Les Pages Jèrriaises

Les Noms d's Êtats d's Êtats-Unnis d'Améthique

 

Nou sait bein qu'Nouvieau Jèrri r'chut san nom d'not' île dé Jèrri quand l'Rouai Charles II donnit des tèrres en Améthique du Nord auSire George Carteret.

Ch'est bein cliai étout qué l's êtats d'Nouvieau York et Nouvieau Hampshire fûtent nommés pouor des pliaiches en Angliétèrre - ou au mains l'Nouvieau York fut nommé étout pouor lé Duc dé York.

Y'a d's êtats dé tchi l'nom fut înspithé par des gens: par exempl'ye, des membres d'la Fanmil'ye Rouoyale d'la Grande Brétangne. J'avons dêjà mentionné l'cas d'Nouvieau York, mais y'a étout la Georgie (en honneu du Rouai George II), les Carolinnes (lé Rouai Charles I), Maryland (tèrre à Mathie - la Reine Henriette Mathie, bouannefemme du Rouai Charles I), et Virginnie (la Reine Lîzabé I 'tait mênommée la Reine Vièrge).

La Louisianne fut nommée pouor l'Rouai d'France coumme dé raîson - mais létché? L'Rouai Louis XIV.

Y'a des pèrsonnes tchi n'sont pon rouoyales muchies dans les noms d's êtats étout. William Penn, lé péthe du fondateu d'la colonie, fut ramémouaithé dans l'nom d'Pennsylvannie, et Délaware pouôrrait bein nos faithe penser à un pataouarre: lé Sire Thomas West, Baron De La Warr, donnit san nom à eune riviéthe et à san tou chu nom fut donné à la colonnie. L'êtat d'Washington, bein seu, prînt san nom du preunmié Président d's Êtats-Unnis.

L'Îndianne fut nommée pouor les Îndgiens - les Pieaux-Rouoges coumme nou dithait à chu temps-là.

Y'a d's êtats tch'ont prîns lus nom d'difféthentes langues - même lé Latîn, coumme nou vèrrait dans l'cas d'Montana tchi veurt dithe montangneux. Nevada veurt dithe couvèrt d'né, la Floride ramémouaithe la Pâques flieuthie, et Colorado s'explyiqu'thait par la couleu rouoge d'la riviéthe d'la contrée - touos les trais en Espangno. Pouor les Jèrriais, il est bein întérêssant d'èrmèrtchi qué l'Vèrmont est vraînment l'vèrt mont. Ché s'sait-i' du Nouormand?

Mais l'pus grand nombre des noms veinnent des langues îndgiennes. I' n'est pon tréjous cèrtain tch'est qu'lé nom sîngnifie pa'ce qué l'nom a 'té changi en s'transféthant entre l'Espangno, l'Angliais et tchiquefais l'Français étout.

Coumme ou viyiz, bouannes gens, y'a d'l'histouaithe dans ches noms-chîn, et pas seulement auve not' vièr Nouvieau Jèrri!

 

Alabama
Alaska
Arizona
Arkansas
Califournie
Carolinne du Nord
Carolinne du Sud
Colorado
Connecticut
Dakota du Nord
Dakota du Sud
Délaware
Floride
Georgie
Hawaii
Idaho
Illinnouais
Indianne
Iowa
Kansas
Kentucky
Louisianne
Maine
Maryland
Massachusetts
Michigan
Minnesota
Mississippi
Missouri
Montana
Nebraska
Nevada
Nouvieau Hampshire
Nouvieau Jèrri
Nouvieau York
Nouvieau Mexique
Ohio
Oklahoma
Orégon
Pennsylvannie
Île dé Rhode
Tennessee
Texas
Utah
Vèrmont
Virginnie *
Virginnie du Vouêt
Washington
Wisconsin
Wyoming

 

 

* Notez la vèrsion Vrégine faite sèrvie dans un texte dé 1847: Eune lettre dans Le Constitutionnel 1847

 

Viyiz étout:

 

Les Pages Jèrriaises