Fort Lauderdale,
Florida,
USA.
Lé 29 dé dézembre, 1979.
Moussieu l'Rédacteu,
À ch't heu qué l'festîn d'Noué est pâssé, nou peut r'prendre sén haleine et r'quémenchi à vivre trantchilement d'un jour à l'autre. Ichîn, en Améthique, ch'est l'dgiâbl'ye à confêsser d'êprouver à boutitchi les dreins jours dévant Noué même. Nou dithait qu' tout l'monde a laîssi l'acat d'présents pour mett' souos l'arbre d'Noué à la dreine minnute. Et si les grand' pèrsonnes ont enm'né les mousses auve ieux à boutitchi ch'est un vraie sodôme dans l's allées du supèrmarchi. Les mousses veulent paûtchi l's objets sus l's ais qu' les pathents n'ont autcheune idée d'acater. Souvent l'mousse vait tchiquechose tchi lî fait envie, et i' l'met dans l'pangni à sa m'mèe. Ou n's'en appèrche pon dans l'temps, et quand veint l'temps d'payi à la sortie et qu' ou l'vait, ou s'décide généralement d'payi pour et n'en dithe rein dé peux qu' les gens n'la ouaie êt' rêponnue âprément par lé mousse s'oulle êprouve à lé r'prînmander. Les mousses sont honteusement gâtés ichîn, et i' n'y'a pon telle chose comme la disciplinne tch'est si nécessaithe pour former l'caractéthe des jannes.
I' pathaît qué l'manque dé disciplinne dans nouos êcoles est tèrribl'ye. Les mousses, en général, sont affrontés à l'êgard dé lus maîtres et maitrêsses, et les pathents prannent lus part s'i' y'a des pliaintes. J'connais des maitrêsses tchi m'ont avoué tch'il' ont peux d'êt' assaûtées par les garçons dans l's êcoles s'gondaithes s'il' êprouvent à les disciplinner. J'mé d'mande tchi sorte d'hommes qué chutte drôle dé condite s'en va donner à l'av'nîn?
Ch't' année n'a pon 'té ieune des miyeuthes pour l'Améthique. Àu moment actuel j'sommes en êtat d'gêne national pour les chînquante pèrsonnes en ôtage dans nouot' ambassade en Iran par un vilain moussieu tchi s'appelle Khomeini - et tchi bliâme l'Améthique pour touos les maux d'san pays. Eune mangnifique estchuse pour empêchi san monde dé vaie qu' ch'est en êtat d'esprit dé dictateur tch'i' gouvèrne. Et i' bliaûme lé Shah en exile pour êt' du même esprit. Jé n'savons pon s'il a raîson. Pour nous, lé Shah 'tait à êprouver à modèrniser sans pays. Dans l'entrétemps, la Russie, alèrte et malinne comme eune chouette, prend avantage du troubl'ye en agrandissant l'nombre d'ses troupes dans l'Afghanistan à côté!
Et j'sommes en êlection. J'criyais qué l's êlections en Jèrri 'taient întérêssantes quand j'tais janne, et qué ch'tait eune batâle couôteuse entre lé Louothi et la Rose viyant qué l'parti gângnant 'tait l'chein tchi pouvait faithe lé pus d'vieaux. Ichîn? Ouaithe qué la gestion du Président Carter s'en va duther jusqu'au mais d'Novembre dé l'année tchi veint, j'avons dêjà c'menchi à aver nouos gâzettes et la télévision plieinnes dé bargouêchîn d'politiciens et d'aut' ambitieux îndividus tchi voudraient otchuper La Blianche Maîson à Washington, et i' s'en va faller enduther ch'la pour onze mais d'temps!
Et ch'n'est pon seulement l'embête d'aver à êcouter toutes les promêsses dé ches amateurs dé politique, des promêsses tchi sont împossibl'ye d'accomplyissement et tchi n'sont janmais gardées par les gângnants, mais v'là tchi couôte eune forteune - des sou env'yés à la route. Lé gouvèrnément y contribue en donnant eune somme êgale à la cheinne qué l'candidat peut tcheûter pour li-même - à eune cèrtaine, mais génétheuse, lînmite. Mais pour un vièr Jèrriais comme mé, tch'a 'té êl'vè en Jèrri à sauver et à couoyi, ch'est un grand péché d'dêpenser des sou du contribuabl'ye pour des êlections d'gens tchi sont supposés êt' en office pour sèrvi et protégi l'publyi.
Enfîn, nouos v'là sus la fîn d'eune aut' année tchi s'en va beintôt êt' partie d'l'histouaithe du temps pâssé. Nou vait quand même un mio d'changement par les c'mîns dépis l'drein preunmié jour dé l'an. Par exempl'ye, les grands motos à huit cyclîndres c'menchent (à la fin du temps) à êt' rempliaichis par des pus p'tits. Mais ch'est acouo les p'tits motos fabritchis à l'êtrangi - au Japon prîncipalement - tch'en gângnent, affaithe dé chouaix. Eune bouanne chose est qué la vitesse des motos, réduite à 55 milles à l'heuthe pour consèrver la pétrole, a raptichi l'nombre d'fatalités par accident dans les routes. Lé temps pâssé, nou s'attendait à mille pèrsonnes tuées duthant trais jours dé fête comme à Pâques et à Noué. Les trais jours tchi veinnent dé s'pâsser nouos ont apporté siex chents fatalités seulement, ch'est en tchi nou peut dithe qu' à tchiquechose malheur est bouan. Espéthons qué la Nouvelle Année s'en va apporter l'bonheur à tous!
George d'La Forge
Viyiz étout: