Trenton, Michigan,
U.S.A.
Lé 24 d'octobre, 1970.
Moussieu l'Rédacteu,
M'èrvéla parmi l's Améthitchains! Lé viage par air dé Jèrri à Londres, et d'Londres à Boston, dans L'Massachusetts, se fit enc alme et vitesse - dans chu cas-chîn à 35,000 pids en d'ssus d'l'Atlantique, et j'tais à baithe du thée siez man fréthe Fraînque à Trenton, dans L'Michigan, lé mème jour qué j'avais dêjeuné en Jèrri!
Duthant l'heuthe d'arrêt à Boston j'avais quâsi envie d'aller châtchi d'main auve lé fanmeux John Cabot Lodge d'scendant des Cabots d'Jèrri - s'il 'tait siez-li - mais j'pensis au diton Améthitchain tchi nouos dit qué Les Lowells (eune fanmile aristocrate) né pâlent qu' ès Cabots, et les Cabots n'pâlent qu' au Bouan Dgieu!, ch'est en tchi j'décidis tch'i' valait p't êt' mus l'laîssi trantchil pour lî donner la chance dé pâler au Bouan Dgieu. I' pathaît tch'il est un charmant moussieu, et je n'sis pon ravi tch'il est en bouan rapport auve L'Êtèrnel!
Nou m'a souvent d'mandé si nou trouve lé viage long dans l'air, et à tchi qu'nou pense quand nou-s-est là haut. Eh bein, dé Jèrri à Detroit, Michigan, nou peut dithe tch'i' faut dans les dgiex heuthes - eune heuthe dé Jèrri à Londres, sept heuthes dé Londres à Boston, eune heuthe d'arrêt là, eune autre heuthe dé la à Detroit. Ch'n'est pon rêéllement hardi longtemps quand nou pense à la distance. Quant à mé, i' n'm'ennyie pon fort dans l'air, et j'ai l'pliaîsi d'penser qué j'm'en vais r'vaie ma fanmile en Améthique et au Cannada auprès eune absence dé chînq mais.
Et pis j'pense à man chièr Jèrri et ès gens qué j'vein d'tchitter, et j'ai un r'mords dé conschienche pour n'aver pon assez r'mércié m'n anmîn L'Académicien Frainque Le Maistre pour s'êt' lévé d'vant l'aube du jour pour v'nîn m'porter à l'aërodrome en Jèrri en temps pour aborder l'avion d'bouan matîn pour Londres, et jé n'pouorrais les r'mèrcier assez, li et sa danme, pour m'aver nouôrri duthant mes dreines sémaines dans l'Île pour mé donner pus d'temps à m'promener et faithe mes adieux ès anmîns. Et j'pense à la bouanté d'touos ches anmîns-là et à la beinv'nue tchi m'attend tréjous siez ieux.
J'n'oublis pon, ni n'tout, à penser ès anmîns tch'ont passé l'trépas duthant man séjour dans l'Île - la chiéthe Tante Vine dé Portinfer, entr'autres - et v'la tch'i' m'fait penser au confort qué L'Bouan Dgieu nouos donne quand, dans S'n églyise militante au Dînmanche, nou-s-arrive à La Préface dans La Sainte Eucharistie et qu' nou joint la vouaix auve les cheinnes des pathents et anmîns trépassés et tchi sont dans L'Eglyise Triomphante dans L'Rouoyaume des Cieux, en chantant : C'est pourquoi, avec les Anges et les Archanges, et avec toutes les armées des cieux, nous louons et nous magnifions Ton Nom glorieux, T'exaltant continuellement et disant Saint, Saint, Saint, Seigneur Dieu des armées, les cieux et la terre sont remplis de Ta gloire!
Et j'pense ès êvenèments d'l'êté passé en Jèrri. À la visite dé Sa Grâce L'Archévèque dé Cantorbéry, au privilège dé l'aver rencontré fache à fache et châtchi d'main auve li. À san mangnifique sèrmon à l'occâsion d'la célébration d'La Sainte Cène à Springfield - eune occàsion tch'éthait deu attither au mains dgiex mille pèrsonnes mais tchi à nouot' honte comme Anglyicans, n'en attithit pon pus qu' à bein près deux mille, chînq chents!
J'pense, étout, ès conditions d'la vie en Jèrri tchi n'ont pon amendé - point d'veue d'traffi d'motos dans les rues et d'malfaiteurs par les c'mîns - tch'ont tellement agrandi l'travas d'La Justice qu'un deuxième Juge a ieu à êt' nommé pour jugi les cas d'vant La Cour de Police Correctionnelle, et tch'il est dév'nu nécessaithe dé bâti eune pus grande prison! Ou'est tch'est la trantchilité du Jèrri d'ma jannèche? Et i' n'faut pon oublyier la gourmandise des syndicats travaillistes tchi m'nichent tréjous la grève en preunmié lieu à la pliaiche d'en dreine èrsource et tchi r'tchule lé progrès à la pliaiche dé l'avanchi, et tchi fait tréjous l'couôtage dé la vie augmenter! Et la pliainte des gens d'la ville quand i' faut payi deux sou d'pus pour eune pînte dé lait et tch'i' n'vaient pon qu'les fèrmièrs sont oblyigis d'vendre lus troupieaux d'vaques viyant tch'i' n'sont pon payis assez pour lé lait!
Eune chose tchi m'fait penser, étout, est dé où'est qu' les sou qué l's Êtats autorisent à dêpenser s'en vont v'nîn. Lé fait qué l'Senateu Cyril Lé Mèrquand mênage à les trouver m'fait penser tch'i' peut faithe des mithacl'yes!
J'pouorrais p't êt' continnuer à penser à tchiquechose pour trouver à r'dithe, mais i' faut qué j'm'arrête. Y'a des choses pliaîsantes en Jèrri étout, et ieune dé ches choses-là est qu' Moussieu Harrison mé pèrmet d'vouos êcrithe en Jèrriais, et tch'il a la bouanté d'publiyer - en Jèrriais étout - les rapports des rêunions d'L'Assembliée d'Jèrriais. I' méthite bein qu'nou li diche Mércie bein des fais, Moussieu Harrison!
George d'La Forge
Viyiz étout: