Trenton, Michigan,
U.S.A.
Lé 8 dé novembre, 1969.
Moussieu l'Rédacteu,
Eh bein, m'èrvéla en Améthique! Lé viage dé Jèrri à Londres par avion fut rapide. L'année passée, j'eus la chance d'êt' assis à côté du charmant Connêtabl'ye Edgar Reynolds Mouothant d'La Trinneté, mais ch't année jé n'vis pèrsonne qué j'connaîssais à bord du Vanguard ouaithe qué toutes les pliaiches 'taient otchupées - chose tchi m'pathut r'mèrquabl'ye pour lé preunmyi d'novembre!
I' faut êt' capabl'ye d'marchi dêliêment sus ses pids d'driéthe ches jours quand nou viage par avion, car les distances entre lé point d'attèrrissage et l'chein d'embèrquément pour eune aut' destinnation dans les grands aérodromes (comme lé chein d'Heathrow à Londres) allouangnent touos l's ans. Ch'est vrai qu'eune beusse vouos porte du point d'attèrrissage à un bâtiment tchelconque, mais arrivés là eune janne fille, habilyie dans l'costeunme officiel dé l'aérodrome, vouos dit d'suivre les èrchelles sus les muthâles et les lampes êlectriques tchi mènent, en fîn d'compte, au conteux mèrtchi International transfers. Pour y'arriver i' faut marchi l'travèrs d'un tas d'corridors ou pâssages jusqu'à qu'nou sé d'mande si nou-s-est sus l'bouan c'mîn. Enfin, nou-s-arrive au point înditchi, et en présentant l'titchet d'pâssage nou r'chet eune carte vouos autorisant d'aborder l'avion transatlantique en temps et lieu, et montrant l'nunmétho d'la hèche tch'y mène.
Auprès ch'la, ch'est eune affaithe dé s'assiéthe à baithe des tassées d'thée dans la salle d'attente (y'en a tchi baivent de tchi pus fort!) et êcouter les vouaix dans les hauts-parleurs pour annoncer l'heuthe pour aborder l'avion. J'ai tréjous d'la peine à les comprendre, ches vouaix-là, viyant tch'i' pâlent trop haut et trop vite. Et pis, auve lé catchet qu'nou ouait, viyant qu'eune foule dé monde sont à lus entre-pâler en mème temps, ch'est un vraie bayayas, et j'mé sis souvent d'mandé comment dgiâtre qu'nou f'thait s'nou 'tait dans un aérodrome en Russie ou aut' pays où'est qué l's annonces sont faites dans eune langue qu'nou n'connait pon! En fîn d'compte, en gardant l's ouïes ouvèrtes et alèrtes nou finnit par ouï l'annonce voulue, et nou r'quémenche la marche lé long des corridors tchi n'pathaissent pon aver d'fîn, jusqu'à qu'nou vait l'nunmétho d'la hèche annoncée. Chutte fais-chîn nou s'trouve à l'entrée d'l'avion, et eune belle janne fille vouos souhaite la beinv'nue et vouos condit à la tchaise de tchi l'nunmétho est înditchi sus vouot' titchet.
Dans l'Boeing 727 transatlantique y'a des pliaiches pour chent septante pèrsonnes, quarante-quatre en preunmié clâsse et l'reste pour les pouorres gens. La seule difféthence est qu'en preunmié clâsse les tchaises sont à deux, côte à côte, dé châque côté, et y'a pus d'run à s'bouogi qué dans la clâsse êconomique ou'est qu'les tchaises sont en rangies d'trais d'châque côté. L'allée, dans l'mitan, va tout l'long d'l'avion. Nou peut réglier l'voleunme d'air fraid qu'nou veurt îndividuellement en touannant un p'tit bouton tch'est d'amain en d'ssus d'chaque tchaise. Eune fais confortabliément assis, nou peut liéthe, hoûter, dormi ou rein n'faithe duthant les sept heuthes tchi faut pour arriver à Boston dans L'Êtat d'Massachusetts, où'est tch'i' faut d'valer pour passer l's autorisés d'la douanne et d'l'immigrâtion.
À bord de l'avion, nou peut ordonner chein qu'nou veurt comme litcheu à baithe, mais i' faut payi pour. Autrément, l'café et l'thée et les r'pas - et i' vouos sèrvent des fanmeux r'pas - sont înclius dans l'prix du pâssage. Eune bouanne chose en allant par avion est tch'i' n'est pon bésoin d'donner des pourboires. Quand nou-s-additionne lé couôtage dé transport par train, moto ou beusse pour aller ès ports dé New York ou d'Montréal pour crouaîsi la mé par baté; les taxis, les nyits a l'hôtel dévant s'embèrtchi, les pourboires à bord duthant la grand' partie d'la s'maine tch'i' faut pour navidgi l'Atlantique, les mèmes frais en arrivant à Hantonne et d'vant aborder l'avion ou l'stînme pour Jèrri, nou trouve qué v'la tchi couôte milieu marchi d'y aller par avion d'ichîn!
Enfin, m'èrvéla arrive dans l'Nouvieau Monde sain et sauf (Dgieu mèrci) acouo eune fais. Ch'est mèrveilleux comment qu'nou s'accouôteunme à tout, et qué quand l'viage est finni et qu'nou s'trouve parmi des gens qu'nou connait, i' vouos sembl'ye qué nou n'avait pon tchitté l'pays. Mais pour dé mé, jé n'peux pon m'empêchi d'penser à touos les bouans anmîns qu'j'ai laîssi en Jèrri et tchi m'ont 'té si bouans et av'nants, et tch'i' m'font tréjous la beinv'nue quand j'y arrive. Et j'pense ès séthées passées au pid du feu dans l'âtre d'la salle au Ménage ès Feuvres auve lé fanmeux Fraînque Le Maistre comme compangnon, et v'la tchi m'fait penser, étout, qué m's anchêtres pour tchiques chents ans pâssaient lus séthées à r'garder l'feu dans la mème âtre, et tch'i' baillaient d'lus becque dans la mème vielle langue Jèrriaise qué j'faîsons tréjous sèrvi l'Sieur Le Maistre et mé! Et j'aspithe dêjà l'moment dé r'tou au Ménage l'année tchi veint si j'en vai l'heuthe!
George d'La Forge
Viyiz étout: