Trenton, Michigan,
USA.
Lé 23 d'avri, 1977.
Moussieu l'Rédacteu,
M'èrvélà dans l'nord, tchînze chents milles pus près d'Jèrri, mais j'en sis acouo un fichu but. J'ai trouvé l'temps ichîn pus bé que jé n'm'attendais dé l'vaie à ch't' êpoque, mais j'n'en sis pon ravi. J'sis pèrsuadé qué l'clyînmat du continent a changi. Les bouais sont acouo sans fielles, mais nou c'menche à les vaie bourgeonner et l'solé est dêhalé la grand' partie du jour. Auve mes fréthes Fraînque et Jim à ma rencontre à l'aéroport dé Detroit, et la fille à Jim, sén homme et sa fille, ch'tait comme eune rêunion d'fanmil'ye en arrivant. Et la s'maine tchi veint m'vèrra en c'mîn pour lé Cannada en visite siez man fréthe Sydney et ma soeu Emily et lus fanmil'yes dévant m'en aller pâsser l'êté dans l'vièr Ménage ès Feuvres en Jèrri.
J'ai trouvé la gâzette du dgix d'mar à m'attendre en arrivant à Michigan, et la preunmié chose qué j'ai veu sus la page dé d'vant est qué l'êcole dé St. Aubîn s'en va rester ouvèrte et qué les St. Aubinnais en sont extâsiés. Tant mus pour ieux. Ch'est vrai qu' ch'est pus pliaîsant d'pouver aller à l'êcole dans l'vaîsinné qué d'aver à aller un but, p't-et' dans eune aut' pâraisse.
Quand j'vai dans la gâzette qué touos les travailleurs et empliyés des fonctions publics sont tréjous à r'chéver des hauchissements d'gages, v'la tchi m'fait penser ou' j'éthais deu rester en Jèrri à la pliaiche dé m'en v'nîn pâsser ma vie en Améthique. Ch'est seux qué jé s'sais riche à ch't heu si j'y'avais resté, car les gages hauchissent tréjous appathement sans qu' l'ouvriyi ait à travailli pus dû pour. Mais ch'est l'contraithe pour lé pouôrre fèrmyi. I' n'y'a qu' li tchi resté driéthe. I' faut tch'i' paye tréjous pus pour la main d'oeuvre et pour san louage dé solyi pour garder ses patates pour la pliante, et pour sa machinn'nie et payi coue et ouothelles pour tout ch'tch'il acate à la boutique, mais i' né r'chait janmais pus pour ses rêcoltes si l'înjuthe du temps lî pèrmet d'en craître. Eune faillie drinnette gângne souvent pus dans un an dans eune office en ville qu'un fèrmyi fait d'profit dans la saison. Et ch'est d'même d'un gratteux d'routes étout. Ch'est ravissant qu'autcheune pèrsonne a l'couothage dé continnuer à fèrmer.
Acouo quatre nouvieaux avocats dans La Rue ès Trais Pigeons. Chutte fais les pigeons s'en vont aver fort à faithe pour sé garder au ras du nombre. Et penser tch'il' eûdrent l'honneu d'aver la rue nommée d'même pour trais d'ieux. À ch't heu, il' éthont à garder lus distance et vaie la rue èrnommée La Rue ès Avocats si l'affaithe continnue.
J'n'ai pon ieu l'honneu d'connaître ches nouvieaux Avocats, mais j'ai connu lé grand-grand-péthe à l'Avocat Messèrvy, lé Juge Alfred Messèrvy dé mémouaithe respectée. Et j'ai connu san papa étout. J'lé viyais souvent quand j'allais à Brabant à La Trinneté. I' d'meuthait d'l'aut' côté d'la route. Et j'eus l'honneu d'rencontrer san p'pèe, l'Professeu Messèrvy, siez l'Connêtabl'ye (pus tard Juge) Francis Le Boutilyi, à Highfield à St. Ouën y'a eune trentaine d'années. Et si, J.J. 'tait vivant i' s'sait bein ordgilleux d'vaie san n'veu Ian assèrmenté Avocat, car i' m'disait dans san vivant qu' Ian 'tait brilliant comme homme dé louai. À touos les quatre jé souhaite bouanne chance et un tas d'clients.
Vouot' articl'ye d'fond dans la gâzette du dgix d'mar bliaûme lé Conmité des Travaux Publics pour n'aver pon amendé la situâtion du mauvais rond dans l'Mont d'La Haule à St. Brélade, mais i' y'a rêellement un bein simpl'ye èrmiéde sans aver à faithe un tas d'frais. Ch'est faithe tout l'monde réduithe la vitesse dé lus motos à vîngt milles à l'heuthe dans l'mont. J'ai fait bein des viages à bord l'mont dé la beusse ava et amont chu mont, et j'ai tréjous 'té êmèrvilyi d'la seûtheté d'la manniéthe qué l'cacheux d'la beusse, en mauvais comme en bieau temps, cachait dans l'mont sans s'faithe dé bile, tout sîmpliément en allant à p'tite vitesse et auve soin. Ch'est la vitesse tchi finnit tréjous par tchulbuter les motoristes dans l'pré, mais i' n'pathaît pon y'aver mouoyen d'lus cachi ch'là dans la cahueûle. Mettez tout l'monde à l'amende tchi cachent en d'ssus d'vîngt milles à l'heuthe dans chu p'tit but d'mont-là. V'la tchi né f'tha pon pus d'chîn minnutes dé difféthence dans l'temps tch'i' faut pour aller en ville. Ch'n'est qu' un p'tit but, et i' n'y'étha pon d'accidents. Ch'est la vitesse tchi tue. La preuve en est qué la réduction d'vitesse à chînquante-chîn milles à l'heuthe la pétrole, a réduit la mortalité d'un tchièrs dans les routes du pays!
George d'La Forge
Viyiz étout: