Les Pages Jèrriaises

Dans l'Nouvieau Monde

Ottawa, Ontario,
Cannada.
Lé 25 d'octobre, 1975.

Moussieu l'Rédacteu,

Mardi matîn d'chutte sémaine j'tais à dêjeuner siez-mé dans L'Ménage ès Feuvres, à St. Ouën, et mêcrédi matîn j'tais à dêjeuner siez man fréthe Fraînque en Améthique. Criy'-ous qué v'la tchi m'sembliait drôle? Nannîn, ma fé, pon dut tout! Et dans l'entrétemps j'avais 'té à deux des pus împortantes capitales du monde: Londres, en Angliétèrre, et Washington, en Améthique. J'avais pâssé huit heuthes et d'mie à eune mouoyenne dé trente mille pids en l'air en d'ssus d'la tèrre et d'la mé, bein en d'ssus des nuages tch'étaient comme un bieau tapis d'blianche laîne en d'ssous d'mé, r'lisant au solé.

Si nou-s-avait dit ch'la à iun d'nouos anchêtres il éthait sans doute creu qué ch'tait du blèrnîn ou des biougses d'un pouorre esprit biscâsié. Enfîn, nou pouorrait lî pardonner ch't' opinnion-là quand nou pense qué, même au c'menchement dé m'n existance à la forge, à St. Ouën, i' prannait au mains un mais (à tchiques exceptions quand un navithe à vailes avait bouan vent tout l'long d'un viage) à crouaîsi la mé d'Jèrri au Nouvieau Monde.

Nou mé d'mande tchiquefais comment qu'nou pâsse lé temps, assis à bord d'un avion duthant huit heuthes et pus. Ch'est s'lon. Quant à mé, j'sis tréjous tout seu et l'pliaîsi du viage dépend hardi à tchi sorte d'pèrsonne tch'est assise à côté d'mé. Qué ché s'sait homme ou femme, i' peuvent êt' bavards, et pour mé (à tchiques exceptions, sans doute) ch'est eune embête. À c'menchi y'a l'brit continnuel des motos et i' faut pâler gentiment haut pour sé faithe ouï, et pis y'a l'fait qué j'ouaï un mio haut mé-mème. Ch'est en tchi, pour mé, ch'n'est pon eune aîsie manniéthe dé passer l'temps, prîncipalement si la conversâtion n'est pon entouorre un sujet qué j'considéthe întérêssant. L'idéal pour mé est d'liéthe un bouan livre et d'dormillonner d'temps en temps. Et pis l'heuthe du r'pas aîgue à pâsser l'temps, et entre les r'pas les belles jannes filles tchi les sèrvent veinnent vouos d'mander si nou-s-a bésoin d'tchiquechose à baithe.

Dansles grands avions à réaction ("jumbo jets") la télévision est mînse en allant duthant l'viage. Pour ouï la vouaix des acteurs dans l'film i' faut s'mett' des boutons êcouteurs, r'liés ensembl'ye par un cordon êlectrique, dans l's ouothelles, et i' faut payi à bein près vIngt-chîn ch'lîns pour lé privilège d'êcouter. V'la tchi n'empêche pon d'èrgarder l'film sans l'êcouter, mais je n'm'embête pon d'l'èrgarder ou dé l'ouï. J'aime mus cliore l'yi et dormillonner. Mais ch'est sans doute eune affaithe dé goût. Les bavards aiment à bavarder n'împorte où'est tch'i' lus trouvent.

Et la vie en Améthique? Eh bein, l'temps 'tait pus caud quand j'arrivînmes à Washington tch'i' n'l'était en tchittant Jèrri. Septante dégrés Fahrenheit et un bieau solé couochant. Comme j'n'avais 'té qu'chîn mais hors du pays jé n'pouvais pon m'attendre à vaie grands changements, mais les prix d'la nouorrituthe et dé toutes commodités ont hardu renchiéthi. J'criyais qué 45 "pence" (neu ch'lîns du temps pâssé) 'tait hardi pour aver mes j'veux copés en Jèrri l'aut' jour, mais ichîn en Améthique v'la tchi couôte deux louis, et au Cannada, d'l'aut' côté d'la riviéthe dé Detroit, v'la tchi couôte trente chélîns. Y'a tchique temps, j'dîsais à un barbyi: "Ch'n'est pon ravissant qu'les jannes gardent lus j'veux longs à ch't heu tch'i' couôte tant à les faithe coper!"

"P't-êt' bein," i' m'dit, "mais les cheins tch'en souangnent, dé lus longue crîngne, comme i' faut, vont ès salons d'bieauté des femmes pour les faithe pather et r'graie, et v'la tchi lus couôte bein pus."

Mais la grand' partie d'ieux n'en souangnent pon et nou les vait partout dans la ville atout lus j'veux draits comme des patchets d'chandelle en d'ssus du révèrs en driéthe dé lus câsaques ou c'mînses. J'mé sis souvent d'mandé comment dgiâtre tch'i' peuvent s'înmaginner qué v'la tchi pathaît bein. Et acouo i' pathaîssent trouver des jannes filles! V'la tchi prouve, comme j'l'ai mentionné d'vant, qué ch'est eune affaithe dé châtchun à san goût, comme dîsait l'chein tch'embraichait sa trie, respé!

Pour lé moment, j'sis à jouï d'la vie au Cannada. J'nouos en sommes vénus à Ottawa, mes fréthes Fraînque et Jim et mé, en moto, pour vîsiter nouot' fréthe Sydney, sa femme et sa fanmil'ye, et nouot' soeu Emily et sa fanmil'ye. J'avons cachi les chîn chents mulles dé Detroit ichîn dans dgiex heuthes. Ch'n'est pon si vite comme par avion, mais ch'est vite assez. Et ch'est eune grand' jouaie pour nous, quatre fréthes sus chînq, dé s'trouver ensembl'ye pour un p'tit d'temps, sustout comme trais d'nous dêpâssent la huiptantaine. Et j'aimons tous Jèrri et j'prannons ch't' occâsion pour dithe bonjour et bouanne chance à touos nouos anmîns tch'ont la chance et l'bonheu d'y d'meuther.

George d'La Forge

 

Viyiz étout:

 

Les Pages Jèrriaises