J'voudrais vos pâler d'la Fête d'la Vielle Langue Normande tchi eut lieu au Collège de Blanchelands en Dgernesy lé chinq et six d'mai, éyou qué deux-trais étudgiants fûtent donner lus support et prendre part.
J'arrivîmes à not' hôtel - les Rocquettes (tchi 'tait bein confortabl'ye) - et après tchique chose à mangi, j'eûmes lé temps dé faithe eune touônnée dans la ville dé St Pierre Port.
La séthée j'fûmes invités à l'hôtel dé St Margaret's Lodge pouor rencontrer les gens tchi s'en allaient prendre part dans la Fête lé préchain jour. Ch'tait eune mangnifique opporteunité dé vaie nos anmîns de Dgèrnésy et dé Normandie qué j'avêmes rencontrés l'année dé d'vant.
Lé san'mdi j'nos trouvîmes à Blanchelands pouor lé c'menchement d'la Fête à eune heuthe - mais j'têmes dans l'pays des ânes! - et lé c'menchement 'tait à un quart dé deux. N'y a pas d'soin! Chutte fête, ch'n'est pas eune compétition, ni un Eisteddfod, mais pûtôt eune réunion d'anmîns d'la Normandie, dé Dgèrnésy et dé Jèrri pouor chianter, danser et èrciter.
Les femmes dé Normandie 'taient si bein habilyies dans des robes dé toutes les couleurs, auve lus mangnifiques coêffes dé dentelle. Les danseurs dé l'Assambyais dgèrnésiaise 'taient habilyis en vièrs costeunmes traditionels étout - les hommes dans lus câsaques à pannieaux auve des boutonniéthes d'iliets, des blianches braies et des tappeurs! - des vrais messieurs valet!
Pouortchi qué j'n'avons pas des danseurs jérriais? P't-être eune bouonne idée pouor eune autre fais !
Les chanteurs dé Dgèrnésy (la Jaine du Vouest) comme il' s'appellent, auve Hazel Tomlinson en chèrge nos chantîtent eune sélection dé chansons dgèrnésiaises et ch'tait un vrai plyaisi dé les ouï.
Nos pièches par Tony et Geraint et les autres êtudgiants fûtent si bein érchues par l'audience !
La salle du Collège 'tait remplyie d'monde et duthant l'arlévée un autre groupe dé Nantes arrivit, j'crais qué ch'tait la preunmiéthe fais tchi 'taient v'nus a eune reunion - eune autre fais, p't-être tch'i' prend'thont part.
Des anmins dé Jèrri et d'autres êtudgiants vîntent par baté pouor lé jour étout - l'y'en avait tchi n'taient pas si chanceux, car i'n'y avait pas assez d'pliaches sus l'baté et i' 'taient d'sappointès. Tchi damage - i' manchîtent eune raide bouonne arlévée !
Lé san.mdi au sé, après l'concèrt, touos les groupes lus réunitent pouor un dîner à l'hôtel Peninsular. Après un bouon dîner, les tabl'yes fûtent clièrgies et la chant'tie et la dans'sie c'menchitent - tous à prendre part - ch'fut eune vraie entente cordiale - absolument eune mèrveilleuse fin d'journée.
Simone Guegan
2001
Viyiz étout: