Les Pages Jèrriaises

Changement d'pâtuthe!


Trenton, Michigan,
U.S.A.

Lé 3 d'mai, 1969.

Moussieu l'Rédacteu,

M'èrvéla dans l'Michigan! Auprès la chaleu d'un pays caud comme La Floride, ch'est comme si nou 'tait dans un aut' monde quand nou-s-y r'veint, au Michigan, tch'a li-mème pus d'un clyimat. Y'a acouo d'la mé dans la partie nord, mais ichîn, près d'Detroit, lé temps est pus doux, ouaithe qué nou n'peut pon l'compather à la chaleu d'La Floride. La riviéthe dé Detroit, tchi s'pathe l'Êtat d'Michigan dé La Province d'Ontario au Cannada, a un mille dé laize. Ou' c'menche dans l'lac St. Clair et dêbouche dans l'Lac Erie, tchi n'sont pon beinliain iun d'l'autre, mais i' pâsse pus d'navithes dédans qué nou n'créthait - i' pathaît qu'ch'est iun des pus grand pâssages dé navithes au monde! Ieune des raisons est qu'un tas d'navithes chèrgis d'minnérai d'fé du nord du Michigan y pâssent pour s'en aller dêchèrgi ès ports dé l'Êtat d'Ohio. Lé minnérai finnit san c'mîn par "freight train" pour les grand' fabriques dé fé dans l'Êtat d'Pennsylvanie. Et pis, étout, la rivièthe est partie du fanmeux "St. Lawrence Seaway" tchi va jusqu'à la mé.

Ch'est intérêssant d'vai les changements d'clyimat et d'pâtuthe en travèrsant l's Êtats-Unis du sud allant nord lé travèrs dé La Floride, Georgie, Tennessee, Kentucky, Ohio et l'Michigan. En Floride, les bouais sont vèrts et nou vait d'la vèrduthe partout. Sans doute, la grand' partie des bouais sont des palmes - un tas à cocannettes, et i' sont tréjous vèrts. À m'suthe qué nou veint par amont dé Miami, nou vait des troupieaux d'vaques à paître trantchilement dans d's êtendues ênormes tch'étaient "jungle" et ieauseux l'temps passé (l's "Everglades" en angliais) mais tch'ont 'té r'couvèrtes dé néthe tèrre apportée d'autres Êtats. Quand nou c'menche à vaie chutte contrée-là, nou sait bein qu'nou-s-appréche du nord dé La Floride.

La tèrre est rouoge dans l'Êtats d'Georgie, et quand nou vait eune mathe dans les clios ou l'long d'la route, l'ieau d'dans est rouoge. Quand j'ttais dans l'Kenya en Afrique l'année passée, j'èrmertchi qu'la tèrre dans chu pays-là 'tait rouoge étout. Lé temps est acouo caud en Georgie, et les bouais et les clios sont vèrts, et v'la tchi continnue d'mème jusqu'à passé l'Tennessee. Ch'est là qu'nou c'menche à travèrser les montangnes. Dévant arriver à Knoxville, les "Great Smokies" sont à drouaite. Lus travèrsée est tchiquechose qu'nou n'oublie janmais eune fais qu'nou l'a faite. Les routes sont pavées et supèrbes, mais les dêtours sont âpres - jé l's appelons des "Hair-pin bends" - et nou-s-est à d'valer et ramonter des routes apiques sans r'lâche pour des longues distances et i' sembl'ye qué nou n'en finnit janmais!

Lé long des routes dans l's Êtats du sud, nou vait des "busards" et des "vautours" à d'vorer les carcasses d'annimaux tués par les motos la niet - des cats et des tchians, et des bêtes sauvages comme des êtchutheurs, "opossums", "ratons laveurs", putouais, tchilieuvres, etc. Dans des temps, quand nou-s-est en moto, nou vait eune grand' néthe taque dans la route un mille l'avant à sé, et justément d'vant en appréchi, la taque dispathaît en l'air et y'a les restes d'tchique annima où'est qu'la taque était - eune taque tch'était eune fliotte dé busards à s'régaler - et eune fais l'moto passé, si nou r'garde driéthe sé, nou les vait r'voler dans la route et s'èrmett' à mangi! I' sont souos protection d'la louai viyant tch'i' sont les routchièrs des pays cauds. Autcheune viande sauvage né reste pon en plaiche longtemps dans les routes sans faithe un bouan r'pas pour ches ouaîsieaux rapaces-là, et ch'est eune mannièthe êconomique et sannitaithe pour l's autorités d's'en dêbarrasser!

Nou-s-est quâsi dans l'êtat d'Kentucky dévant laîsi les montangnes drièthe sé. Dans par-là, les bouais 'taient vèrts, mais nou c'menche à les vaie nus, et nou n'vait prèsque pon rein d'vèrt autcheun bord. ch'est sîngne qué nou-s-appéche du nord et du temps frais, si pon frais. Par lé temps qu'nous-arrive dans l'Êtat d'Ohio, i' n'y a pon sîngne dé fielles sus les bouais, et nou vait qu'lé r'nouvé n'a pon 'couo caûffé chutte contrée-là fort.

Y'a tout d'mème eune rêcompense en arrivant au Michigan. Là, j'èrtrouve man fréthe Fraînque et j'pouvons bavarder en Jèrriais d'St. Ouën et reunminner au sujet des dreines nouvelles dans la gâzette dé Jèrri. Y'a tréjous tchitchun qu'nou connaîssait dans la colonne des décès, et tchiquesfais nou r'grette dé vaie l'nom d'tel et tel qué nou-s-avait l'întention d'aller vaie la dreine fais qu'nou 'tait en Jèrri, mais qu'nou n'avait pon peut l'faithe à la drein munnute! V'la tchi s'arrive toutes les fais qu'nou-s-y va, en Jèrri, et la tragédie en est qué l'nombre des vièrs anmîns dînminnue douos l's ans. V'la tchi nouos ramémouaithe qué j'sommes nouos-mèmes chanceurs d'êt' du rang des vivants, l'Fraînque et mé, ouaithe qué j'avons dêpassé l'âge promînse. Et j'espéthons pouver acouo mangi bein des bollées d'soupe dé caboche en Jèrri, et aller à la pêque auve lé Sieur Bill Carré, dévant nouos embèrtchi pour lé viage tchi n'a pon d'èrtou!

George d'La Forge

 

Viyiz étout:

 

Les Pages Jèrriaises