Fort Lauderdale, Florida,
U.S.A.
Lé 25 de novembre, 1967.
Moussieu l'Rédacteu,
Lé temps s'passe si vite qué nou n'a presqué pon l'temps d'penser. I' n'y a pon 'couo quat' sémaines j'tais en Jèrri, et i' m'sembl'ye pourtant tch'i' y'a d's année qué j'tait La Baie d'St. Ouën et La Corbiéthe qué j'viyais par la f'nêtre en mé l'vant au matîn à La Brétchette! À cht heu, ch'est des palmes - à cocannettes et aut' sortes - et un âpre solé qué j'vai quand j'mé lève. Auve un mio d'înmaginnâtion j'pouorrais quâsi craithe qué j'sis en Êgypte à r'garder la bordeuse des gardîns du palais d'Cléopatre!
Y'a eune sémaine j'tais dans un aut' clyimat tout-à-fait - nou pouorrait mème dithe dans un aut' monde. À la plaiaiche d'ub âpre solé, ch'tait d'la né que j'viyais en mé l'vant, et i' faîsait eune fraid d'tchian dans les rues! J'tais à Ottawa, la belle capitale du Cannada!
I' pathait qué l'temps fut mauvais en Jèrri, et tch'i' ventait la pé du dgiâbl'ye auprès qué j'tchittis l'Île au c'menchement d'chu mais, et i' tchiyait d'la plyie avèrse, comme j'vouos l'disais dans la lettre du quatre novembre, quand j'tchittis Londres en avion pour l'Améthique, mais ouaithe qué l'temps 'tait fraid dans l'Michigan, et tch'i' pathaîssait dispos à la né, j'décidis d'aller quand-mème vaie man fréthe Sydney et mes deux soeurs à Ottawa. Trais d'mes fréthes Améthitchains, Fraînque, Jean-Giffard, et Percy, y vîndrent auve mé, et nouos v'là en route chînq dé nous (Percy avait sa bouannefemme auve li) en moto. J'fînmes les 500 milles aîsiement dans dgiex heuthes, car lé temps 'tait bé, et j'nouos trouvînmes chîn fréthes (sus six) ensembl'yes à Ottawa pour la preunmié fais dans tchiques années. Jèrri fut bein èrprésenté dans la capitale du Cannada pour trais jours!
L'temps n'fut pon mal, ma fîngre, quand tchi qué j'tions là, mais i' s'caillait dévant arriver à Toronto en r'vénant à Detroit, Michigan, et y'avait trais pouces dé né dans la route dans p'tit d'temps et nou n'viyait pon la main d'vant sé! Enfîn, mes fréthes sont accouôteumés à cachi dans la né et sus les routes glacées dans l'hiver au Michigan, et j'arrivînmes à Detroit sans avârie.
Ch'n'est pon souvent qué j'laîsse la grand' partie d'novembre sé passer dévant m'mett' en c'mîn pour La Floride ou L'Texas, mais ayant 'té r'tèrgi en Jèrri ch't année, man viage ichîn fut r'tèrgi étout. Mais eune chose tchi m'a fait plaisi est qu'man fréthe Percy (né à Percé à La Côte y'a 65 ans) décidit d'aller en Floride auve mé. Il est pinnetchinner d'la "Ford Motor Company" et n'avait pon ieu l'occâsion d'y aller quand i' travaillait et avait eune fanmile à êl'ver.
J'tchittînmes Trenton, Michigan, dans man moto - un "Studebaker Hawk" - sanm'di matîn en c'mîn à travèrs des Êtats d'Ohio et Kentucky. J'arretînmes à Williamsburg, ayant fait 500 milles chu jour-là. Dînmanche au sé nouos trouvit à Jasper, en Floride, 560 milles dé Williamsburg, ayant travèrsé lé reste dé Kentucky et l'entchi des Êtats dé Tennessee et d'Georgie dévant crouaîsi la frontchiéthe dé La Floride. Arrivés à Fort Lauderdale (25 milles dé Miami) à quatre heuthes lundi l'arlévée, j'avions fait tchînze chents milles dans mais d'trais jours!
La chose tchi frappit man fréthe Percy l'pus 'tait l'changement d'temps en allant sud. I' g'lait quand j'tchittînmes lé Michigan, et i' fallait mett' la chaleu en allant dans l'moto pour êt' confortabl'ye. Lé temps 'tait bé quand j'nouos couochînmes à Williamsburg, Kentucky, et un ciel bein rouogi par lé solé couochant 'tait sîngne qué l'lendemain dév'thait êt' bé. En êffet, i' faîsait bieau temps en sé l'vant l'préchain matîn, mais eune forte rôsée avait g'lé sus les f'nêtres du moto et il' 'taient couvèrtes dé vèrglias. I' fallait les gratter atout la lâme d'un râseux à rabot dévant pouver vaie l'travèrs et r'prendre c'mîn! Mais j'tions dêjà 500 milles au sud du temps tch'est rêéllement fraid, et il amendait et dév'nait pus caud à chaque touannement des reues du moto, et j'tions dans l'nord dé La Floride, et la chaleu, à la fîn du deuxième jour et fallait mett' l's habits d'êté pour êt' confortabl'ye!
Quand man fréthe 'tait à nouer dans la mé ichîn à Fort Lauderdale (ch'est assez êtrange qu'ayant 'té né à La Côte ch'tait la preunmié fais tch'i' s'était bangnié dans la mé!), i' n'pouvait pon r'vénîn tch'i' pouvait nouer dans eune mé tch'est quâsi tchiède à la fîn d'novembre! "Véthe dgia, man garçon," j'lî dis, "Et ch'est d'même ichîn touos les jours dé l'année - êté ou hiver!"
"J'mé d'mande," i' m'dît, "pouortch'est qu'tout l'monde né passent pon l's hivièrs ichîn?"
"Eh bein," j'lî dis. "Ch'n'est pon manque dé l'vouler, mais i' n'faut pon oublyiyer qu'ch'est bein pus aîsi à gangni sa vie dans les pays îndustriels du nord qué dans les pays cauds! Et nou-s-est du rang d's anciens par lé temps qu'nou-s-a peut mett' assez d'hèrpîns d'côté pour pouver y d'meuther sans aver à gangni san pain!"
George d'La Forge
Jersey Evening Post 4/12/1967
Viyiz étout: