Fort Lauderdale, Floride,
U.S.A.
Lé 24 dé févri, 1973
Moussieu l'Rédacteu,
Touos l's ans, j'attends fête dé m'èrtrouver en Floride quand veint la fîn d'févri, mais chutte fais m'n arrivée a 'té attristée par la mort dé man fréthe John Giffard. S'il avait vêtchu jusqu'au mais d'mai il éthait ieu 74 ans, ayant 'té né en Jèrri lé 24 mai, 1899.
J'soulais m'vanter qué j'tions siex fréthes vivants, chînq dé nous en d'ssus d'septante et deux des chînq en d'ssus d'huiptante, mais n'en v'la iun au r'pos êtèrnel. Ch'est assez drôle qué ch'est iun des pus jannes. V'la tchi montre qué ch'n'est pon l'âge tchi conte quand veint l'temps du trépas. Jusqué y'a trais ans j'avions deux soeurs vivantes étout, mais la piêsnée mouothit en 1970.
Man fréthe John Giffard 'tait un bouan garçon - comme lé sont touos les aut' fréthes. Il avait à peine deux ans quand i' s'en fut à La Côte auve p'pèe et m'mèe et nouot' fréthe Sydney dans la brick Dawn, un bieau navithe à vailes, dans l'mais d'avri, 1901. Quand la grand' dgèrre dé 1914-18 êcliatit, ouaithe tch'i' n'avait qu'tchînze ans, i' s'engagit dans l'Armée Cannadgienne, et i' fut bliessé assez mauvaisement à la tête dans l's envithons d'Ypres en Belgique, quand i' n'avait qu'seize ans, et s'rêvilyit dans un hôpita en Angliétèrre. I' vînt en Jèrri en pèrmission en 1915 dévant tch'i' fûsse bliessé.
Quand i' s'était engagi soudard, il avait donné s'n âge comme dgiex-huit ans, et comme il 'tait grand assez pour ch't âge-là et en avait l'appathence, il avait 'té enrôlé. M'mèe fit l's autorités militaithes lé renv'yer siez-li en lus présentant san cèrtificat d'naîssance, mais i' s'rengagit dans un aut' régiment et m'mèe r'fît la mème chose, et quand i' s'rengagit eune traîsième fais ou l'laîssit aller. Sa bliesseûthe l'empêchit d'continnuer san mêtchi dé "linotype operator" dans l'împrînm'thie auprès démobilizâtion, mais i' mênagit à gangni sa vie et faithe assez d'sou pour s'èrtither d'affaithes à l'âge dé 65 ans. Sa femme, eune Irlandaise-Cannadgienne (i' n'eûdrent pon d'êfants) mouothit en 1967.
La mort est un pas dans la vie, et s'i' y'a eune chose bein sèrtaine ch'est tch'i' faut tous pâsser l'pas. I' m'sembl'ye aver liu d'tchique bord qué quand l'bouan vièr Pape Jean XXIII 'tait malade et savait tch'il 'tait sus l'pus, i' dit ès cheins à l'entou d'li qu'autchun jour est bouan à naître et qu'autchun jour est bouan à mouothi. Et l'Douoyen et Canon Matchi L'Mathinné m'dîsait, dans san vivant: "Beinheutheux sont les cheins tchi meuthent au Seigneur, car i' sé r'pôsent dé lus travaux". Ch'est mangnifique d'aver la fouai qu'ches deux vièrs sèrviteurs du Bouan Dgieu avaient dans la cèrtitude dé la vie êtèrnelle!
Lé temps n'est pon si bé ichîn en Floride comme j'l'ai veu d'aut' années. Né v'la deux-s'trais jours qué l'solé pathaît malade, et les gens d'à l'entou m'dîsent qué l'temps n'a pon 'té si caud comme d'habitude tout l'hivé. J'ai r'mèrtchi la mème chose au Texas. I' n'y a pon d'doute dans m'n idée qué l'clyimat du monde entchi a changi ou tch'i' s'est dêrouôlé d'un côté ou d'l'autre auve lé pâssage du temps dépis qué j'tais mousse et qu'l'êté 'tait si caud en Jèrri qu'nou viyait les vaques moûtchi, et qu'les vièrs l's entraient sus l'haut du jour dé peux tch'i' n'moutchissent. Y'avait mème un diton tchi dîsait: "I' sembl'ye tréjous à vielle vaque qué janmais janne ou n'a moûtchi!" J'm'èrsouveins tch'i' faîsait si caud qué j'attendais fête pour lé Dînmanche l'arlévée quand Papa m'enm'nait à L'Êta pour mé bangner dans la tchithiéthe à côté d'la tour tch'était-là d'vant qué l's Allemands la dêtruîsîsse. Ch'tait quand j'tais tout mousse et d'vant saver nouer.
J'y pense souvent, à ches bieaux jours dé ma jannèche ès Landes à St. Ouën. J'allions nouos assiéthe, Papa et mé, sus les monts en d'ssus et vis-à-vis d'l'Hôtel dé L'Êta pour vaie les cârrosses à deux et quat' chévaux tch'arrêtaient à l'hôtel, les mêssieux habilyis dans lus Dînmanche et l'cocher majestueux atout san bill-tappeur sus sa tête. I' n'y avait qu'eune hôtel à L'Êta dans chu temps-là. Lé temps 'tait caud et ch'tait l'calme partout et nou ouïyait l'lappais d'la mé tchi battait san pliein trantchil'ment, et la bourdonn'nie des bourdons tchi s'régalaient parmi les flieurs sauvages et la bruëthe à l'entou d'sé.
Papa admithait les j'vaux at'lés ès cârrosses auve bouôrre et brides polis nièrs comme du jais, et l's âtelles en jaune tchuivre et des martîngales tchi r'lîsaient au solé comme des êtîncelles à m'suthe qué lé j'va faîsait ses saluts en trottant. Nou n'vait rein si pittoresque à ch't heu! Pouôrre vièr Papa! I' n'fallait pon grand' chose pour lî faithe pliaîsi. Tchi bieaux jours tchi n'èrveindront janmais et tch'ont 'té rempliaichi par lé tîntamârre dé la vie modèrne!
George d'La Forge
Viyiz étout: