Trenton,
Michigan, USA.
Lé 4 dé novembre, 1978.
Moussieu l'Rédacteu,
Eh bein, bouannes gens, m'y r'vélà acouo eune fais, dans chu grand pays du Nouvieau Monde. I' n'faut pon oublier qu' un tas d'Jèrriais ont aîdgi à l'mett' sus ses pids, chu grand pays - et qu'iun d'ses chînquante êtats, châtchun gouvèrné par san propre parlément, est nommé “Nouvieau Jèrri.”
L'aut' jour, ma preunmié veue du pays, dé d'dans l'avion, fut sa belle capitale dé Washington. J'tais assis dans l'mitan d'l'avion et j'tions arrêtés dans l'aéroport dévant qué j'vîsse rein d'la tèrre, ayant crouaîsi l'Atlantique à trente-neu mille pids en l'air.
J'tchittînmes Jèrri trais quarts d'heuthe en r'tard. J'tions supposés de tchitter l'aéroport à un quart dé huit, mais tchique “slight technical difficulty” nouos empêchit d'prendre vol dévant huit heuthes et d'mie. Enfîn, j'mênagis d'aborder l'avion à Londres pour l'Améthique en bouan temps. Y'a tréjous l'dangi dé n'pon faithe la connexion en temps à Londres - ouaithe qué nou peut dithe qué ch'n'est pon souvent qué l'avion pour Améthique tchitte l'aéroport à l'heuthe annoncée ni n'tout. Chutte fais j'tions quâsi trais quarts d'heuthe en r'tard viyant tch'i' fallait attendre nouot' tou à prendre vol. Sans doute il a fallu êt' assis dans l'avion en temps pour prendre vol à l'heuthe annoncée, et ch'est d's arrêts d'même tchi sont enn'yants. Mais, arrivés à destinnation, et tout dans l'même jour, ch'tait mangnifique dé vaie les faches souôriantes dé deux d'mes fréthes, Fraînque et Jim, à m'attendre à l'aéroport dé Detroit, dans l'Etat d'Michigan.
Comme d'amors, j'ai tchitté Jèrri sans aver ieu l'temps d'vaie touos m's anmîns à la dreine minnute pour lus dithe “à la préchaine”. Ch'est d'même touos l's ans. J'mé met dans l'idée dé n'aver pon autchun engagement duthant les deux dreines sémaines pour êt' libre d'aller vaie touos l's anmîns, mais i' s'arrive tréjous tchiquechose tchi tchulbute mes plians et j'finnis tréjous par mantchi d'aller vaie tchique anmîn. Es cheins qu' j'ai mantchi d'vaie j'fais mes estchuses, et j'lus asseûthe bein sîncéthement qué ch'n'est pon manque d'amiêtchi d'ma part. Et j'attends fête dé r'vaie touos m's anmîns l'année tchi veint - si j'en vai l'heuthe.
Comment qu' j'ai trouvé l's affaithes ichîn en Améthique? Eh bein, i' n'pathaît pon y'aver ieu grand changement duthant m'n absence dé chîn mais en Jèrri. Comme en Jèrri y'a d's êlections en allant chu mais dans l'Etat d'Michigan. Mais ch'n'est pon si aîsi pour lé chein tch'a à voter comme en Jèrri, car i' faut tch'i' vote pour eune quarantaine dé candidats et d'difféthentes rêsolutions tchi couvrent tout l'êtat. Parmi les candidats y'a d'bouans Louothièrs (Républicains) et d'bouans Rosièrs (Démocrates), et si nou veurt voter pour lé miyeu candidat à la pliaiche dé voter pour lé Louothi ou la Rose v'la tch'i' vouos fait êprouver à voter correctément eune quarantaine dé fais!
En pâlant d'êlections, dévant tchitter Jèrri, j'vis dans la gâzette qué l'Seigneu d'Rôzé, Moussieu Lempriéthe-Robîn, s'en allait tchitter comme Député d'St. Martîn. J'en ai grand r'gret car ch'est des mêssieux d'san calibre tchi nouos faut dans L's Etats - du monde d'êducation et d'îndépendance. Et j'espéthe qué l's êlections s'en vont aver l'avis dé ré-êlithe lé fanmeux Sénateu Cyril Le Mèrquand pour tch'i' piêsse continnuer à souangni d'nouos finnances dans L's Etats.
I' fait un temps supèrbe ichîn - pus caud tch'i' n'faîsait en Jèrri la s'maine pâssée, mais jé n'm'attends pon qué v'la tchi s'en va duther longtemps car ch'est un temps hors dé saîson.
I' m'sembl'ye qué j'sis dans un aut' monde dépis m'n arrivée. Les grand' larges rues et “express motorways” sont un vrai contraste à man p'tit Jèrri où'est qué j'tais à marchi dans les p'tites ruettes lé tou du vièr Ménage, en c'mîn pour St. George, i' n'y'a qu' huit jours, et ou'est qué j'viyais souvent les belles vaques à man vaîsîn Moussieu Percy L'Masuthi en c'mîn pour lus pâtuthe. Et i' n'y'a pon 'couo bein longtemps qué j'tais à m'régaler auve un fricot d'mouaithes lé long des fossés, et tch'i' fallait quâsi m'cliuter dans l'fossé pour laîssi pâsser les motors.
Et j'pense ès séthées pâssées trantchilement d'vant l'feu dans la grande âtre dans la salle du Ménage auve lé Docteu Fraînque Le Maistre comme compangnon - un compangnon idéal - sans télévîsion à nouos badrer la tête. Ichîn i' n'pathaît pon naturel d'êt' sans télévîsion à vouos aîdgi à siéthe les êvènements du jour dépis l'matîn jusqu'au sé. Pourtant, mes pensées sont acouo pus en Jèrri qu' ichîn ches jours. I' m'sembl'ye qué j'ai laîssi eune partie d'mé là-bas. Ch'est comme si j'tais à rêver et qué j'm'en vais m'rêvilyi et m'trouver dans eune nouvelle démeuthe. Mais i' n's'en va pon m'prendre longtemps à m'accouôteunmer à vivre d'dans!
George d'La Forge
Viyiz étout: