En faîthant l'tou du monde...
(Siette)
San Antonio, Texas,
U.S.A.
Lé 25 janvyi, 1969.
Moussieu l'Rédacteu,
En tchittant Kobe, au Japon, j'nouos en feûnmes à Formose. Nouot' destinnation 'tait l'port dé Keelung dans l'nord de l'île. Arrivés-là, j'savais bein tch'i' faudrait au mains quat' jours, p't êt' mème chînq, pour dêchèrgi la cartchaîthon d'engrais chimique qué j'avions en boulque, dans la câle, pour en faithe présent au Général et Président Chiang Kai-shek, et j'pensis qué v'la tch'i' m'don'nait l'temps d'aller à tèrre visiter un anmîn Chinnouais, l'Cap'taine Chen Ping-ching, dé l'Armée des Airs dé La Chine Nationaliste.
Un charmant corps, lé Cap'taine Ping-ching. Un janne homme d'êducation, il avait êtudié à l'univèrsité et s'était décidé d'êt' aviateur. Ch'tait d'vant qu'les Communistes 'taient maîtres d'la Chine, et qu'L'Améthique aidgeait - principalement du point d'veue financyi - à la république présidée par Chiang Kai-shek à s'mett' sus ses pids, et l'janne Ping-ching fut env'yé à Pensacola, en Floride, pour apprendre san mêtchi d'aviateur. I' pâlait l'Angliais couothamment par lé temps tch'i' fut commissionné Lieut'nant-Pilote dans l'Armée des Airs Chinnouaise.
Dans chu temps-là, les Japonnais 'taient en traîn d'êprouver à contchéthi La Chine, et l'Lieut'nant Ping-ching sé distîndgit dans l'combat en l'air contre l's aviateurs Japonnais, mais il eut la malchance d'êt' bliessé et abattu, et i' s'trouvit prîsonnyi d'dgèrre. Heutheusement, les Japonnais n'en gangnîdrent pon ouaithe tch'il' 'taient maîtres d'eune bouanne êtendue d'La Chine, et l'Cap'taine Ping-ching fut libéthé. I' s'était si bein atchittté d'sa tâche dévant êt' bliessé qué l'Président Chiang Kai-shek l'enchèrgit d'êt' Attaché des Airs à l'Ambassade Chinnouaise Nationaliste à Ottawa, et ch'est là qué j'l'avais rencontré. Un bouan jour, i' fut rappelé par lé Général Chiang Kai-shek pour èrjouaindre sén escadrille d'aviation à Formose. I' s'adonnait qué j'tais à Ottawa l'jour tch'i' s'embèrtchi à bord du train pour aller prendre l'avion à Montréal pour lé viage à Formose où'est qué l'Général Chiang Kai-shek avait êtablyi san quartchi-général, et j'allis l'condithe à la stâtion auve man moto. En châtchant d'main auve li j'lî dis, en badinnant, qué nouot' préchaine rencontre es'sait probabliément en Chine! Mén arrivée à Keelung, en Formose, avait fait chutte promêsse-là possibl'ye!
À Keelung, j'dis au Cap'taine dé nouot' baté à cheunm'nées, lé Marine Snapper dé la compangnie United States Lines, tch'i' n's'en allait pon m'èrvaie pour trais ou quat' jours, et mé v'la à bord d'eune beusse en c'mîn pour Taipei, la capitale dé l'ile, eune ville dé pus d'un d'mié-million d'habitants. À Keelung, j'n'avais pon ieu d'peine à m'faithe comprendre. Dans un port, nou trouve tréjous des gens, sustout dans des maisons d'conmèrce, tchi pâlent l'Angliais. J'n'eus don pon d'peine à acater un titchet pour lé viage, en beusse, à Tai-pei.
J'trouvis l'viage bein întérêssant. Les p'tits villages lé long d'la route 'taient hardi comme nou-s-en vait dans les pays d'l'Orient. La pauvrété et la sîmplyicité d'lus mannièthe dé vivre sont les choses tchi frappent les visiteurs du Ouest lé pus. Mais, si j'avais peu pâler auve les gens d'Keelung en Angliais, ch'tait eune aut' affaithe eune fais arrivé à Tai-pei! Jé n'pouvais pon m'faithe comprendre par pèrsonne dans la stâtion des beusses. Et mé tchi voulait aller au quartchi-général du Général et Président Chiang Kai-shek! J'ai ouï d'pus qu'les Japonnais avaient otchupé Formose dépis 1895, et en avaient fait eune fortérêsse comme l's Allemands fidrent d'Jèrri duthant l'Otchupâtion, et i' n'avaient pon pèrmîns à autcheun êtrangi d'y mett' pid à tèrre, ch'est-en-tchi deux-s'trais généthâtions avaient veu l'jour et vêtchu là sans ouï ou apprendre eune langue êtrangièthe. Mais pour èrvénîn à m'n arrivée à Tai-pei : I' m'vînt à l'idée qué si j'pouvais trouver eune agence maritinme, j'trouvethais sans doute eune pérsonne tchi pâle l'Angliais, et j'engagis, par sîngnes, un pousse-pousse (rickshaw en Angliais), et, montant à bord, j'pointis à la grand' rue d'la ville et nouos v'la en c'mîn.
Comme j'l'avais d'vinné, j'vis eune agence maritînme dans la rue. J'fis man garçon pousse-pousse arrêter et j'entris dans l'office et j'trouvis un moussieu Angliais drièthe lé conteux tchi palait l'Angliais mus qu'mé - et l'Chinnouais étout! I' m'halit d'embarras dans un clyîn dg'yi. En Chinnouais, i' dit à man garçon pousse-pousse où'est qué j'voulais aller, et nouos v'la en c'mîn l'travèrs dé la ville et dans la campangne. Chu garçon-là 'tait nueus-pids, mais i' couothait comme un chèr tout en halant l'pousse-pousse! I' faîthait eune chaleu abominanbl'ye et j'avais pitchi d'li, mais jé n'pouvais pon lî faithe comprendre tch'i' n'avait pon bésoin d'couorre! Arrivés ès bèrrexes du quartchi-général dé l'armée d'La Chine Nationaliste, j'lé payi pour ses peines, et mé v'la en traîn d'êprouver à faithe la sentinnelle mé laissi entrer. M'èrvéla en embarras : La sentinnelle né savait pon l'Angliais - ni mé l'Chinnouais!
(À siéthe).