Les Pages Jèrriaises

I' s'en fait d'toutes les sortes, sinon la bouanne!

Fort Lauderdale, Florida,
U.S.A.
Lé 23 d'mar, 1968

Moussieu l'Rédacteu,

Comme j'vouos l'disais la s'maine passée, y'avait tout pliein d'barbarie à Détroit, dans l'Michigan, quand j'arrivis-là en 1923 et pour eune dgiêxaine d'années auprès - actuellement jusqu'au moment qu'la louai prohibitive dé la bouaisson fut abolie à la fîn d'l'année 1933. I' pathaît qu'chutte louai-là avait couôté un billion d'dollars par an ès Êtats-Unis en pèrte d'împots sus la vente dé la litcheu dans l'pays, tchi montent, pathaît-i', à eune somme dé chîn chent millions d'dollars par an en temps normal, et en chein tch'il avait couôté au gouvèrnément en êprouvant à faithe lé monde obéi la louai. Ch'tait eune louai tch'était prèsqu'împossib'ye d'adminnistrer, viyant qu'la population 'tait raide contre, et qu'en général les gens n'criyaient pon tch'i' faîsaient d'ma à pèrsonne en ayant eune fais à baithe quand i' pouvaient en acater, légalement ou autrément! D'après les chiffres publiyés par eune gâzette à Washington, i' iut treize chents agents d'police tués entre 1920 et 1929 en êprouvant à mett' la louai en forche!

Les fraudeurs n'étaient pon satisfaits d'vendre d'la vraie litcheu transportée du Cannada et d'aut' pays (il en v'nait mème des Îles Indiennes Occidentales!) il en faîsaient atout autcheune sorte d'esprit tch'i' pouvaient mett' la patte dessus, et vendaient ch'la à grand profit. Hardi d'chutte litcheu-là 'tait empouaisonneuse, et les gens tch'en b'vaient 'taient souvent en dangi d'lus vie ou d'êt' aveugliés!

D's aubèrges fûdrent ouvèrtes à bein des bords dans des caves souos les grands bâtisses dans la ville. La porte d'la montée tch'y d'scendait 'tait dêdgîsée, et l's aubèrges mèmes avaient des portes en fé atout des p'tites lutchèrnes dé deux-s'trais pouces carrés à hauteu d'tête. Eune sentinelle 'tait en garde, et quand tchitchun tapait à la porte oulle ouvrait la lutchèrne pour vaie tch'est qué ch'tait. Comme dans l's aubèrges en Jèrri, ch'tait quâsi tréjous les mèmes bachouards tchi les hantaient, et si la sentinelle les connaîssait ou' les laissait entrer. Mais un êtrangi n'tait pon permîns d'entrer à mains tch'il eûsse un habitué à rêpondre pour li, car il éthait peut être un agent d'la police en habits du dînmanche, tchi n'avait pon ieu la patte graîssie!

Mais, pâlant d'la police, la grand' partie d's agents 'taient corrompus par les fraudeurs. J'en vis la preuve dé mes propres ièrs. Quand j'travaillais dans l'chantchi dé tchi j'vouos ai pâlé d'vant, j'connaîssais l'chef dé police tout a fait bein. Un jour, iun d'ses "détectives" mé d'mandis si j'voudrais faithe eune touannée d's aubèrges (illégales!) dé Détroit auve li tchique séthée. J'tions dev'nus bouans anmîns viyant tch'il 'tait d'souche Canadgienne-Française et tch'i' pouvait bailli d'sa becque auve mé en Français. Eh bein, nouos v'la y'aller eune séthée dans san moto d'la police.

I' connaîssait toutes les entrées d'aubèrges, et châque fais qu'la lutchèrne ouvrait, la sentinelle lé r'connaîssait. I' cèrtifiait tch'i' pouvait rêpondre pour mé, et nouos v'là dans un êtablyissement tch'éthait peut passer pour un cassino à Monaco! Driéthe lé conteux, des boutelles dé litcheu d'toutes les sortes. Dans la salle, des jeux d'cartes en allant, auve lé baithe sus la tabl'ye. Des jeux d'chance et d'hâsard - comme lé jeu d' "Roulette", etc. En entrant, j'feûnmes èrchus comme des rouais, l'détective et mé, et conviés gratuitement. Y'avait eune foule dé monde dans lus bouans habits à baithe et à jouer ès cartes et à la roulette - et tout chennechîn dans un pays où'est qué ch'tait contre la louai d'acater ou d'vendre d'la litcheu! Et mé là-d'dans auve un homme dé la police souos sèrment d'arrêter et d'poursuivre ches aubèrgistes-là! Sans doute, i' pouvaient chèrgi chein tch'i' voulaient pour lé baithe, l's aubèrgistes, et y'avait des forteunes dé faites dé mème. I' n'y avait janmais un manque dé clients bêtes assez d'payi coue et ouothelles pour d'la litcheu tch'était contrébande! J'allînmes à quatre ou chînq dé ches palais d'bouaisson-là, et j'feûnmes r'chus et conviés partout sans tch'i' nouos en couôtîsse un sou - sans doute viyant qu'man compangnon 'tait d'la police. Ch'est seux tch'il avait ieu la patte bein graîssie!

Ch'tait san chef tchi m'avait donné un port-d'armes ouaithe qué jé n'tais pon 'couo citouoyen d's Êtats-Unis das chu temps-là, et tch'i' fallait en êt' iun pour pouver porter d's armes. Ch'tait viyant tch'i' y'avait tellement d'malfaîteurs par les c'mîns tchi dgettaient les gens tch'allaient dans les banques qu'si des sou, pour les voler en sortant, pistolet en main! Dans chu temps-là, nouot' trésôryi payait l's hommes dans l'chantchi en argent comptant toutes les s'maines. J'allions à la banque ramâsser les sou, et come y'en avait un bouan montant, y'avait tréjous la crainte et l'hâsard d'êt' volés en sortant. Comme j'avais 'té soudard et tch'i' pensaient qué j'n'avais pon peux dé m'n ombre, j'avais 'té chouaîsi pour aller à la banque. Un agent m'y portait dans l'moto d'la police, et j'y allions touos les deux l'pistolet chèrgi et d'amain. Heutheusement, j'n'eus janmais l'bésoin d'tither pèrsonne!

George d'La Forge

 

Viyiz étout:

 

Les Pages Jèrriaises