Pour un rin j'flianqthais l'chef parmi les rueus d'sa machine a imprimé. Je c'menche a en avé plien l'dos d'être èscrivain - nous est trop au pid l'vé. Ch'est tréjous en hâte et en presse qui faut qu'tout s'faiche: ch'est, Va vite ichin; tcheurs quedainne là; saute d'un bord, moustrous d'l'autre - nou n'a pon l'temps d'prendre san vent.
Ainchin! Mardi matin, j'dormais oquo: j'fais tréjous Laizé déscampé du liet d'viers quatr' heuthes du matin, viyant qu'ses ners c'menchement a la faithe tréssauté dans chés heuthes du matin, viyant qu'ses ners c'menchement a la faithe tréssauté dans chés heuthes la. J'en tais don a révé qu n'y'éthait jommais pus rin a faithe entre les r'pas, quand né v'la Laizé qui m'ésville; "L'chef a sufflié pour té." Dit li que j'dort, que j'réspounni en m'tounant d'bord! Tchés qui m'a pounnu un houmme qui c'menche a pâslé d'si bouonne heuthe!
Mais j'eut pourtant a allé vaie tchès qu'i voulait. I' m'dit qui fallait vite m'êschipé pour allé a Dinard ove un amin a li, un Améthitchain qui n'sait pon un mot d'français. Coumme j'sai qu'y'a des Ministres et des femmes qui liésent cheun'chin, je n'mettrait pas les patholles qui m'sortites d'la bouoche: Laizé lyi même, qu'est pourtant accouotumée a m'vaie marri, sauti oquo pus haut qu'd'amor.
J'tais pour trouvé m'n'Améthitchin le long du baté; il éthait la tête dans un chapé, la fache couerte d'cha et eunne brioche dans sa pouchette - j'le r'counnu tout-d'un-co la d'sus. I' m'explyitchi qu'i voulait passé un d'mié jour en France, qu'i n'savait pas un traitre mot d'lus bargouéchin mais qu'i' paiethait touos les frais. Right you are! que je m'fit. N'y'a pas par dévant mé pour dévizé chutte langue la: combin qu'ous avez d'sous. I' n'avait des maglyes! et pour pus d'seuthté, j'lis fit comprendre qui vallait mus qu'j'en souognisse - y'a tant d'pickpocket, que j'lis dit.
Nos v'la don arrivés! Si nou désjeunnait? que je m'fit. J'en eumes pour eunne heuthe, et coumme il 'tait tistotleur d'sa sorte, j'fut oblyigi d'béthe pour deux. Nou s'proumni d'un bord et d'l'autre, et pis, j'prinmes baté pour St. Malo. S'nou dinait? que j'fit. Nou dini; et après s'être proumnés un mio par la ville, nos r'vélo sus la cauchie là ou-és qu'j'avames débertchi. Mais, ch'entre-temps, la mé avait baissi; n'y'avait qu'vase partout, et pas un baté n'pouait accosté! I' vos faudra marchi jusqu'au Grand Bé, m'dit un moniethe de grand ésmanus. Coumme j'taimes déjà assez en r'tard, i' fallu couore. J'prinmes par sus les remparts, j'nos ésdjéthimes, j'nos r'trouvimes, j'désendimes sus la grève j'couothimes en heurlant et faisant des sinnes de nos attendre. L'Améthitchin choppi contre un rotchi, et s'éstrueulli dans eunne mathe, i' vint un tas d'monde a san s'cour, et mé, j'eut justément d'sauté a bord, l'baté s'mint en route, et je r'gagnyi Dinard justément en temps pour sauté dans la dernié vedette pour not' steam qui déjà c'menchait a s'n'allé.
Mé r'véchin en Jerri!
Pour ch'qu'en est d'l'Améthitchin, l'Bouan Djeu sait ch'qu'en est dévnu! L'chef n'a pon yeu d'ses nouvelles dépis. J'ai dans l'idée qui l'éthont mins en prison coumme suspecte d'éspiounage. Il r'mertchi bin un ouédre qui le r'gardait d'près tandi que j'taimes a examiné un navithe de djérre dans la cauchie. Coumme i' n'sait pon l'Français et qu'i n'avait pon d'sous sus li (si n'vaint pon vite r'cliamé ch'que j'ai rapporté tant piéthe! j'mettrai cheunna a la banque a man nom) il étha d'l'embaras a s'déspieautchi - ch'est pas d'mes affaithes; et, coumme disait Laizé justement a ch't'heu: l'méchant fait eunne oeuvre tchi l'trompe.
Piteur Pain
La Chronique de Jersey 5/8/1914
Viyiz étout: