Fort Lauderdale, Florida,
U.S.A.
Lé 3 d'avri, 1976.
Moussieu l'Rédacteu,
J'viyais dans la gâzette du chînq dé févri qu' ou-s-avez ieu d'la né en Jèrri, et qu' les mousses ont profité d'l'occâsion pour s'entre pelter auve des balles dé né. V'la tchi m'ramemouaithe mén arrivee en Cannada dans l'mais d'novembre dé mil neu chent dgiex-neuf.
J'arrivînmes à Halifax, dans La Nouvelle Êcosse, auprès un rude pâssage, man fréthe Fraînque et mé, dans l'grand baté Empress of France de la Compangnie Cannadgienne Pacifique, et quand l'Cannada vînt en veue nou n'viyait qu' né partout. Tout l'pays en 'tait couvert et i' faisait eune fraid d'tchian, mais ch'tait si bé a vaie qu' nou n'pensait pon au fraid. La chose tchi nouos vînt à l'idée 'tait qu' eune fais arrivés à Ottawa, la capitale, ou'-est qu' nouot' méthe et nouos fréthes et soeurs nouos attendaient, j'allions aver - auprès la célébrâtion du bonheu d'nouot' rêunion - eune batâle de né auve nouos fréthes. L'idée 'tait d'aver eune bastaude entre mé et Fraînque, r'présentant Jèrri, d'un côté, contre Sydney et John, erprèsentant l'Cannada, d'l'autre. Et pis d'aver nouos deux pus jannes fréthes Percy et Jim prépather les balles dé né pour les deux côtés.
J'n'avions autcheune doute qué Jèrri allait en gângni, car j'avions 'té soudards, Fraînque et mé, dans la Milice Rouoyale dé Jèrri! Eh bein, j'eûnmes eune mangnifique rêunion d'fanmile, mais i' n'nouos prînt pon longtemps à dêcouvri qué la né au Cannada et la né en Jèrri sont toute eune aut' histouaithe. La né en Jèrri est mucre et s'paque aîsiement en balles. Au Cannada oulle est g'lée par la fraid et oulle est finne et vouos tchait l'travèrs des dés comme quand nou prend eune pouangnie d'fîn sablion, et ch'n'est pon aîsi d'en faithe eune balle. Ch'est en tchi jé n'callengînmes pon nouos fréthes Cannadgiens.
J'n'en vai pon souvent à ch't heu, d'né, ouaithe tch'i' n'y en avait pas mal sus l'haut d'la montangne Palomar en Califournie, où'est qu' j'allais à ches drein vaie l'fanmeux obsèrvatouaithe tch'a eune longue-veue dé deux chents pouces dé diamètre. I' prannent des supèrbes portraits d'la leune et des plianètes et êtailes atout chutte longue-veue là, et eune visite à l'obsèrvatouaithe vaut la peine. Il est à 5,550 pids sus l'haut d'la montangne, mais y'a eune mangnifique route pavée tchi monte en vithevardant jusqu'au haut. Ouaithe qué l'temps est caud au bas d'la montangne, la né c'menche à faithe sén appathence lé long d'la route en arrivant à la hauteur d'quat' mille pids et en d'ssus. La Califournie est un bieau pays, et la veue du haut d'la montangne est supérbe.
Quantchi qué l's autorités en Jèrri s'en vont tchitter à pèrmett' dé bâti des grand' babaines dé boutiques dans la ville tchi sont laies comme le péché du Dînmanche? Le portrait d'la cheinne tchi s'en va êt' ouvérte dans Bath Street est âffreuse point d'veue d'boutique. À c'menchi, j'criyais qué ch'tait un portrait du garage dans La Faithe qué j'viyais en ouvrant la gâzette. En Améthique, nou s-appelle des bâtisses dé mème “functional” en Angliais, viyant tchi sont c'modes à bâti, à meublier et à caûffer, et i' peuvent mett' pus d'appartènements d'dans qué dans des bâtisses artistiques. Mais y'en a dêjà bein trop d'ches-là en ville pour sa grandeu et ses belles pétites rues. Oulle 'tait si belle atout ses p'tites boutiques, et oulle avait un attrait tout spécial. À ch't heu ou pèrd san cachet d'pus en pus, et i' faudra beintôt aller à St. Pièrre Port en Dgèrnésy ou au Mont St. Miché en Nouormandie pour vaie des belles pétites villes tchi n'ont pon pèrdu l'caractéthe artistique des vièrs temps!
L'idée m'veint qué la grand partie des boutitchièrs en ville né sont p't-êt' pon vrais Jèrriais à ch't heu. En liêsant les gâzettes, j'vai qu' un grand nombre des pèrsonnes condamnés d'vant la Cour Rouoyale pour arriéthes dé paiements d'taxes sus l'èrvénu ont, à l'exception dé deux-s'trais noms Jèrriais, des noms Angliais et aut' noms êtrangièrs. Et la grand partie des gens condamnés pour dettes ès maîsons d'conmèrce n'ont heutheusement pon d'noms Jèrriais. V'la tchi montre qué chein tchi reste d'Jèrriais dans l'Île ont acouo du paids dans lus manches et tch'i' paient lus c'mîn.
Eune chose tchi m'trappe en liêsant les causes dévant la Cour Rouoyale est qué l's Avocats sont à faithe (j'allais quâsi dithe gângni!) pus d'sou à présenter des p'tites affaithes dé dettes et d'prétentions dévant la Cour qu'à pliaidgi des causes célébres comme i' y'en avait quand j'tais clércot dans la fanmeuse Rue ès Trais Pigeons y'a septante ans. Mais i' y'avait bein mains d'Avocats qué d'pigeons dans la fanmeuse rue, et dans l'Vièr Marchi, dans chu temps-là. Comme lé pâssage du temps apporte des changements!
George d'La Forge
Viyiz étout: