Concert par des Dgèrnésiais
Pour la preunmié fais d'pis qu' les deux assembliées sont formées, plusieurs membres dé Dgèrnésy vintent nos donner un concert, mêcrédi, 1'25 d'octobre 1961, dans la Salle Parouaissiale dé St. Jean, et ch'en fut un raide bouan étout.
L's affaithes mensuelles fudrent courtes - lé rapport dé la rêunion du mai d'août fut liu et approuvé et trais nouvieaux membres fudrent êlus.
Tribut au Sieur A. Heaume
Auprès l's affaithes finies la ségrétaithe annoncit les tristes nouvelles du décès du Sieur Heaume, le ségrétaithe dé l'Assemblliaie d'Guèrnésiais, et dit comment que l'Sieur Heaume s'était tréjous dérangi pour nos aidgi sus touos sens, et tout ch'qu'il avait fait pour s'n Assemblliaie, comme ségrétaithe et composeux dé r'citations et farces dans la langue dé s'n ile. La lettre dé sympathie qu'avait 'té env'yée à sa veuve fut liue, et l'président d'mandit ès membres dé lus l'ver eune minute en silence à la mémouaithe du Sieur Heaume.
La beinv'nue
Lé Sieur H.M. Gibaut fit la beinv'nue à touos l's artistes, et dit qué ch'tait un grand pliaisi pour nous dé l's aver à nos entrét'nin pour la séthée, et l'Sieur G. Robilliard, qui fut compère pour lé concert, rêponnit qué ch'tait un pliaisi pour ieux d'être v'nus.
Lé concert
Lé programme avait 'té divèrsément bein arrangi, et c'menchi avec deux chansons par la dgainge, et pis deux danses Dgèrnésiaises, des dialogues. r'citations, un miot d'magique, et auprès eune scène en partie historique, bein composée par Mme. Doris Heaume, et hardi bein montrée par les Dgèrnésiais, et à fini la séthée, deux chansons d'Noué traduites en Dgèrnésiais.
Tous fudrent bein amusés tout l'travers, par la difféthence dé langue p'têtre un miot, mais pus par l's artistes qui fitent si bein car i' 'taient vraiment risiblyes.
Ermerciements
A la fin du concert, lé Sieur Gibaut les r'mercyit tous bein pour nos avaer donné eune si bouanne séthée, et d'mandit à touos les membres dé rester pour aver du souper tous ensemblye.
Viyiz étout: