Ottawa, Ontario,
Cannada.
Lé 5 dé novembre, 1977.
Moussieu l'Rédacteu,
Né v'la trais s'maines dépis qué j'tchittis Jèrri mais i' m'sembl'ye qué ch'est trais mais, et pourtant j'm'accouôteunme aisiement au changement d'pâtuthe! Et m'èrvélà à la même pliaiche où'est qu' j'arrivis dans l'Nouvieau Monde y'a chînquante-huit ans chu mais d'novembre - Ottawa, la belle capitale du Cannada. Chînquante-huit ans! Et j'avais dêjà 28 ans (en 1919) dans chu temps-là et j'avais 'té l'travèrs d'eune dgèrre.
Tchi m'éthait dit en arrivant à Ottawa en 1919 qué j'allais êt' là acouo 58 ans pus tard, j'éthais ieu d'la peine à l'craithe. Et j'éthais ieu d'la peine à envîsagi la ville comme oulle est à ch't heu atout ses mangnifiques auto-routes, tchi vouos pèrmettent dè crouaîsi la ville entchiéthe à souoxante milles à l'heuthe en moto sans arrêter. Et atout ses gratte-ciels dé bâtisses tchi vouos ramémouaithe les grandes villes dé l'Améthique. Sans doute, j'sommes en Améthique, car lé Cannada est partie d'l'Améthique du Nord.
Il 'tait paîsibl'ye y'a 58 ans, lé Cannada. Cannadgiens Angliais et Français vivotaient à côté l's uns d's autres en paix rélative. L's univèrsités d'la provînce dé Tchubec êdutchaient des prêtres pour l'Eglyise Catholique Romaine, d's êcrivains et d's avocats. Dans l's aut' provînces, l's univèrsités êdutchaient des îngénnieurs, des mécaniciens et des compteux - les vocâtions nécessaithes pour condithe les grand' maîsons d'conmèrce. Ch'tait don pûtôt l's Anglais-Cannadgiens tch'étaient à la tête des maîsons d'conmèrce et d'îndustrie en Tchubec - au dêpiet des Tchubécouais.
Dans les grandes villes dé toutes les provînces y'aver des vaîsinnés d'belles propriêtés otchupées par les Cannadgiens d'souche Angliaise, et dans la provînce dé Tchubec ch'tait à bein près l'même cas étout. À Ottawa, tch'est dans la provînce d'Ontario mais sus la frontchiéthe dé Tchubec, lé vaîsinné Français-Cannadgien 'tait pauvre à compather et 'tait appelé Lower Town (Basse Ville en Français). Mais l's Eglyises Catholique Romaines 'taient, et sont acouo, belles et abondantes dans chu vaîsinne-là. À ch't heu, la tendance est, comme à St. Hélyi en Jèrri, d'abattre les vielles boutiques et les vielles maîsons, et les rempliaichi par des grand' cârrées baraques et des gratte-ciels, et les basses villes dispathaîssent un mio à la fais.
Les provînces du Cannada, comme les êtats des Etats-Unis d'Améthique, ont lus gouvèrnément et lus Preunmié Minnistres îndividuelles, et l'atmosphèthe paîsibl'ye dé y'a 58 ans est disteurbé pour lé moment par lé fait qué l'Preunmié Minnistre dé la provînce dé Tchubec veurt sépather la provînce du reste du Cannada. Il est en France et veint d'êt' nommé à un haut grade dé la Légion d'Honneur par lé Président dé la République Française. L'affaithe est pûtôt envîsagie comme un affront au reste du Cannada par lé gouvèrnément à Ottawa, viyant qu' la régl'ye est tch'i' faut tch'i' s'sait consulté officiellement par autchun pays êtrangi dévant décorer iun d'ses citouoyens. I' pathaît qué l'affaithe s'en va êt' distchutée dans la Chambre des Commeunes iun d'ches jours.
Chutte tchestchion dé s'pathation d'Tchubec au reste du Cannada avait dêjà 'té endêvée duthant la visite du Général de Gaulle, Président d'la République Française, quand i' finnit iun d'ses discours à Montréal en dîsant: Vivre le Tchubec libre! Lé Preunmié Minnistre à Ottawa dans chu temps-là, Moussieu Lester Pearson, rêponnit par dîsant qué Tchubec est, en êffet, libre dépis tch'i' jouit dé toute la libèrté qu' eune provînce peut s'attendre souos un gouvèrnément fédéral, et même pus tch'i' n'pouôrrait aver comme un départément d'la France, et qué lé Cannada eut à subithe eune pèrte d'hommes et d'trésor pour libéther la France du joug des Allemands dans deux dgèrres!
La drôle dé chose est qué ouaithe qué ch'est un avantage dé saver deux langues, et qué les Tchubécouais ieux-mêmes profitent au moment actuel du fait tch'i' sont considéthés bilîngues et tch'il' en r'tithent l'avantage dé pus hauts grades et salaithes dans l's offices du gouvèrnément (lé Civil Service) à Ottawa, i' veulent însister sus l'ûsage d'eune seule langue dans lus provînce. I' n'pathaîssent pon rêalîser qué dans ieune ou deux généthâtions d'înstruction dans lus êcoles en Français seulement, i' n'pouôrront pus r'cliâmer d'êt' bilîngues.
Y'a tchiques années, en viage dans lus provînce, j'arrêtis à mangi dans un restaurant et j'dis à la sèrvante: Pourquoi ne pas parler l'Anglais et prendre avantage du commerce touristique des Américains? Bah!, ou rêponnit. Qu'ils apprennent le Français, eux autres! Né v'la lus attitude. Est-ch' ravissant tch'i' sont restés arriéthés?
George d'La Forge
Viyiz étout: