Ottawa, Ontario,
Cannada.
Lé 7 dé novembre, 1970.
Y'a cèrtaines pliaiches qué nou-s-aime èrvîsiter et qu'nou s'y trouve pus à s'n aîse qué dans d'autres, à l'exception, sans doute, dé la pliaiche où'est qu'nou vit l'jour pour la preunmié fais. Chette-là vouos r'veint tréjous dans l'idée quand nou n'y d'meuthe pon. Ouaithe qué j'ai tréjous aimé aller d'un pays dans l'autre et vaie la mannièthe dé vivre des difféthents peupl'yes du monde, Jèrri, l'pays natal, n'a janmais dispathu d'mes pensées, et les portraits d'La Forge (l'nom d'la maîson où'est qué j'fus né en 1891 - oulle est appelée “Mossgiel” à ch't heu) et du Ménage ès Feuvres, maison anchestrale dé la fanmile, où'est qu' j'allais vaie grand'grand'méthe Le Feuvre (1806-1895), sont si gravés dans m'n esprit et mes pensées qué j'les vai d'vant mé i' n'y a pon d'soin où'est qué j'sis. Quand j'tais soudard dans la grand' dgèrre dé 1914-18, et qué j'tais d'garde tout seu la niet sus l'camp d'batâle, la pensée tchi m'hantait 'tait “J'les r'vêrrai-t-i' janmais ches pliaiches-là?”
Ch'tait auprès chutte dgèrre-là qué j'mé trouvis à Ottawa, dé où'est qué j'sis à vouos êcrithe à ch't heu. Duthant la dgèrre, j'avions rencontré - man fréthe Fraînque et mé - nouos fréthes Sydney et John, soudards dans L'Armée Cannadgienne. Il' avaient tchitté Jèrri auve p'pèe et m'mèe en 1901, et la rencontre fut si jouoyeuse qu'ou nouos donnit l'envie d'aller au Cannada r'vaie m'mèe (p'pèe n'tait pus d'chu monde dans chu temps-là) et vaie nouos aut' fréthes et soeurs nés et restés au Cannada.
Nouos v'la don à bord du grand baté Empress of France dé La Compangnie Transatlantique Cannadgienne-Pacifique, auprès démobilisâtion en novembre, 1919, et j'nouos trouvînmes à Halifax, en Nouvelle Êcôsse, auprès un viage d'eune sémaine dans eune mé comme des montangnes, si rude qué jé n'feûnmes pon pèrmîns sus l'pont pour quatre jours!
J'n'oublîthai janmais la veue d'la né sus les côtes du Cannada à m'suthe qué nou-s-en appréchait, et arrivés à tèrre chutte né-là sembliait couvri tout l'pays comme si un blianc lîncheu avait 'té êtendu d'ssus - et i' faisait eune fraid d'tchian! Nou n'en souffrait quand mème pon. L's années d'dgèrre dans l'mauvais temps d'hiver en France et en Belgique nouos avaient endueurchis. Nouot' preunmié pensée fut qué ch'tait l'occâsion idéale pour s'entr'astitchi atout des balles de né, mais à nouot' grand' surprînse nou n'pouvait pon faithe des balles dé chutte né-là - oulle 'tait g'lée et n'sé patchait pon - ou pâssait à travèrs des dés comme s'oulle 'tait du fîn sablion!
Est-che pôssibl'ye qué y'a chînquante-iune ans chu mais dépis chu temps-là? Oui dgia! Et i' faut êt' èrconnaîssants d'êt' acouo du rang des vivants et d'pouver reunminner et r'penser à ches jours-là - des jours d'aventuthe viyant qu' nou-s-arrivait dans un nouvieau monde, un mio vièrs pour quémenchi eune nouvelle vie mais jannes assez pour y'êprouver, et en espéthance d'acouo un tas d'vie d'vant sé. Deux jours pus tard et par train j'tions à Ottawa et rêunis auve m'mèe et touos nouos fréthes et soeurs.
La ville a changi d'pis chu temps-là. I' n'y avait pon fort dé motos par les c'mîns. Ch'tait des traînieaux attelés à des bieaux grands nièrs chévaux qu' nou viyant dans les rues. Les pèrsonnes dessus 'taient embonnetées dans des grand' câsaques dé pé d'ourse auve des chapieaux d'pé sus la tête, et des couvèrtuthes (dé pé d'ourse étout) les couvraient jusqué souos les bras. Des p'tites clioches sus l's attelages des j'vaux sonnaient tout l'temps à m'suthe tch'i' trottaient en glissant les traînieaux silencieusement sus la né. Des bieaux palais, bâtis atout des carres d'glace, ornaient les pars ichîn et lá, et des lantèrnes auve des veues couleuthées donnaient eune lueu douoche et mystéthieuse à travèrs des muthâles dé glace. Des coupl'yes patinnaient sus la glace ès alentours et sus l'Canal Rideau tchi traverse la ville et tch'est g'lé en hiver. Des mousses jouaient partout dans la né. Ch'tait eune scène tchi vouos faisait penser ès fées et faîtelles înmaginnaithes du temps passé!
Né v'la nouot' preunmié împression d'la vie dans l'nouvieau monde, et m'mèe et nouos fréthes et soeurs Cannadgiens n'eûdrent pon grand' peine à nouos faithe décider d'y d'meuther. J'n'eûnmes pon d'peine à trouver tchiquechose à faithe - dévant longtemps j'tions comfortabliément înstallés comme clèrcots dans l's offices du gouvèrnément.
Lé passage du temps a apporté bein des changements dans la belle capitale du Cannada, comme en est l'cas en Jèrri. Des neuves maîsons ont fait lus appathences partout et la bureaucratie a r'doublié. Les traînieaux et les j'vaux ont dispathu et ont 'té rempliaichis par des motos, et l'atmosphéthe dans les rues est empouaîsonnée par l'odeu d'pétrole brûlée tchi sort dé lus tchuyaux d'êcappe, mais ché s'sa tréjous ieune des pliaiches qué j'aime èrvisiter, et san tèrrain est consacré dans m'n esprit, car ch'est dans iun d'ses chînm'tchiéthes qué p'pèe et m'mèe et ieune dé mes soeurs dorment au r'pos êtèrnel.
George d'La Forge
Viyiz étout: