Les Pages Jèrriaises

L'Île dé Man

L'Île dé Man L'Île dé Man est eune île dans la Mé Irlandaise entré l'Angliétèrre et l'Irlande.

L'île est chînquante-deux kilomètres (trente-trais milles) d'londgeu et vîngt-deux kilomètres (treize milles) dé laîze.

L'île entchiéthe est chîn chents septante-deux kilomètres cârrés (deux chents vîngt-sept milles cârrés).

Y'a des montangnes - la pus haute a nom Snaefell.

Y'a eune pouongnie d'villes. La capitale est la ville dé Douglas (Doolish), et y'a d'aut's villes: Ramsey (Rhumsaa), Peel (Purt ny h'Inshey), Castletown (Balley Cashtal) et Port Erin (Purt Çhiarn). Mais la maintchi d'la populâtion d'meuthe à Douglas et dans l'vaîsinné.

Combein qu'i' y'a d'gens tchi d'meuthent en l'Île dé Man? Y'a dans les septante mille pèrsonnes. Don nou peut r'mèrtchi qué l'Île dé Man a mains d'populâtion qu'Jèrri - mais oulle est bein pus grande. Y'a un tas d'campangne entré les villes!

Tch'est qu'i' sont les îndustries d'l'île? Auve toute chutte campangne, y'a bein seu d'l'agritchultuthe.

Et un tas d'touristes aiment bein v'nîn vaie les grèves et la natuthe - et châque année un tas d'gens veinnent èrgarder les grandes courses à motorbike tchi sont bein fanmeuses.

Ach'teu, les banques et les finnances sont hardi înmportantes pouor l'êconomie d'l'Île dé Man étout.

Y'a l'parlément d'l'île tch'est l'pus vièr des parléments dans l'Commonwealth - il est dîvisé en deux chambres: lé Conseil Législatif et la Maîson des Cliés.

Les Manx pâlent l'Angliais, mais y'a tchiques gens tchi pâlent lé Manx étout et y'a des clâsses dé Manx dans l's êcoles. Lé Manx est d'la même fanmil'ye dé langues qu'l'Irlandais et l'Êcossais, et il est coumme lé Bréton, lé Gallouais et l'Cornouaillais étout.

En Jèrri, j'avons nos vaques Jèrriaises. Y'a-t-i' d's annimaux spéciaux en l'Île dé Man? Oui-dgia! Les cats dé l'Île dé Man sont fanmeurs - i' n'ont pon d'coues!

 

Viyiz étout:  

Les Pages Jèrriaises