Trenton, Michigan,
U.S.A.
Lé 29 dé mai, 1976.
Moussieu l'Rédacteu,
J'veins d'èrchéver eune lettre dé Mdme. Françoise Le Guédard Turcotte tchi d'meuthe à Ste. Foy, près d'la belle et grande cité dé Tchubec, au Cannada. La lettre, env'yée au Ménage ès Feuvres en Jèrri l' 19 dé mar, veint dé m'trouver ichîn justément d'vant qué j'm'en r'âge dans l'Île.
Dans sa lettre, Mdme. Turcotte mé dit qu' oulle 'tait d's'appointée, mème attristée, d'n'aver pon veu l'nom d'san p'pèe, John Le Guédard, mentionnée dans l'chapitre entouôrre les Jèrriais à La Côte dans man livre “Jèrri Jadis.”
Eh bein, bouannes gens, j'en ai r'gret. Et ch'est bein seux tch'i' y'en a bein d'autres tch'étaient, comme lé Sieur Le Guédard, dîngnes dé mention, tchi n'sont pon r'cordés dans man livre. I' faut m'pardonner pon vêtchu à La Côte mé-mème, mes r'cits au sujet des cheins tch'ont vêtchu, travailli et pâssé au r'pos étérnel là, sont l'rêsultat dé chein qu' j'ai peu apprendre en convèrsâtion auve les habitants actuels dé La Côte, et en liêsant souangneusement les noms Jèrriais sus les tombieaux dans les chînm'tchiéthes des églyises Anglyicannes lé long d'La Côte. Et, chose assez drôle, j'n'avais janmais ouï l'nom du Sieur Le Guédard mentionné, ni veu sus autchun tombé, quand j'êcrivis “Jèrri Jadis”. Et pis, étout, i' s'pouôrrait qu' j'ai veu des noms d'pèrsonnes sus des tombieaux qué j'n'éthais pon r'connu comme “natif de Jersey” viyant tch'i' n'avaient pon des vrais noms Jèrriais et qué jé l's éthais supposés êt' Français-Cannadgiens.
Mais pour èrvénîn à John Le Guédard. I' fut né en 1891 à Ste. Mathie, fis d'Eustache Le Guédard et d'Anne Marie Thérin, et allit à l'êcole à Oxenford House à St. Louothains dé 1904 à 1906 et s'en fut à La Côte quand il avait seize ans. S'il 'tait vivant i' s'sait dé m'n âge, car 1891 fut l'année d'ma naissance étout.
I' pathaît qué ch'tait à Gaspé tch'i' c'menchit sa carriéthe, probabliément pour les Robîns, car les noms d'un tas tchi travaillaient pour ieux sont mentionnés comme étant ses collègues, entr'autres Toussaint Le Pennec, John et Cyrille Le Garignon, Lewis Gibaut, Walter Payn, George Godfray, Walter Le Quesne, John Le Masurier, Stanley Hotton, Francis Thérin, Nelson Laffoley, Charles Le Scelleur, Sam de la Haye, John Barette, Jules Le Maître et Stanley Godin, qué j'n'avais janmais ouï lus noms mentionnés, ni veu lus noms sus les tombieaux, duthant mes visites à La Côte, et ch'est la raison pourtchi qu' nou n'les trouve pon dans “Jèrri Jadis.”
Lé Sieur John Le Guédard mathyit eune janne fille dé Gaspe, Mdlle. Blianche Coulombe. Il' eûdrent quat' fis et eune fille, Marguérite Françoise, tch'est la danme Turcotte tchi m'a êcrit. Oulle 'tait maitrêsse d'êcole.
Ch'tait un brave homme, lé Sieur Guédard. I' travaillait dû et 'tait sobre, întégre et honnête, fidèle à ses maîtres et a san travas. Il 'tait connu par tout l'monde lé long d'La Côte. Duthant 18 ans i' fut agent-comptabl'ye (“purser” en Angliais) à bord des navithes dé cabotage tchi transportaient vivres et marchandises dans touos les havres dé La Gaspésie. Quant i' tchittit à navidgi i' d'vînt gérant dé la boutique à Mêssieux Hyman et Fils à Cloridorme. Ch'tait il, en êffet, tchi rempliaichit l'Sieur Lewis Gibaut quand i' s'en r'allit en Jèrri.
Lé Sieur John Le Guédard 'tait un admithabl'ye péthe dé fanmil'ye, et i' n'oublyit janmais l'île dé sa naissance. Il en pâlait souvent à sa femme et ses êfants, et i' la vîsitit deux fais duthant les 42 ans d'sa d'meuthe à La Côte. Jèrri pathaîssait êt' dans ses pensées d'pus en pus auprès tch'i' dêpâssit sa chînquantchième année. Malheutheusement, i' n'vêtchut pon vyi. I' mouothit en 1949 à l'âge dé chînquante-huit ans d'eune maladie d'tchoeu.
Dans sa lettre, Madanme Turcotte mé dit: “Une seule phrase pour tout résumer. Mon père pour moi, c'était l'homme bon, honnête, vaillant, aimant et devoué envers les siens, pour qui il demeure inoubliable.”
Peut-i' y'aver eune miyeu êpitafl'ye?
George d'La Forge
Viyiz étout: