein liain dé nouot' mouoillage nou viyait tchiques mauvais rêmouages en d'ssus dé dangièrs pas bein liain en d'ssous..."
Sén articlye dans "Motor Boat and Yachting" est accompangnie d'eune grand' photographie en couleurs du phare, la vielle fondâtion et iun des moulîns à vent, et étout par deux sîmpl'yes cartes dé la pôsition des Rocques dg'Hieaux quant à Dgèrnésy, Jèrri et la côte dé La Brétangne, et des rotchièrs ieux-mêmes.
Max Lucas
(Des r'mèrciêments au Docteu L'Maistre pouor sen aîgue à traduithe ch't' articl'ye)
Viyiz étout: