Abbaye de La Lucerne,
Normandie.
Lé 24 dè juin, 1978.
Moussieu l'Rédacteu,
Dans man livre “Jèrri Jadis” j'disais qué L'Anse au Griffon, à La Côte, avait nom d'même viyant qu' un navithe dé chu nom-là y'ancrait souvent. J'tais hardi întèrêssi dans l'anse viyant qué l'Sieur Ernest Bertram, pus tard dé Seymour House, à Grouville, et à ch't heu dé mêmouaithe respectée, 'tait gérant là pour les Robîns la preunmié fais que j'y'allis.
Un p'tit livre publié à l'occasion du chent'naithe dé l'anse nouos raconte eune légende tchi nouos dit qué san nom d'originne 'tait “Gris-Fond”. Y'avait, pathaît-i', un creux l'long d'la côte dans tchi un ouaîsé appelé Griffon d'meuthait. Il 'tait gris partout l'corps - dépis la becque jusqu'ès griffes. Y'avait eune chorchiéthe par les c'mîns et oulle enchorchélit l'ouaîsé et lî halit eune plieunme et la fliantchit à la mé. Lé fond d'la mé, tch'était brun, fut touânné gris par la plieunme du Griffon, et v'la tchi lî donnit l'nom dé Gris-Fond. La chorchiéthe fut tuée par un êpart dé feu.
Lé grand-péthe au Sieur Emile Lé Seelleur, d'auteur du livre d'chent'naithe dé l'anse, fut né à St. Hélyi lè 18 dé juin, 1847. Il 'tait fis dé Charles Le Scelleur, bâtisseux d'navithes; et dé Sophie Esther Jeandron, sa femme.
I' s'en fut à La Côte pour les Fruïngs et travaillit dans lus runs à Grande Grève, Mont Joli, Grande Vallée et Cloridorme. À Grande Vallée i' d'meuthit en pension siez un nommé Jean Baptiste Caron tch'avait eune pétite fille dé deux ans nommé Josephine. Ou d'vînt sa femme en 1876.
Il avait 'té convèrti à la r'ligion Catholique Romaine en 1873, probabliément au moment d's'engagi à Mdlle. Caron. Dans l'couothant d's annés l'changement d'r'ligion s'arrivait à plusieurs Jèrriais tchi s'enmouothachaient d'jannes filles Cannadgiennes-Françaises. I' n'y'avait pon assez d'Jèrriaises par les c'mîns.
I' pathaît tch'i' n'y'avait pon hardi d'Jèrriais à l'anse. Les Robîns y bâtissîdrent eune boutique vèrs les 1880. Ch'tait eune belle grand' boutique, mais l's affaithes né marchaient pon trop bein pour les Robîns et i' la freunmîdrent auprès tchiques années. I' pathaît qu' les Boutillièrs et les Fruïngs 'taient là d'vant ieux et jouissaient d'la pus grande partie du conmèrce dé la contrée. Enfîn les Boutillièrs, à lus tou, décidîdrent dé vendre lus run et les Robîns l'acatîdrent et r'vîndrent à l'anse.
En 1916 ch'tait les Fruïngs tchi lus décidîdrent dé vendre et ch'tait Charlie Bartlett tchi l's acatit, 'mais i' freunmit boutique au but d'un coupl'ye d'années. Les Robîns 'taient acouo là quand j'allis vaie l'Sieur Ernest Bertram, probabliément dans les 1940. J'pense tch'i' fut l'drein gérant en chèrge d'la boutique, mais jé n'sai pon quand tchi qu' ou fut abandonnée par les Robîns.
Ouaithe qué les Jèrriais n'ont pon 'té nombreux à l'Anse au Griffon il' ont quand-même laîssi du sang Jèrriais parmi les Cannadgiens-Français tch'y d'meuthent. Le preunmyi mentionné dans l' “album” du chent'naithe est un nommé Philippe Perry. Il 'tait probabliément un Pèrrée. Il 'tait v'nu là d'vant 1814. Le vielle fanmil'ye Dumaresq est r'présentée par lé Sieur Emery Dumaresq, tchi vînt en Jèrri auve sa danme y'a un coupl'ye d'années et s'fît à connaître au Docteu Fraînque Le Maistre. L' “album” nouos dit qué l'preunmyi Dumaresq là s'mathyit à Delphine Desprez à La Riviéthe au R'nard en 1857, et san fis Georges fut l'péthe dé Joseph tchi d'meuthe à l'anse à ch't heu. Lé Sieur Emery d'meuthe à La Riviéthe au R'nard.
Jean Pipon, né en Jèrri en 1829, arrivit à l'anse vèrs 1850. Il 'tait fis dé Jean Pipon et dé Jeanne Selous. I' mathyit Justine Synnett en 1853 auprès aver touânné Catholique Romaine. Il' eûdrent huit êfants. Il avait eune bouanne êducâtion et fut l'preunmié “Maire” dé l'anse. Et pis y'a la fanmil'ye Le Scelleur dé tchi lé Sieur Emile est lé r'présentant.
D'aut' Jèrriais tchi d'meuthîdrent là dans l'couothant d's années fûdrent des Dolbel, Sorsoleil, Oliver, Bertram et probabliément tchiques autres. Ch'est r'mèrquabl'ye comme la duthe vie à La Côte dans chu temps là n'êffritait pon les gens tchi voulaient y'aller. En fîn d'compte, eune dgaîngue dé pèrsonnes dé difféthentes nâtions finnissaient par s'accorder et s'entre souot'nîn en advèrsité comme en prospéthité. Il' 'taient v'nus d'France, d'Angliétèrre, d'Irlande, d'Ecosse, d'Italie et d'Jèrri. À c'menchi, y'avait des diffitchultés d'langage, et i' n'avaient pon les mêmes couôteunmes. Hardi n'pouvaient liéthe ni êcrithe. I' vivaient dans des conditions d'pauvrété înconnues au jour d'aniet. Mais ch'tait probabliément chutte duthe vie tchi lus donnait l'înspithâtion d'pèrsévéther et d'rêussi.
George d'La Forge
p>
Viyiz étout: