Les Pages Jèrriaises

Ottawa - la belle capitale du Cannada!

Cannada Trenton, Michigan,
U.S.A.
Lé 17 dé mai, 1969.

Moussieu l'Rédacteu,

M'èrvéla r'vénu du Cannada! J'sis en Améthique pour quat' jours, et par lé temps qu'ou' vèrrez chutte lettre ichin dans la gâzette en Jèrri, j'espèthe y'être étout! Auve motos et avions, nou-s-en fait-i', du viage, man bouanhomme! Ch'tait mangnifique dé s'èrtrouver à Ottawa, où'est qué j'tais dans l's offices du gouvèrnément dé dézembre, 1919, jusqu'à la fîn d'mil neu chent vîngt-deux. J'ai tchiquesfais pensé qu'j'éthais deu y rester et aver ieu l'honneu dé d'meuther toutes ches chînquantes années pâssées souos l'ombre dé la Couleu Britannique, mais i' faut qué j'mé cosole à la pensée qu'j'ai peu tchitter à travailli pus tôt en Améthique et pâsser pus d'temps en Jèrri en conséquenche!

La cité d'Ottowa est ieune des pus belles du monde, et oulle embellie touos l's ans. Lé Cannada est ordgilleux d'sa capitale. Tchi difféthence dépis qu'j'arrivis-là en 1919! Sa population dans chu temps-là 'tait à bein près comme la cheinne dé Jèrri aujourd'aniet. À ch't heu, oulle est au nombre dé 299,000! Pour la preunmié fais dans bein d's années, j'tions chîn fréthes et eune soeu (Sydney, Fraînque, John, Percy et mé, et Emily) ensembl'yes à l'églyise St. Barnabé à Ottawa, Dînmanche passé, pour La Sainte Eucharistie - et j'otchupînmes toute la londgieu d'un banc! Et nouot' fanmile est bein r'présentée dans l'sèrvice actuel du gouvèrnément Cannadgien. Nouot' fréthe Sydney est pinnetchinneu du bureau d'Imprînmethie d'La Dominnion. Lé grand d'ses garçons est dans l'sèrvice diplomatique, et san deuxième est dans l'Bureau d'l'Împot sus l'Èrvénu. Il' 'taient touos les deux officièrs dans l'Armée Cannadgienne des Airs duthant la dreine grand' dgèrre. Nout' soeu Emily travâlle dans l's offices du gouvèrnément étout.

Comme en est l'cas quand j'vais en Jèrri, les vièrs anmîns tchi d'meuthaient à Ottawa s'en vont à grands pas. Iun d'ieux tchi n'est pus et qu'j'allais tchiquesfais vaie 'tait l'Sieur Bertram Fauvel. Un moussieu charmant et distîndgi - comme l'était san p'pèe. William Le Boutillier Fauvel, né à Percé à La Côte en 1850 et décédé en 1897. Comme j'vouos l'dîsais dans ma lettre du 29 juîn, 1965, il 'tait Membre du Parlément pour lé comté d'Bonaventure en 1893.

Un aut' anmîn tchi pâssait l's hivièrs siez san fis à Ottawa et tchi n'est pus 'tait l'Sieur Stanley Hotton, fréthe du Sieur Walter Hotton, dé Parkland à Ste. Mathie, et d'Madanme Le Ruez, d'Sunnydale à Bieaumont. Stanley fut gérant d'la maîson d'conmèrce dé Mêssieux Hyman à Grande Grève pour bein d's années. J'avions 'té "commis" d'êcrivains dans Hill Street à St. Hélyi en mème temps quand j''tions jannes en Jèrri, et jé n'mantchais janmais d'aller l'vaie quand j'allais à La Côte. Hélas! Ma visite à Grande Grève l'année passée, en compangnie du Député P.M. de Veulle, fut l'occâsion d'un arrêt au chînm'tchièthe dé l'églyise Anglyicane dé St. Pièrre pour vaie da tombe.

Y'a acouo des Jèrriais à Ottawa, mais y'a si longtemps qué j'pâsse ma vie à quâsi deux mille milles dé là qué j'n'y ai pon arrêté assez longtemps, duthant mes visites en fanmile, pour les dênichi et les visiter. L'aut' jour j'tais à pâler par téléphone à eune ancienne, Madanme Allenet, née Amelia Coutanche, en Jèrri. San fréthe Henry d'meuthe à Bieaumont, à St. Pièrre, et j'eus l'pliaisi d'aller lî payi visite l'année passée quand j'tais en Jèrri, et j'espèthe lé r'vaie ch't êté et lî dithe qué j'êprouvis à pèrsuader sa soeu d'aller l'vaie - mais qu'ou' s'crait trop âgie pour faithe un si long viage. Pourtant, ch'est bein aîsi par avion d'nouos jours!

Y'a un tas d'Jèrriais à Toronto étout - ch'est seux qu'j'y ai mème des couôsîns. Elias Le Feuvre, un n'veu à Manman (née Ann Le Feuvre, fille dé Pièrre, à La Ville La Bas), s'en fut-là auve sa femme, née Louisa Vasselîn, et eune grand' fanmile d'êfants. J'pense qué ch'tait en 1914 - et i' dait y'aver d'lus d'scendants-là ou ès alentours.

Mais r'vénant au sujet d'Ottawa, j'connaîssais un vièr Jèrriais y'a chînquante ans tch'était entrépranneux d'entèrrements-là. Il avait nom Fraînque Hamon et avait d'meuthé sus l'Île Bonaventure auprès d'Percé, à La Côte. Il' 'taient grands anmîns, li et man fréthe Sydney, et ch'tait li tchi souangnit d'l'entèrrement d'nouot' péthe en 1907. San fis Fraînque continnuit l'conmèrce d'entèrrements quand l'bouanhomme mouothit, et ch'tait li tchi fît l'entèrrement d'nouot' méthe en 1934. Y'a trais ou quatre ans, i' s'adonnit qué j'tais à Ottawa quand la veuve du bouanhomme Fraînque mouothit, et j'allis payi visite dé deu à la fanmile quand la défunte 'tait au suaithe. Chutte fais ch'tait Fraînque Junieur (lé chein tch'avait entèrré m'mèe) tch'était au suaithe quand j'tais en visite à Ottawa. Ch'est drôle comment qu'la mort peu vouos garder en rapport auve cèrtaines fanmiles avaû l's années sans s'êt' rencontrés fort dans la vie!

Ottawa - où'est qu'nouot' fanmile fut rêunie à la fîn d'la dgèrre dé 1914-18, auprès eune sépathâtion dé dgiex-huit ans, m'pâsse tréjous près du tchoeu, et ch'est dans san chînm'tchièthe Beechwood qué nouos péthe et méthe sont au r'pos êtèrnel!

George d'La Forge

 

Viyiz étout:

 

Les Pages Jèrriaises