Trenton, Michigan,
U.S.A.
Lé preunmyi d'mai, 1976.
Moussieu l'Rédacteu,
J'veins d'changi d'pâtuthe acouo eune fais, et chutte fais j'm'appréche dé Jèrri - ayant travèrsé L's Êtats-Unis du sud au nord. Dévant faithe lé viage annuel d'ichîn à Londres et en Jèrri, j'm'en vais aller vaie man fréthe Sydney et ma soeu Emily et lus fanmil'yes à Ottawa, la belle capitale du Cannada tch'est à chîn chents miles d'ichîn, et j'espéthe êt' en Jèrri l'preunmyi d'juîn.
En arrivant ichîn j'ai trouvé trais gâzettes dé Jèrri à m'attendre, et auprès aver r'gardé les décès - la preunmié chose qué j'fais tréjous - j'ai r'gardé les portraits. Deux, dans la gâzette du 11 dé mar, tchi montrent les gros creux dans Les Blianches Banques où'est qué l'sablion a 'té halé m'ont frappé du preunmié coup! La propôsition d'en remplyi iun dg'ieau pour en faithe eune deuxième mathe, lé f'thait cèrtainement pathaître mus que dé l'laîssi viède et à paitre ès coucous. Mais si ch'là s'arrive, j'espéthe qué la mathe né s'sa pon appelée “St. Ouen's Pond II”.
S'i' y'a eune chose tchi continnue à m'faithe pester, ch'est d'vaie qu' les gâzettes continnuent à appeler La Mathe au Seigneu “St. Ouen's Pond” quand oulle a un si bieau et vrai nom Jèrriais. J'ai tréjous ouï qué si nou-s-êprouve longtemps assez nou-s-arrive à la fîn du temps au rêsultat voulu, mais né v'la d's années qué j'en pâlle dans mes lettres et l'nom dé “St. Ouen's Pond” continnue à m'offenser châque fais qué jé l'vai dans la gâzette. Ch'tî-l'à et “Five Mile Road” pour La Grand Route des Mielles, sont des mênoms offensifs pour un St. Ouënnais. Y'a-t-i' autcheune espéthance qué vouot' gâzette, tch'a d'habitude eune si bouanne înfluence dans l'Île, prenge l'initiatif pour restaurer les bouans vièrs noms? Ma fîngre, lé nom d'Moussieu Meridian mé veint à l'idée. J'lé félicite pour sén annivèrsaithe dé vîngt-chînq ans, et en l'félicitant j'prends sus mé d'li d'mander d'en faithe mention dans sa colonne dé la gâzette. Lé fait qu' oulle est si populaithe est preuve qué les gens prannent avis à chein tch'i' dit d'dans. I' m'sembl'ye qué ch'est eune tragédie d'vaie des bieaux vièrs noms comme La Mathe au Seigneu et la Grand Route des Mielles dispathaître.
J'vai qué L's Êtats ont décidé d'payi sept mille louis à tchique souô-disant expèrt pour lus dithe tchi faithe dé La Baie d'St. Ouën. Tréjous du gaspillage dé sou pour donner ès êtrangièrs pour nouos avîser tchi faithe dé tchiquechose qué j'avons connu toute nouot' vie et qu' j'avons tréjous pensé qu' la miyeu chose à faithe est d'laissi la natuthe à s'en d'menter. Laissons don La Baie trantchil'ye pour qué j'piêssons joui d'sa bieauté naturelle. La béthie a fait un dangi pour lé piêton et l'motoriste la niet, et un profit pour les entrepreneurs d'entèrrements. Ch'est en tchi, à m'n idée, la preunmié chose à faithe est d'env'yer l's aubèrges siez l'Vièr Nic, ou au mains les freunmer à chîntch'heuthes l'arlévée, et empêchi l'êtablyissement d'autchun conmérce dans la baie et laîssi la natuthe l'embelli. Et v'la tchi n'couôtt'tait rein au contribuabl'ye. Mais ch'est eune solution tch'est trop sîmpl'ye. Dé nouos jours i' faut dêpenser. La vielle vèrtu Jèrriaise dé couoyer dispathaît en même temps qu' la langue dé nouos anchêtres.
En pâlant d's Êtats, en liêsant, dans la gâzette du 11 dé mar, l's ardgûments pour en contre au sujet d'la célébrâtion en Jèrri du bi-chent'naithe dé l'îndépendance des Êtats-Unis d'Améthique, j'tais întérêssi d'vaie qué l'Député Tanguy, dans san discours au sujet, dît tch'il avait 'té êtonné d'dêcouvri qué l's Améthitchains n'avaient en général autcheune connaîssance dé l'Île dé Jèrri. Lé Député a parfaitement raison. J'ai souvent mentionné la mème chose dans mes lettres. Pâlez à un Améthitchain d'Jèrri et i' crait qu' nou-s-entend New Jersey, car l's Améthitchains n'font pon sèrvi le “New” en pâlant dé New Jersey. I' disent tout sîmplyiément Jersey. J'ai souvent ieu à lus explyitchi qu' New Jersey a prîns san nom du vièr Jèrri. D'habitude, ch'est la connaîssance dé la vaque Jèrriaise tch'aîgue à êtablyi l'fait dé l'existance dé l'Île.
Quant à la célébrâtion du bichent'naithe Améthitchain dans l'Île, j'sis d'avis qué v'la tchi n'étha pon d'împortance ichîn en Améthique. I' n'y étha qu' les collecteurs dé tîmbres tch'en séthont autcheune chose, et à m'n idée ché s'sait danmage qué Jèrri éthait eune grande dêpense au sujet. J'n'oublis tout-d'même pon qué j'mé vieilis et qué ch'est probabl'ye qué vouos lecteurs dîsent: “I' r'dote, lé bouanhomme George!” Et tch'est tchi sait, il' ont p't-êt' raison!
George d'la Forge
Viyiz étout: