Trenton, Michigan,
U.S.A.
Lé 13 dé novembre, 1976.
Moussieu l'Rédacteu,
J'm'èrsouveins qué, y'a chînq ans, en rentrant en Améthique, j'mé d'mandais combein d'fais, à m'n âge, qué j'm'en allais pouver mett' ch't întitulement-là au haut d'ma lettre. Eh bein, j'mé d'mande acouo la mème tchestchion chînq ans pus tard! Et comme jé l'disais d'vant, i' n'y'a qué l'Bouan Dgieu tchi peut la rêpondre, et ch'est à mé d'espéther tch'i' m'pèrmett'ta d'aller r'vaie Jèrri acouo bein des fais.
La s'maine pâssée, arrivé en Jèrri auprès eune tchînzaine dé jours en Tèrre Sainte, j'pâlais du changement d'pâtuthe. Et j'peux à ch't heu r'pâler du changement d'pâtuthe qué j'èrtrouve dans eune aut' partie du monde auprès un viage dé trais mille milles à trente-chîn mille pids en l'air en d'ssus d'l'Atlantique dans l'mème jour.
L's anmîns en Améthique mé d'mandent si j'ai ieu r'gret d'tchitter l'pays natal. “Eh bein,” j'lus dis, “y'a l'pour et l'contre dans toutes choses, et y'a longtemps qu' j'ai adopté l'vièr diton Jèrriais tchi nouos dit tch'i' faut paître là où'est qu' nou-s-est fitchis. Ma fille, mes p'tits et arriéthe-pétits êfants, et touos mes fréthes et ma soeu sont ichîn et à La Côte. I' m'enn'yis d'ieux quand j'sis en Améthique. Ch'est en tchi j'ai prîns l'habitude dé d'meuther la maîntchi du temps ichîn et l'aut' maîntchi en Jèrri.”
Pour lé moment, j'pense à touos les bouans anmîns qu' j'ai laîssi driéthe en Jèrri, et jé d'mande ès cheins qué j'n'ai pon ieu l'temps d'aller vaie à la dreine minnute dévant m'en r'vénîn, dé m'pardonner et dé n'êt' pon mârris à mé. Ch'est tréjous la mème turlutte à la fîn d'man séjour dans l'Ménage ès Feuvres. Trop à faithe les dreins jours pour aller vaie l's anmîns pour lus dithe “à la préchaine!” et dans des temps aver à aller pus d'eune fais à la mème maîson viyant qu' nou-s-y trouve fache dé bouais quand nou-s-y va la preunmié fais, et pis mantchi d'aller en vaie un tas car lé jour tch'i' faut aborder l'avion arrive trop vite, et ch'n'est pon aîsi dé l'dêmettre à pus tard car nou-s-a r'tîns sa pliaiche assez longtemps à l'avanche pour pouver êcrithe en Améthique pour annoncer l'jour dé la sortie d'Jèrri pour êt' rencontré là.
Enfîn, j'èrmèrcie touos m's anmîns tchi m'ont 'té si bouans en Jèrri et prîncipalement les cheins qué j'n'eus pon l'temps d'aller r'mèrcier pèrsonnellement à la dreine minnute dévant m'en v'nîn, et j'lus asseûthe qué j'lus sis bein èrconnaîssant quand-mème.
Man viage dé Jèrri ichin par avion m'fît penser au viage dé Tel Aviv en Jèrri dreinement quand j'avais d'la bouanne compangnie auve mé qu' lé viage, ouaithe tchi duthit chîntch' heuthes en l'air, mé pathit court viyant qu' mes charmants compangnons d'viage en Tèrre Sainte 'taient lé tou d'mé. J'pensais en ieux quand j'tais tout seu d'ma sorte dans l'avion tchi m'am'nit 'chîn mardi pâssé, et j'mé d'mandais s'i' y'en avait d'entre ieux tchi m'avaient dêjà oublié. Quant à mé, j'n'oubliîthai janmais l'pliaîsi d'aver 'té en compangnie d'tchînze pèrsonnes tchi fîdrent lé viage en Israël si agriabl'ye.
Lé temps est bé, mais fraid, ichîn. Et l'solé lît d'bouan tchoeu. Iun d'ches jours j'm'en vais à Ottawa, au Cannada, à 500 milles d'ichîn, pour vaie man fréthe Sydney et ma soeu Emily et lus fanmil'yes tchi d'meuthent dans chutte belle capitale. Quand j'èrveindrai d'chu viage-là, i' s'sa temps - mème grand temps - d'm'en aller dans l'sud où'est qué l'solé lît et qué l'temps est caud, pour rêcaûffer ma vielle poutchie d'os.
À ch't heu qué j'sis d'èrtou en Améthique, j'pense bein qué j'dév'thais mé d'menter d's affaithes et du gouvèrnément du pays, prîncipalement comme j'allons aver un nouvieau Président dans la Blianche Maîson à Washington. Lé mus qué j'peux espéther est tch'i' n's'en va pon s'laissi m'ner par lé nez par les sŷndicats des travailleurs tch'ont 'té, en grande partie, la cause dé s'en êlection. Auve un Congrès du mème parti politique qué l'Président tchi s'sa assèrmenté dans l'mais d'janvyi tchi veint, i' y'a des chances qué nouos Jack Jones et aut' chefs dé syndicats s'en vont êt' à la hauteu d'lus pouver.
Eune chose tchi m'amûse hardi d'chu côté d'la mé est quand l's Améthitchains m'disent tch'i' dait couôter chi d'aver des rouais ou des reines à la tête du gouvèrnément Angliais. I' veint d'êt' décidé à Washington dé donner deux millions d'dollars au nouvieau Président pour couvri ses frais d'entrée à la Blianche Maîson, et un million d'dollars au Président actuel pour couvri ses frais d'sortie d'chutte fanmeuse maîson. Et tout ch'la pour couronner les frais d'êlection tch'ont couôté des millions d'dollars ès contribuabl'yes pour aîdgi ès candidats des deux côtés à couôrre lus “primaries” - mot Angliais pour les êlections - êtat par êtat du pays, pour chouaîsi les deux candidats pour lé siège présidentiel. Et v'la tchi s'fait touos les quatre ans. Et les ex-Présidents ont des pensions à vie tchi f'thaient envie à bein des rouais!
George d'La Forge
Viyiz étout: