San Antonio, Texas,
U.S.A.
Lé 24 dé janvyi, 1976.
Moussieu l'Rédacteu,
M'èrvélà dans l'Êtat dé Texas, tch'était l'pus grand des Êtats-Unis dévant l'addition d'Alaska et dé Hawaii à l'union tchi forme chînquante êtats à ch't heu. Y'a eune sémaine j'tais en Floride. Un vol dé trais heuthes et d'mie en avion par dessus l's êtats dé Florida, Georgia, Alabama, Mississippi et Louisiana m'am'nit à San Antonio, ayant pâssé eune heuthe à Dallas en c'mîn où'est tch'i' fallait changi d'avion. J'ai fait l'mème trajet bein des fais en moto, eune affaithe dé tchînze chents milles, dans trais jours, en cachant d'jour seulement.
Lé viage en avion, assis confortabliément dans eune sorte d'grand' tchaise auve rein à faithe sénon liéthe, mangi et dormillonner, vouos donne lé temps d'penser si nou n'veurt pon liéthe, et à tchi penser? Dans man cas ch'est bein aîsi - j'pense à Jèrri et la vielle dévinnâle mé veint à l'idée : À tchi qu'tu penses quand tu n'penses au rein? La rêponse, comme ou l'savez, est “À t'rêpondre quand tu n'dithas rein!” Sans doute, mes pensées n'taient pon entouorre “rein” - j'mé disais qué j'm'en allais trouver un tas d'lettres et d'cartes d'Noué d'Jèrri à m'attendre en arrivant à domicile siez ma fille. Tel en fut l'cas, et j'èrmèrcis touos l's anmîns tchi m'ont env'yé des cartes, et v'la tchi m'fait chose dé penser tch'i' n'en ont pon r'chu d'mé.
Avau l's années, j'ai env'yé mes cartes d'Noué du Cannada viyant qué j'sis là dans l'mais d'novembre en bouan temps dé l's env'yer pour arriver en Jèrri, en Angliétèrre et à l'êtrangi généralement à Noué. Mais touos l's empliyés d'Poste au Cannada 'taient en grève quand j'y étais. Împossibl'ye d'env'yer lettres et cartes à pèrsonne. Quand j'tchittis l'Cannada pour l's Êtats-Unis dans l'mais d'dézembre, il 'tait trop tard pour env'yer des cartes en temps pour Noué sénon par avion, et comme j'en env'yis eune chentaine en Jèrri et à l'êtrangi, j'décidis d'prendre avantage dé l'offre dé la “Jersey Evening Post” d'mett' eune annonce souhaitant Bouan Noué et Bouanne Année à touos l's anmîns en Jèrri. J'n'ai pon veu l'annonce mé-mème, mais ch'est seux qu' ou pathut - du mains j'l'espéthe, car jé n'voudrais pon penser qu' mes anmîns créthaient qué jé n'pensais pon en ieux à Noué.
Enfîn, tchiques nouvelles parmi lettres et cartes m'annoncent acouo des décès d'vièrs anmîns et anmies, entr'autres, Mdlle, Marie Hâcou. J'sis content d'aver ieu eune longue et întérêssante convèrsâtion auve lyi l'êté pâssé en ville quand j'allis vaie ma couôsinne Elsie Briard à Glanville House. “Miss Marie” comme oulle 'tait connue par touos ses anmîns, 'tait probabliément la pus ancienne membre vivante dé l'Églyise dé St. George. J'm'èrsouveins d'lyi là y'la quâsi huiptante ans, et i' m'sembl'ye qué j'la vai acouo assise dans lé d'vant, du côté d'l'Êvangile, dé l'églyise auve san p'pèe et sa m'mèe et sa soeu - pus tard Mdme. P. P. L'Feuvre, Mdlle. Marie 'tait bein au-faite et avait bouanne mémouaithe, et oulle avait acouo toutes ses facultés l'année pâssée - à l'âge dé nénant'tch-ieune ans - et j'eûnmes eune mangnifique convèrsâtion au sujet des vièrs temps à St. Ouën.
J'èrgret, étout, d'ouï qué l'Sieur Jean Hubert dé la Villaise, un charmant corps et bouan Jèrriais, est décédé. Et, étout, Mdme. Ph'lippe Bro Alexandre qué j'ai connue quand j'tais mousse à St. Ouën mais qué j'n'ai pon r'veue d'pis. Hélas! I' s'en vont à grands pas, les vièrs anmîns - et un mio d'Jèrri s'en va acanté ieux.
J'n'ai pon 'couo grand' nouvelles au sujet d's êlections, mais j'sis content d'ouï qué l'ex-Sénateu Farley, tch'a fait d'bouan travas dans l's Êtats pour bein d's années, est r'vénu dans La Chambre comme Député, et qué m'n anmîn, l'Député Jean Amy L'Maistre, est rê-êlu. J'n'en sai pon grand dêtail, des êlections pour Député, mais v'la tchi m'donne satisfaction, comme vièr Louothi et Consèrvateu, d'vaie qué l's êlecteurs ont ieu l'avis d'êlithe les candidats tch'ont, en général, eune bouanne tête sus l's êpaules et tchi n'sont pon en train d'vouler boulevèrser tout.
Ieune des choses tchi m'întérésse hardi est d'vaie comment qué l'nouvieau président du “I.D.C.” s'en va s'graie. Né v'là un Conmité tch'a bésoin d'un président tch'a d'large êpaules, du paids dans ses manches et un tas dé p'tits boudîns dans la tête, car ch'est seux qué si ses decisions sont strictément en régl'ye auve les régliéments du Conmité, i' s'en va tchiquefais dêpliaithe au monde.
George d'La Forge
Viyiz étout: