Les Pages Jèrriaises

Ottawa

Cannada Ottawa, Ontario,
Cannada.
Lé 27 dé novembre, 1976.

Moussieu l'Rédacteu,

J'm'èrsouveins qué quand j'tais mousse en Jèrri ch'tait rare qué nou viyait d'la né. Et la preunmié chose qué nou voulait faithe quand il en v'nait 'tait d'en prendre eune poingnie à deux mains et en faithe eune balle pour pitchi sus tchitch'un d'amain. Eune aut' chose qué nou-s-aimait faithe, prîncipalement si ch'tait dans les temps d'Noué, 'tait un bouanhomme dé né, et pis l'astitchi atout des balles dé né. Mais à m'n arrivée au Cannada dans l'mais d'novembre dé 1919, dé tchi j'vouos pâlais la s'maine pâssée, j'trouvis qué ch'tait împossibl'ye dé faithe des balles dé né ichîn car oulle est si g'lée et poudrée qu'ou vouos tchait l'travèrs des dés.

J'pesnais à ches bieaux jours dé man janne temps en r'gardant eune grande êtendue d'la ville d'Ottawa par la f'nêtre dé l'appartènement à ma soeu Emily tch'est au vîngt-unième êtage d'un grand bâtisse "gratte-ciel". Un spectacl'ye supèrbe tchi vouos fait penser ès portraits d'campangnes et d'églyises couvèrtes d'né qué nou vait sus les cartes d'Noué. Les liefs dé toutes les maîsons et bâtisses, et les p'louses sont bliancs. Les rues c'menchent à pèrdre lus bliancheu à m'suthe qué les rouelles des motos êcrâsent la né. I' fait fraid, mais nou n''s'en appèrche pon dans les maîsons viyant tch'il' ont l' "chauffage central" tchi les gardent caudes tout l'hivé.

L'aut' sé j'eus la chance d'aller à la Cathédrale Anglyicanne d'Ottawa. Ch'tait eune occâsion spéciale. Chînq Diacres fûdrent ordonnés Prêtres, et la cathédrale 'tait plieine. J'vouos asseûthe qué ch'tait mangnifique dé vaie tant d'monde à l'églyise en mème temps, et y'a ieu tant d'changements dans l's églyises à ches drein, pon seulement dans l'Églyise Anglyicanne mais dans l'Églyise Romaine étout, qué j'tais un mio tchuthieux d'vaie s'i' y'en avait ieu ichîn au cannada.

I' y'avait un Archévêque et deux Êvêques auve les Minnistres driéthe la Crouaix en procêssion en entrant dans l'Sanctuaithe. L'Archévêque est r'tithé d'san diocèse et s'pâsse lé temps en aîdgant à l'Êvêque d'Ottawa. L'Êvêque dé Niagara prêchit l'sèrmon. Ch'tait dans chutte Cathédrale d'Ottawa qué l'défunt Recteu d'St. Brélade et Vice-Douoyen William George Tabb, dé mémouaithe respectée, fut ordonné Prêtre par l'Archévêque Roper tch'était à la tête du dicèse quand j'arrivis au Cannada et qué j'vîns à connaître bein. Dans chu temps-là, lé Révérend Tabb 'tait Recteu d'eune pâraisse dans la campangne pas bein liain d'ichîn, et i' v'nait nouos vaie à la maîson quand i' v'nait en ville. Il avait 'té ordonné Diacre dans l'Églyise d'Almonte, à eune trentaine dé milles d'ichîn, où'est qué l'Sieur Edouard Le Maistre, dé la fanmile dé La Carriéthe, à St. Ouën, d'meuthait dans san vivant.

Ches mémouaithes du temps pâssé mé v'naient dans l'idée dans la cathédrale en attendant pour l'sèrvice à c'menchi, et j'pensais à touos ches changements dans l'rituel et les sèrvices dé l'églyise à ch't heu, et j'mé d'mandais tch'est qu'Monseigneu Roper et l'Révérend Tabb, touos les deux au r'pos êtèrnel, en pens'saient s'i' pouvaient r'vénîn.

Ieune des preunmié choses qué j'm'appèrchus 'tait qué l'Livre d'Cantiques 'tait un nouvieau livre adopté par un conmité d'gens d'l'Églyise Anglyicanne et dé la "United Church", tch'est eune congrégâtion d'gens Méthodistes, Presbytériens et Congrégâtionalistes, et qué j'n'y trouvis pon fort dé cantiques qué j'connais. J'en trouvis quand-mème iun des cheins composés par lé défunt Seigneu Athelstan Riley d'La Trinneté en Jèrri. Moussieu Riley en composit eune demié-douzaine ou pus tchi sont dans l'"English Hymnal" qué j'faîsions sèrvi à l'Églyise dé St. Simon dans man janne temps.

Iun des changements tch'il' ont adopté dans la cathédrale est d'aver les Minnistres lus mâter driéthe l'autel et en fache dé la congrégâtion pour célébrer la Sainte Cène, comme i' font dans l'Êglyise Romaine à ch't heu. Et i' font sèrvi la Nouvelle Bibl'ye et nou-s-a d'la peine à r'connaître lé langage modèrne des Êpitres et Êvangiles dans l'sèvice.

Les changements sont dév'nus en ordre et les vièrs consèrvateurs comme mé, tch'ont 'té accouôteunmés ès vièrs sèrvices dé l'Églyise pour eune huiptantaine d'années, en ont horreu. Né v'la ieune des raîsons qué v'la tchi m'fait tant d'plaîsi d'pouver vaie la Sainte Cène célébrée comme i' faut à l'Abbaye d'La Lucèrne en Nouormandie et quand j'sis à l'Églyise St. Barnabé ichîn à Ottawa, et à l'Églyise dé la Sainte Vièrge à New York. Mais ch'est si liain d'Jèrri!

George d'La Forge

 

Viyiz étout:

 

Les Pages Jèrriaises