Lé 23 d'octobre, 1982
Moussieu I'Rédacteu,
M'èrvéla dans chu Nouvieau Monde où'est qu' j'ai pâssé bein d's années d'ma longue vie. Lé viage par avion lundi pâssé s'fît, Dgieu mèrci, sans avârie tchelconque. I' prînt sept heuthes et d'mie à travèrser la route des airs dé Londres à Washington, et auprès eune heuthe d'arrêt là j'tions en l'air acouo eune fais en c'mîn pour Detroit, Michigan, où'est qu' nouot' fréthe Fraînque et san fis nouos attendaient.
"Mantch'-ous Jèrri?", ou mé d'mandez. Mais san doute, j'manque Jèrri. D'pis qu' jé m'connais j'ai leu Jèrri tellement dans la couenne qué j'ai même pensé en Jèrriais duthant l's années pâssées à l'êtrangi. Mais san clyînmat d'hivé n'est pon bouan pour ma vielle poutchie d'os, et châque jour tchi s'pâsse à ch't heu mé ramémouaithe tch'i' faut entouother mes vièrs os d'nénantch'iun ans auve un air caud pûtôt qu' auve la fraideu d'hivé d'Jèrri.
Hélas! Les vièrs anmîns lus en vont, iun à la fais. au r'pos êtèrnel. Chutte fais, j'arrivis en Jèrri trop tard pour vaie man vièr anmîn John Clifford Malzard en vie. Il 'tait trais mais pus vyi qu' mé et j'avions 'té grands anmîns dépis qué j'tions mousses ensembl'ye à l'Êcole Wesleyenne au Haut du Mathais à St Ouën. Ches dreines années nou s'rcncontrait tréjous ès entèrrements en nou s'entre-dîsait; "Quand iun d'nouos deux s'en îtha, l'aut' quémench'cha à châtchi!" Un fanmeux vièr diton. Il 'tait un vraie vièr type Jèrriais, întégre, honnête, et la bouanté même, John Malzard, et ouaithe qué j'sis en r'tard, j'veurs exprînmer mes r'grets et ouffri mes condoléances et ma sympathie à Mad'mouaîselle Betty, sa charmante fille. Ch'est seux qu' ou manque san p'pèe tèrribliément.
En êffet, jé c'menche à châtchi, mais j'sis dêtèrminné dé m'cramponner au "Rocher de Jacob" comme nouos l'èrquémande lé fanmeux cantique Anglyican nunmétho huiptante-trais dans La Litourgie. Et quand nou-s-a mênagi, par la grâce dé Dieu, à vivre pâssé nénante ans, i' faut continnuer à gabather du mus qu' nou peut jusqu'au moment qu' la Trompette dé Sion sonne l'appel.
Man séjour dé deux mais en Jèrri ch't' année s'est allouangni d'un coupl'ye d'sémaines à cause dé maladie. J'ai pâssé trais s'maines à l'Hôpita. Nou peut dithe qué jé c'menche à en faithe, eune habitude, dé pâsser partie d'man temps là. Ch'tait la même turlute en 1980.
J'mé r'souveins du vièr temps qu' les gens en avaient eune hôrreu, d'aller à l'Hôpita. Dans chu temps-là, sans doute, les jannes prannaient soin d'lus anciens. I' n'y'avait presqué pon un seul janne ménage tchi n'avait pon un grand-péthe ou eune grand'-méthe, et tchiquefais les deux, assis à côté d'l'âtre quand nou-s-allait les vaie au sé. Et i' n'y'avait qué l's anciens tchi n'avaient pon pèrsonne à les souangni tch'allaient à l'Hôpita. Dé nouos jours tout est changi. Les jannes veulent sé mathier, acater un moto, eune télévision et Bouan Dgieu sait tchi, tout en même temps. Et comme les nouvieaux mathiés ont souvent à travailli touos les deux pour pouver payi pour tout chu luxe-là, i' n'ont ni l'temps ni l'enclyîn d'souangni les vieèrs.
Et pis, étout, i' faut admettre qué les gens vivent pus vièrs qu' aut'fais et qué quand i' d'veinnent grabataithes nou n'peut pon s'attendre qué la janne femme s'en va pouver rester à la maîson niet et jour à les souangni. Ch'est en tchi les gens n'ont pus l'hôrreu dé l'Hôpita tch' il' avaient dans l'temps jadis. Jèrri peut êt' ordgilleux dé s'n Hôpita. À m'n idée, et j'peux pâler auve connaîssance dé cause, oulle est à la hauteu des miyeuthes au monde. Et j'profite dé ch't' occâsion pour èrmèrcier les docteurs et les nosses et lus aîgues tchi m'ont si bein souangni quand j'tais-là. Ch'est mèrveilleux d'vaie la manniéthe qué ches bouannes nosses-là et lus aîgues font lus d'vé fidèlement niet et jour. Il' ont eune pâcienche èrmèrquabl'ye et i' font d'lus mus pour rendre les malades confortabl'yes et pour soulagi lus maux. Rein n'est trop d'peine pour ieux, et i' sont absolûment dêdiées à lus tâche. Comme d'amors, j'ai tchitté Jèrri sans aver ieu l'temps, à la dreine minnute, d'êcrithe à un tas d'bouans anmîns pour les r'mèrcier pour les cartes et les flieurs tch'i' m'envyîdrent quand j'tais à l'Hopita. J'vouos sis bein èrconnaîssant, mes chièrs anmîns, et j'vouos r'mèrcie bein sîncéthement.
Et j'ai r'gret dé n'aver pon ieu l'temps d'aller dithe à la préchaine à plusieurs anmîns d'vant tchitter l'Île. La raîson est tch'il a fallu tchitter pus tôt qué j'n'avais idée viyant tch'i' n'y'avait pon d'pliaiches disponibl'yes dans l'avion pus tard dans la s'maine.
Viyiz étout: