Lé Menage ès Feuvres,
St. Ouën.
Lé 4 juilet, 1970.
Moussieu l'Rédacteu,
Quand j'tais au Texas j'viyais un tas d'dgi dans les bouais, et v'la tchi m'faîsait penser à la saîson d'Noué en Jèrri quand j'tais mousse et qu'nou-s-en viyait pendu au haut d'la porte du parleux dans la maîson. V'là tchi vouos donnait pèrmission d'embraichi les filles tchi pâssaient d'ssous, et nou n'mantchait pon l'occâsion d'en prendre avantage s'i' y'avait eune janne fille là qu'nou-s-aimait bein!
I' pathaît tch'i' y'en avait, du dgi, sus les pommièrs en Jèrri l'temps passé, mais jé n'mèrsouveins pon d'en aver veu. Au Texas, et cèrtainement dans cèrtains d's aut' Êtats dans la partie sud dé l'Améthique, nou-s-en vait tant dans les bouais qu'les gens tch'en ont sus lus propriêtés ou dans lus gardîns lus abûsent à l'coper hors, dé peux tch'i' mange trop d'la sève du bouais. J'en ai quand même veu, des bouais, tch'en 'taient surchèrgis, d'dgi, et i' n'pathaîssaient pon en dangi d'pèrdre d'sève et d'en créver.
La couôteunme d'embraichi les filles souos l'dgi n'pathaît pon aver fait san c'mîn dans l'Nouvieau Monde. J'ai passé plusieurs Noués ès Êtats-Unis et au Cannada dans l'couothant d'ma longue vie, et j'n'ai janmais veu ch'là s'y faithe. Ch'est danmage, à m'n idée, car ch'tait eune couôteunme qué j'aimais bein quand j'tais janne en Jèrri. Nou dgettait tréjous pour êt' d'amain du dgi quand nou viyait la janne fille tchi vouos pâssait près du tchoeu en appréchi, et pis nou prannait soin d'êt' à l'êcart quand ch'tait les cheinnes tchi n'pliaîsaient pon!
Y'a pourtant ieu des couôteunme et des choses Jèrriaises tch'ont 'té continnuées en Améthique par les Jèrriais tch'y v'naient dans les vièrs temps. Y'a, par exempl'ye, lé nièr beurre. Ch'est vrai tch'i' n'est pon connu souos chu nom-là en Améthique dé nouos jours. L's Améthitchains d'à ch't heu l'appellent du Beurre dé Pommes ("Apple Butter"). La preunmié fais qu'j'en vis dans eune boutique là, j'mé d'mandis si ch'tait par chance tchiquechose comme du nièr beurre dé Jèrri, en j'en acatis eune pottée. Lé billet tchi montre lé prix et l'nom d'fabrique disait net et cliai qué ch'tait fait atout du cidre et des pommes, et l'contenu avait absolûment la mème appathence et l'mème goût qué l'nièr beurre dé Jèrri. Nou peut don penser qué ch'tait des Jèrriais tchi fûdrent les preunmièrs à en faithe dans l'Nouvieau Monde, car jé n'crai pon tch'il est connu en Angliétèrre, et j'n'en ai pon veu dans d'aut' pays.
Ieune des grosses têtes d'Améthique a eune originne dé fanmile Jèrriaise étout - l'Ambassadeu John Cabot Lodge. Ch'tait un Cabot d'Jèrri tchi vînt à La Nouvelle Angliétèrre et tch'êtablyit, à Boston, la fanmile d'aristocrates dé chu nom-là - dé tchi tch'il a 'té dit qué les Lowells (eune aut' fanmile aristocrate) né pâlaient qu'ès Cabots, et qu'les Cabots n'pâlaient qu'au Bouan Dgieu! Malheutheusement, lé nom a dispathu d'la lîngne pâtèrnelle dé chutte fanmile-là, mais l'Ambassadeu est un dîngne d'scendant du côté mâtèrnel, et est r'connu comme un vrai moussieu et un homme d'êtat d'grand' capacité.
Et pis i' n'faut pon oublier qu'Jèrri a donné san nom à iun d's Êtats d'Améthique - lé New Jersey - et qu'ieune dé ses villes a l'nom l'pus illustre et fanmeux d'Jèrri, lé nom dé Carteret. Et i' faut donner l'crédit au fanmeux moussieu d'chu nom-là tchi fut si louoya à san Rouai qué lé Rouai (Charles II) lî donnit l'tèrritouaithe tch'a honoré l'nom d'Jèrri dans l'Nouvieau monde!
Eune drôle dé chose est tch'i' n'y a pon fort d'Améthitchains tch'ont ouï pâler d'l'Île dé Jèrri, et un tas tch'en ont eune cèrtaine connaîssance né savent pon dans tchi partie du monde qu'oulle est! Quand nou lu pâlent dé Jèrri, i' craient tréjous qu'ch'est l'Nouvieau Jèrri qu'nou-s-entend, mais i' n'savent pon dé ioù qué l'nom est provenu. Par contre, i' savent tous tch'i' y'a eune fanmeuse vaque dé chu nom-là et qu'ou donne lé miyeu lait du monde, et j'finnis par lus dithe qu'oulle est ma couôsinne gèrmaine!
Sans doute, L'Améthique est si grande qué nou n'peut pon rencontrer touos les Jèrriais, ou lus d'scendant, tch'ont fait lus c'mîn dans l'pays. Quand nou viage dédans, nou n'a qu'à r'garder dans les directouaithes du téléphone pour vaie des noms tch'ont tchique èrsembliance ès noms Jèrriais. J'en trouvis iun au Texas, eune fais, enregistré comme "Morant". Il' 'tait iun des grands dans la comptabilité dans l'office dé l'Armée des Airs. J'allis l'vaie et i' m'dit qu'ses anchêtres 'taient des Barbenson Mourants d'Jèrri mais tch'i' né l's avait pon connus - li et san péthe ayant 'té nés au Texas.
Un autre qué j'allis vaie eune fais au Texas 'tait un Biard. Ch'tî-là crait tch'il 'tait d'scendu des "Baird" d'Êcosse et qué l'nom avait 'té changi à Biard par mêprînse. Av'ous janmais ouï pâler d'Biards en Êcosse? Quant à mé, i' m'sembliait tch'il avait la philonmie Nouormande - et j'ai dans l'idée qu'ses anchêtres 'taient d'Jèrri et tch'i' n'lé savait pon!
George d'La Forge
Viyiz étout: