Les Pages Jèrriaises

La télévision

Trenton,
Michigan,
USA

Lé 8 dé septembre, 1979

J'sis bein d'avis qué quand nou-s-a trop d'tinné ch'est eune escliavitude, et un tas d'pèrsonnes sont dév'nus escliaves au tchulte d'èrgardéthie d'la télévision. Quant à mé, quand i' y'en a ieune d'amain et qué j'n'ai rein d'aut à faithe pur lé moment, j'aime èrgarder et êcouter les nouvelles du jour dessus, prîncipalement pour vaie tch'est tch'i' pâsse à l'êtrangi. Ayant visité un tas d'pays, ch'est naturel qué nou s'întérêsse ès activités d'ches pays- là.

Mêcrédi au sé, dans les onze heuthes, j'mé mîns à r'garder l'entèrrement du grand seigneu d'Angliétèrre, lé Lord Mountbatten, si brutalement assâsinné par des Irlandais. Tchi bieau spectacl'ye, sén entèrrement! I' m'vîns à l'idée qué la télévision Cannadgiene, pûtôt qu'la nouôtre en Améthique, en donn'nait un pus long accompte et j'touannis l'bouton à la "channel" dé Windsor, Ontario, et jé n'fus pon d's'appointé.

Nou viyait l'cortège sorti d's envithons du palais. Lé côffre 'tait couvèrt auve lé "Union Jack" et monté sus un tchéthiot d'canon et halé par un grand carré d'frégatins, parfaitement alîngnis et un carré sembliabl'ye en driéthe du tchéthiot (I' pathaît tch'i' y'avait trais chents huiptante frégatîns faithe les deux carrieaux) pour prendre l'paids du tchèthiot et sèrvi d'frein en cas d'ava. I' marchaient au pas ralenti d'entèrrement et au son d'la musique solonnelle et ch'tait mangnifique dé vaie la disciplinne, si parfaite, tchi produisit un tel spectacl'ye. Et les frégatins nouos rappellent la glouaithe dé la Marinne Rouoyale tchi soulait garanti la seûthété d'l'Empire Britannique "d'outre mer" dévant et duthant les deux grand' dgèrres.

Lé fait qué ch'tait des frégatîns pûtôt qu'des j'vaux tchi portaient l'défunt à l'abbaye mé rappelle qué man Papa L'Feuvre, décédé en 1903 à l'âge dé 65 ans ès Landes à St. Ouën, avait - dans san vivant - exprînmé lé d'si d'n'êt' pon porté au chînm'tchiéthe par des j'vaux, et l'jour dé s'n entèrrement i' fut porté tout l'long du c'mîn des Landes à l'églyise dé St. Ouën à bras par des porteurs.

L'entrépranneux et s'n assistant portaient châtchun eune haute scabelle, et auprès aver marchi eune cèrtaine distance i' pôsaient les scabelles debut dans la route et m'ttaient l'côffre dessus et un nouvieau lot d'porteurs lus présentaient et lus m'ttaient en pliaiche. Dans chu temps-là, i' m'ttaient eune manniéthe dé longue êtraite sèrviette souos l'côffre et châque porteux liet l'but l'tou d'san pouangnet, et ch'tait d'même tch'i' prannaient l'paids du côffre à londgieu d'bras. Ch'tait pus tard qué l'habitude dé porter à l'êpaule fut adoptée. J'mé r'souveins qué l'preunmié changement d'porteurs à l'entèrrement d'Papa eut lieu à côté d'la maîson à Mait' Bram Le Ruez, pas bein liain d'siez nous à La Forge. Pour mé, mousse dans chu temps-la, ch'tait eune occâsion bein solonelle - et triste étout - car j'aimais hardi man Papa.

Mais pour èrvénîn à l'entèrrement du Lord Mountbatten. Ch'tait mangnifique pour mé d'èrvaie lé d'dans d'la fanmeuse Abbaye dé Westminster et d'ouï l'fanfare des trompettes, l'orgue, et l'chant d'l'Abbaye. J'viyais, étout, Sa Majesté la Reine, et la Reine douaithiéthe Elizabé, toutes les deux en grand deu. V'là tchi d'vait rappeler à la vielle reine l'entèrrement dé s'n homme, lé Rouai George VI dé mémouaithe respectée.

Y'avait des rouais et des prînces à l'entèrrement, et des r'présentants d'bein des pays. J'viyais, entr'autres, un général Français qué j'pouvais identifier par san "képi." Et j'sai bein tch'i' y'avait des r'présentants Améthitchains étout. Ches'là sont habilyis hardi comme les Angliais.

Dans eune gâzette d'ichîn, lé défunt Lord Mountbatten 'tait mentionné comme étant "a sailor's sailor, a soldier's soldier and a man's man," tchi veurt sans doute dithe tch'il 'tait aimé et admithé par les frégatîns, les soudards et l's hommes à tchi il avait ieu affaithe. Un grand complyîment pour un Anglais v'nant d'la part des Améthitchains.

Quand tchi qu'tout chu machacre-là en Irlande s'en va vaie sa fîn? Ch'n'est sans doute pon l'assâsinnâtion d'membres d'la fanmil'ye Rouoyale tchi s'en va y mett' fin. Au contraithe, v'la tchi s'en va faithe les gens acouo pus dêtèrminnés d'combattre les assâsîns.

Hélas! I' s'en pâsse dé tant d'sortes dans l'monde ches jours qué ch'n'est pon ravissant qu'les Têmoins d'Jehovah craient qu' j'appréchons d'la fîn du monde prédite dans la Bibl'ye. Il' ont p't-êt' raîson!

George d'La Forge

 

Viyiz étout:

 

Les Pages Jèrriaises