Moussieu l'Rédacteu,
Un viage dé 1,500 milles en moto à travers d'La Floride et d's États d'Alabama, Mississippi et d'La Louisianne, et d'deux chents milles - pus ou mains - d'la frontchièthe de ch'Êtat-là, allant ouest, m'am'nit à San Antonio, vielle ville Espagnole-Mexitchaine et pus tard Améthitchaine. Ichîn, auve nouos belles grand' routes, nou fait un viage dé même aisiement dans trais jours.
À San Antonio, i' fait caud dans l'mais d'dézembre comme en êté en Jèrri. Nou pouorrait quâsi dithe qué ch'est l'êté toute l'année au Texas, ch'est-à-dithe dans la partie du sud, car l'Êtat est grand et i' n'y fait pon aussi caud dans l'nord comme dans l'sud, mais il y fait bein pus caud partout en êté qu'en hiver. Tchiquesfais, des vents d'nord v'nant des Montangnes Rocheuses du Canada et passant par dessus les pliaines des Dakotas en c'mîn vèrs lé sud, abattent la chaleu, et les gens, accouoteunmés au caud clyimat, craient tch'i' fait fraid quand la tempéthatuthe est entre chînquante et souoxante dégrés! Mais v'la tchi n'duthe pon longtemps. Deux ou trais jours au pus, et pis l'bieau temps r'fait s'n appathence.
Dans les rues d'la ville, nous s'créthait au Mexique ou en Espangne. Ch'n'est pon drôle quand nou veint à considèther qu'ya ieu au mains siex couleurs tch'ont volé au haut du mât dans la ville - les couleurs d'Espangne, dé France, du Mexique, dé La Republique dé Texas, des Êtats Confédérés du temps d'là dgèrre civile, et d's Êtats-Unis d'Améthique!
En 1500 - et même dévant chu temps-là - San Antonio 'tait un village appelé La Villita et l's habitants 'taient d's Indgiens Mexitchains dé la tribu Cohuiltécan. L'histouaithe nouos raconte qu'en 1691 l's Espangnos tch'avaient fait la contchête du Mexique avaient des soudards dans l'village. Quarante ans pus tard, tchînze fanmiles Espangnoles des Îles Canaries y fûdrent êtabl'yies par lé Rouai d'Espangne, et pour eune chentaine d'années la colonie fut gouvèrnée par les Espangnos. Par chu temps-là, l's Indigiens dé la tribu Comanches de l'Améthique du Nord c'menchîdrent à combattre l'înfiltration Espangnole. En sé d'fendant contre ieux, l's Espangnos perdîdrent un tas d'hommes. Lé temps vînt qu'l'Espangne s'affaibl'yit et lé Mexique en prînt avantage et dêcliathit s'n îndépendance en 1823. À ch't êpoque-là, San Antonio d'vînt partie du Mexique.
Ch'tait dans ches temps-là qué l's Améthitchains c'mmenchidrent à s'êtabl'yi dans la contrée. Les Mexitchains n'aimaient pon ch'la. Y'avait d'la discorde. Un Améthitchain pèrdait la vie d'temps en temps, mais v'la tchi n'les faîsait pon abandonner la partie. L's affaithes empliéthîdrent dé pus en pus, et en 1836 lé Président Santa Anna du Mexique env'yit eune armée dé 4,000 soudards pour les chasser d'San Antonio. L's Améthitchains lus r'bînfrîdent, mais i' n'avaient qu'chent chînquante soudards et i' n'avaient pon d'chance dé gangni eune batalle contre 4,000 Mexitchains. I' pèrdaient d's hommes à chaque rencontre, et les survivants finîdrent par lus r'narder dans eune mission Catholique-Romaine appelée l'Alamo, fondée en 1718 et convèrtie en fortérêsse pus tard. I' mênagîdrent à lus d'fendre du 23 d'févri jusqu'au 6 d'mar, et i' pathaît qu'seize chents Mexitchains fûdrent tués dans chu temps-là, mais la p'tite bande d'Améthitchains finit par êt' machacrée. Lé bâtisse dé l'Alamo et s'n enclios ont 'té restaurés d'nouos jours, et ch'est à ch't heu un musée dans tchi nou peut vais les r'liques d'armes et d'êffets d'chu temps-là. Dans l'mais d'avri d'la même année (1836), le Coronel Sam Houston rassembl'yit assez d'soudards Améthitchains pour combattre l'armée Mexitchaine et il eut sa r'venge. I' les bâttit comme i' faut dans eune pliaiche appelée San Jacinto - pas bein liain dé l'Alamo - et l'Texas fut nommé iun d's Êtats-Unis.
A ch't heu, quand nou marche dans les rues d'San Antonio nou vait Améthitchains et Mexitchains touos mêlés ensembl'yes et appathemment heutheurs et prospèthes souos la couleu d's Êtats-Unis.
En Jèrri, ch'est c'mode de saver l'Angliais et l'Français. Ichîn ch'est l'Angliais et l'Espangno qu'nou ouait partout. Fraînque Le Maistre es'sait un fanmeux compangnon à aver auve sé, li tchi pâle la langue Espangnole et tchi la connaît mus qu'un tas d'Jèrriais n'connaîssent lé Jèrriais!
Dans la campangne ichîn l'tou, nou vait des vaques Jèrriaises, mais j'en vis eune drôle l'aut'jour. Oulle 'tait grise - un gris quâsi blianc - et avait eune pathe dé longues ouothelles tchi pendaient quâsi sus san musé. Jé d'mandis à un gas tchi sorte dé vaque que ch'tait. I' m'dit qué ch'tait eune Brahmane des Îndes mêlée auve eune Jèrriaise et eune vaque dé Texas, et qu'nou l's appellent des “Texas-Brahmanes”. I' pathait qu'ch'est un raide bouan mêlange - un tas d'viande et un tas d'lait par vaque! Enfin, tout est mêlé en Améthique : les races, les flieurs, l'architectuthe et même les vaques! Ch'est p't êt' ieune des raisons qu'un peupl'ye est dev'nu si grand et si fort dans l'couothant d'chent chînquante ans!
George d'La Forge.
Viyiz étout:
