Les Pages Jèrriaises

Tchi pays!

Fort Lauderdale, Florida,
U.S.A.
Lé 27 dé dézembre, 1975.

Moussieu l'Rédacteu,

Eh bein, né v'la l'jour dé Noué pâssé. Papa Noué r'est en c'mîn pour sa d'meuthe au Pôle Nord, où'est tch'i' s'en va êt' bein embarrassé à fabritchi des jouets pour lé Noué d'l'année tchi veint. S'i' d'meuthait en Floride jé s'sais bein content d'lî bailli un coup d'main, mais j'n'ai pus l'ambition d'pâsser man temps où'est tch'i' fait eune fraid néthe. Pourtant, quand j'tais janne v'la tchi n'mé gênait pon. La preuve en est qu'eune fais j'eus l's ouothelles g'lée à Ottawa, au Cannada, en marchant d'siez-nous à l'office. Ch'tait eune matinnée qu'la tempéthatuthe 'tait 40 degrés Fahrenheit en d'ssous d'zéro, et jé n'm'étais à peine apèrchu d'la fraid en marchant. Sans doute, nou s'habillait pour, et nou v'nait au point d'apprandre un mio d'avis et dé s'protégi l's ouothelles et l'but du nez.

Cannada Mais les pouorres mousses tchi s'en allaient d'Jèrri à La Côte en tchittant l'êcole à l'âge dé 13 ou 14 ans d'vaient souffri d'la fraid là-bas dans l'hivé. V'la tchi m'fait penser qu'eune fais, en compangnie d'man fréthe Fraînque et d'nouos couothîns 'Dalpheusse et Lîsabé d'Aubert, dé La Baie d'St. Brélade, j'cachis en moto l'tou d'La Côte dé Gaspé dans l'mais d'avri y'a eune dgiexaine d'années ou pus. J'allais lus montrer touos les noms Jèrriais sus les tombieaux dans l'chînm'tchiéthe dé Malbaie où'est qu'mes vièrs anmîns John et Alice Le Co et lus fis Morris sont au r'pos êtèrnel. Arrîvés-là, j'trouvînmes qué la né 'tait à hauteu d'touos les tombieaux. Pas mouoyen d'vaie un seul nom! Tout ch'qué l'couothîn d'Aubert pouvait dithe 'tait: "Tchi b.... d'pays!" Lé fait qué quâsi touos les jannes Jèrriais y survivaient a fraid d'hivé et la duthe vie est preuve tch'il 'taient solides et couothageux.

Ichîn, en Floride, ch'est l'bieau solé. Touos l's Améthitchains tchi peuvent y'affaûrder veinnent y pâsser eune parti d'l'hivé. Chu Noué, un tas d'gens ont 'té oblyigis d'rester siez ieux dans l'nord car eune forte tempête a am'né eune êpaisse couoche dé né sus les routes. D'habitude, quand ch'la s'arrive les gens veinnent par avion, mais nouos deux pus grandes lîngnes des airs ont 'té empêchis d'faithe sèrvi lus avions viyant qu'lus empliyés 'taient en grève. Les chefs des sŷndicats des travailleurs, ichîn comme en Angliétèrre, chouaîssissent lé temps l'pus înc'modant au publyi pour dêcliather la grève, et quand v'la tch'arrive dans les temps d'Noué et qu'un tas d'gens ont rêsèrvé lus pliaiches en avion, p't-êt' tchiques sémaines à l'avanche, i' sont au m's'espé quand il' arrivent à l'aéroport et s'trouvent sans espéthance dé transport viyant qué l's aut' lîngnes d'avions sont dêjà chèrgies. I' faut don s'en r'aller siez ieux. Sans doute, i' sont remboursés, mais ch'est bein nâvrant.

Enfîn, la vie est faite d'avantages et dé d'savantages, et si nou-s-a la chance dé joui dé pus d'avantages qué l'contraithe, ch'est à bein près tout ch'qué nou peut s'attendre dans chutte vie, et j'sis bein r'connaîssant, pèrsonnellement, d'pouver dithe qué tel a 'té l'cas pour mé.

J'vai dans la gâzette qu'i' y'a eune êlection pour l'office dé Juré-Justicier d'La Cour Rouoyale. J'ai tréjous r'gretté qué les souô-dîsant réformateurs annulîdrent la louai tchi pèrmettait touos l's êlecteurs dé l'Île d'êlithe les Juges dé La Cour Rouoyale. Ch'tait un grand privilège pour l'êlecteur et un grand honneu pour lé Juge d'êt' êlus par les êlecteurs dé toute l'Île.

J'ai hâte dé vaie l'rêsultat d's êlections pour Sénateurs et Députés tch'ont ieu lieu, mais à mains qu'j'aie la chance d'èrchéver eune lettre mé donnant l'înformâtion, i' faut qu'j'attenge un mais pour l'arrivée d'la gâzette tchi s'en va l'annoncer. J'ai r'gret d'vaie qu'deux d'mes bouans anmîns, lé Député de Veulle et l'Député Mlle. Enid Le Feuvre, né s'sont pus assis dans la Chambre dé 1976. L's anciens d'l'Île s'en vont mantchi lus championne, et i' s'en va faller un homme dé couothage, large êpaule, du paids dans ses manches et tchi n'est pon court dé pé, pour rempliaichi l'Sieur de Veulle comme président du "IDC" - eune tâche îngrate et difficile si janmais y'en a ieu ieune!

George d'La Forge

 

Viyiz étout:

 

Les Pages Jèrriaises