Les Pages Jèrriaises

En Améthique...

San Antonio, Texas,
U.S.A.

Lé 28 dézembre, 1974.

Moussieu l'Rédacteu,

Quand l'conmèrce en pèrd en Jèrri nou pouorrait dithe: “Lé conmèrce manque tout chu temps, i' n'y a pon d'dêssa”. La dreine gâzette dé Jèrri r'chue ichin 'tait la cheinne du sept novembre et jé n'sai pon s'i y'a un manque dé dêssa dans les boutiques à St. Hélyi, mais j'peux vouos dithe tch'i' y'en avait iun ichîn les dreins jours dévant Noué. Un tas d'monde qué nou viyait dans les boutiques dé marchandises n'acataient pon auve abandon comme dans l'pâssé. Nou viyait bein qu' la bourse 'tait mains plieine dé sou. Mais dans la boutique du grossyi i' n'pathait pon y'en aver ieu, du dêssa. I' faut penser qué si les gens sont à court dé sou en général, i' voulaient au mains faithe eune bouanne tabl'ye pour fêter Noué. Un vièr diton Jèrriais nouos dit: “À la St. Miché les pithots, et à Noué les picots!” Eh bein, j'les pliains bein dans les temps d'Noué ichîn, les picots, car y'en a des millions, engraîssis pour l'occâsion, tchi lus trouvent dans l'ventre des cheins tchi l's ont êlevés et admithés dans lus vivant.

Eune chose qué j'ai r'mèrtchi, étout, est tch'i' y'a ieu mains d'illeunminnâtions en d'vant des maîsons chu Noué. Les gens en général sont à êprouver à obéi la d'mande dé nouot' Président dé couoyer l'êlectricité autant qu' possibl'ye, mais ch'n'est pon aîsi pour l's Améthitchains d'nouos jours dé couoyer sus autcheune chose, car il' n'en ont janmais connu la nécessité comme nouos anciens l'ont connue en Jèrri et comme, sans doute les preunmié v'nus eûdrent à faithe en arrivant dans l'Nouvieau Monde et bâti lus maîsons auve les bouais abattus par ieux-mèmes, et vivre sus l'produit d'un mio d'tèrrain dêfrichi auve grand' peine et dù travas. Mais ch'la est oublié. Les jannes ont ieu la vie aîsie et si belle qué mème tch'il' en aient liut tchiquechose en êtudiant l'histouaithe du pays, i' n'ont janmais rêalisé ni apprécié les vissicitudes dé la vie pénibl'ye de lus anchêtres “pionniers”.

Les motoristes sont acouo souos ordres dé n'cachi pon pus vite qué chînquante-chîn milles à l'heuthe ichîn en Améthique pour couoyer la pétrole. Un tas n'ont pon obéi la nouvelle louai et la police a c'menchi a l's arrêter et les poursuivre dévant Justice. Mais lé fait qué la grand' partie ont réduit vitesse a sauvé un tas d'pétrole et d'fatalités dans les routes du pays, et v'la tch'a împressionné l's autorités.

À Detroit, dans l'Michigan, des milles pèrsonnes ont 'té mîns bas par les grand' mannifactuthes dé motos à cause du boulvèrsément du marchi deu au manque d'abondance dé pétrole et d'la crise êconomique. Eune chose èrmèrquabl'ye est qu' les grand' mannifactuthes Général Motors, Ford et Chrysler ont fabritchi un tas dé p'tits motos criyant qu' tout l'monde s'en allait l's acater viyant tch'i' brûlent mains d'pétrole, mais i' n'ont pon vendu comme il' éthaient deu, car les gens sont îndécis au sujet dé l'av'nîn êconomique tchi n'pathaît pon trop encouothageant pour lé moment, et i' continnuent à faithe sèrvi l'vièr moto a la pliaiche dé l'trotchi pour un neu comme i' l'faîsaient d'habitude touos l's ans. Mais, chose acouo pus r'mèrquabl'yes, est qu' les grosses vouaituthes dé luxe comme lé Cadillac dé Général Motors et lé Continental dé Ford sont en grande démande, évidemment par les gens à sou tchi sont à l'habitude dé les faithe sèrvi. Et pis y'a tréjous l'dangi qu' eune collision dans nouos grands “express ways” entre un p'tit moto et un grand s'en va êt' fatale pour lé cacheux du p'tit. Quant à mé, j'aspithe au moment qu' touos les motos s'sont p'tits et qu' la vitesse restétha à chînquante-chîn milles à l'heuthe, car dans l'couothant d's années y'a pus d'monde dé tués dans nouos routes qu' en dgèrre. À m'n idée, la vie humaine est pus précieuse qué la vitesse des motos. J'sai bein, sans doute, qué j'sis vyi et à la vielle mode. Mais i' faut vivre vyi ou mouothi janne, et j'sis bein content d'aver vêtchu vyi!

Eh bein, nouos r'vélà à la fîn d'eune autre année et jé n'savons pon tch'est tchi nouos tchaie sus l'co dans quat' jours d'ichîn. Dans eune lettre èrchue d'Australie j'veins d'èrchèver la nouvelle qué l'Cap'taine (et Juge) Fraînque Ahyi, d'St Martîn, veint d'pâsser l'pas. J'l'ai bein connu dans san viyant, et j'ai connu sa danme dépis qué j'tais janne, car oulle 'tait la niéche à Moussieu Binet et ou v'nait souvent à s'n office auve san p'pée, Maît' David Le Seelleur. Né v'la acouo un mio d'nouot' vièr Jèrri dispathu. Enfîn, ch'est la vie, et i' faut s'y soumettre - et j'vouos souhaite. Moussieu l'Rédacteu, et à touos vouos lecteurs et à m's anmîns en Jèrri, eune raide bouanne Nouvelle Année!

George d'La Forge
 

Viyiz étout:

 

Les Pages Jèrriaises