Fort Lauderdale,
Florida, USA.
Lé 27 dé janvyi, 1979.
Moussieu l'Rédacteu,
J'tais bein întérêssi d'liéthe, dans la gâzette du sept dé dézembre, qué Moussieu Staples, dé Swindon, en Angliéterre, avait visité Madanme Ertu L'Gros à Paspédgia. Sén homme, lé Sieur Arthur Le Gros, tch'était l'agent prîncipa pour Robin, Jones & Whitman, successeurs dé la vielle compangie dé Robin, Collas et Compangnie, quand j'visitînmes La Côte, Moussieu Philip M. de Veulle et mé, y'a tchiques années, mouothit au c'menchement d'l'année pâssée. Lé Sieur Staples nouos dit tch'il 'tait président d'la compangnie. Quand j'tions à Paspédgia, l'Sieur de Veulle et mé, ch'tait John Le Breton, fis Thomas, tch'était président. Jé n'savais pon tch'il avait 'té rempliaichi par lé Sieur Le Gros. Un charmant moussieu, Arthur L'Gros. Il avait 'té né en Angliétèrre dé pathents Jèrriais. J'pense qué san p'pèe 'tait cap'taine dé navithes.
Moussieu et Madanme Le Gros 'taient hardi hospitalièrs et j'eûnmes des bouannes séthées siez ieux. J'm'èrsouveins tch'i' nouos montrîdrent des portraits d'lantèrne magique du feu tch'avait dêtruit un tas des bâtîments des Robîns sus les runs dans la grève dé Paspédgia. I' nouos invitîdrent à dîner pus d'eune fais, et j'eûnmes lé pliaîsi dé l's aver à dîner auve nous dans l'hôtel où'est qué j'tions à d'meuther et tch'était, dans san vivant, lé domicile officiel dé Moussieu Eugène Auguste Albert Bouillon duthant sa gestion comme agent prîncipa. Madanme Le Gros 'tait organiste dé l'Eglyise Anglyicanne dé St. Pierre dans l'temps d'nouot' visite.
Eune belle églyise modèrne et bâtie en briques, St. Pièrre. Lé Sieur Eugène Lyndon Bouillon, ARIBA, décédé l'annèe pâssée étout (fis du bouanhomme Moussieu) 'tait s'n architecte. L'églyise précédente, qué j'avais connue étout, avait 'té dêtruite par un feu. Dans l'chînm'tchièthe, y'a un tas d'Jèrriais. Ou pouvez vaie lus noms dans man livre “Jèrri Jadis.” Iun tchi m'veint prîncipalement à l'idée est l'janne Francis Hamon d'Portînfer tchi s'en fut à Paspédgia en 1914. I' jouaingnit l'Armée Cannadgienne et fut prîns malade en bèrrexes à Halifax, Nouvelle Ecosse, et y mouothit. I' fut entèrré dans un coin du chînm'tchiéthe à Paspédgia et j'ai 'té vaie san tombé bein des fais. San nom est sus l'tombé d'fanmil'ye dans l'chînm'tchiéthe parouaîssial dé St. Ouën étout. Et cèrtains des noms mentionnés dans l'articl'ye “Under the Clock” dans la gâzette du 7 dé dézembre sont probabliément sus les tombieaux là ou à d'aut' églyises sus La Côte. Comme clèrcots des Robins i' lus trouvaient apprentis ichîn et là lé long d'La Côte.
J'tais content d'liéthe qué l'Sieur Hedley Miché, tchi s'en fut lá en 1904, est acouo du rang des vivants. J'lé connais tout à fait bein. J'soulais aller l'vaie toutes les fais qué j'allais là-bas. En êffet, i' dait aver dans les nénante ans. J'n'en sis pon bein liain mé-même! J'ai souvent 'té siez ieux quand sa bouannefemme 'tait vivante. Nou trouvait tréjous la beinv'nue dans lus caûminne.
I' n'dait pon y'aver bein d'Jèrriais, nés en Jèrri à La Côte à ch't heu. Un aut' à Paspédgia tchi dait aver dans les nénante ans est Arthur Ollivier, aut'fait du Ouaîsné, à St. Brelade. À New Carlisle, y'a l'Cap'taine Frank Le Gresley, fréthe dé Madanme James Le Bro des Châtaingniers à St. Ouën. Un Jèrriais distîndgi tch'a pâssé eune longue vie d'sèrvice à sus vaîsinné comme officyi d'police (“Sheriff”) et Juge dè Paix. I' dait aver d'l'âge étout. I' fut soudard dans les deux grand dgèrres dans l'Armèe Cannadgienne et d'vînt Cap'taine. J'feûnmes èrchus à bras ouvèrts siez li, lè Sieur de Veulle et mé. J'lé rencontrînmes dans l'office du Juge Duguay et j'dêcouvrînmes, en cours dé convèrsâtion, qué l'Juge avait des “Jersey Weekly Posts” dans s'n armouaithe auve mes lettres en Jèrriais d'dans. Ch'est assez întérêssant què New Carlisle est lé lieu d'naîssance du fanmeux René Lévesque, Preunmié Minnistre dé la Provînce dé Tchubec, tch'est en trains d'êprouver à s'pather la provînce du resté dé Cannada.
Un aut' vièr Jèrriais à La Côte, né en Jerri à Ste. Mathieu ou à St. Jean, est Douglas Bathette. Il 'tait en chèrge dé la boutique ès Robîns dans l'village (eune ville à ch't heu) dé Bonaventure et finnit par l'acater. I' la fit valer pour bein d's annèes. J'pense tch'il est r'tithé d'affaithes à ch't heu. I' dait aver pus d'nénante ans. Un anmîn tchi l'visitit l'êté pâssé m'dit tch'il 'tait en mangnifique santé.
Quand j'y pense, à La Côte v'là tchi m'fait envie d'y r'aller vaie les Jèrriais tch'y d'meuthent!
George d'La Forge
Viyiz étout: