Fort Lauderdale, Florida,
U.S.A.
Lé 3 d'dézembre, 1966.
Moussieu l'Rédacteu,
Mé r'véla à tèrre auprès lé viage dé quâsi trais s'maines en mé. Nou-s amathit tréjous à tèrre pour la niet en viage. Dreinement, j'passînmes eune niet à St, Augustin, en Floride. J'vouos ai pâlé d'chutte ville-là d'vant. Oulle est fanmeuse comme étant la preunmié ville êtablyie sus l'térritouaithe tch'est à ch't heu l's Êtats-Unis d'Améthique par des gens d'Europe - d's Espangnos - dé 1565 à 1763, d's Angliais dé 1763 à 1784. L's Espangnos lus y r'nardîdrent acouo eune fais en 1784 et y restîdrent jusqu'en 1821, quand l's Êtats-Unis s'en accapathîdrent pour bouan. Dans la ville, y'a un êtablyissement comme lé chein d'Madanme Tussaud à Londres, tch'a nom "Potter's International Hall of Fame". Dédans, y'a les corps en chithe, habilyis comme quand i' vivaient, dé 242 fanmeuses personnes. Dgilliaume le Conquérant en est ieune, et la janne fille tchi condis les gens dans l'Musée nouos dit tch'il 'tait un Français tch'avait fait la contchête d'Angliétèrre! Jé n'voulais pon la dêmenti et interrompre san discours dans l'temps, mais quand j'êcrivis man nom dans l'livre des visiteurs j'prîns l'occasion d'êcrithe - souos l'întitulement "Commentaithes" - qué l'Conquérant n'tait pon Français mais tch'il 'tait Normand!
Y'a un mais, j'vouos disais qué, dé trente-trais mille pids en l'air dans un avion à rêaction, j'avais veue eune soûffliée en l'air dé Cap Kennedy (lé cap 'tait originellement Lé Cap Canaveral, mais i' fut r'nommé Kennedy en l'honneu du Président Kennedy auprès s'n assâsinnâtion). Ch'est là tch'a 'té êtablyi "The Space Age Zone", et nou passe à côté en navidgeant La Riviéthe Îndgienne en c'mîn pour Miami. Ch'est dé là qué touos l's astronautes sont souffliés en l'air dans lus capsules pour les manoeuvrer en espace, et ché s'sa cèrtainment d'là qué les preunmièrs Améthitchains îthont pour "alleuni" sus la leune! J'allais quâsi dithe "attèrri" sus la leune, mais n'croyous pon, Moussieu l'Rédacteu, qu'ch'est eune rare opporteunité pour inventer un nouvieau mot Jèrriais?
La Zone est un empliaichement formidabl'ye. Lé bâtisse pour l'assembliément d's engîns et fusées a 52 êtages et pus d'500 pids d'hauteu. Ch'n'est pon l'pus haut bâtisse en Améthique, mais ch'est l'seul dé chutte hauteu-là qu'nou peut vaie l'pliafond d'l'aithe! Si nou lissait couorre un tournévis du pliafond, i' prandrait pus d'vîngt s'gondes à tchaie dans l'aithe! J'voudrais pouver vouos êcrithe eune bouanne description d'toutes les machinnes qué nou vait, et tch'i' font sèrvi, pour soufflier les fusées et capsules en espace, mais jé n'connais pon d'mots Jèrriais pour!
Les villes à l'entou d'la zone ont cru comme pâte au l'vain, viyant tch'il a fallu un tas d'empliyés pour y travailli. Y'en a ieune tch'a nom "Eau Gallie". Comme ou' pouvez sans doute lé d'vinner, "Eau" est pour dé l'ieau, et "Gallie" est l'nom Indgien Chippewa pour rotcheux. Lé nom en Angliais es'sait "Rocky Water". Ch'est assez drôle qué l'mot Indgien sé rappaiche phonétiquement un mio au "galot" Jèrriais.
Eune aut' ville tch'a grandi hardi viyant qu'oulle est près d'la zone est appelée "Cocoa". Jé n'sai pon comment qu'oulle a ieu chu nom-là d'donné, mais oulle est ieune des pus vielles villes dé La Floride. eune ville tch'est bein connue et qu'nou passe en c'mîn dans La Rivièthe Indgienne est "Daytona Beach". Y'a ieu un tas d'courses il y veint dans les 75,000 personnes, mais ch'nest acouo rein compathé ès 80,000 touristes tch'y veinnent touos l's ans entre les mais d'mai et d'septembre. V'la tchi m'ramémouaithe qué j'passînmes par là en moto, en c'mîn pour Miami, man fréthe Fraînque et sa femme et mé et ma fille, y'a pus ou mains trente-chînq ans. Madanme Edna Clarke-Halifax, toute janne fille dans chu temps-là, 'tait auve nous. J'avions 'té la rencontrer au baté à New York, et ou' fît la touannée d'New York - Miami - New Orleans (Louisiane) - Kentucky - Ohio - Michigan auve nous. J'nouos bangnînmes dans la fanmeuse grève Fraînque et mé et ma fille chutte fais-là.
J'espéthais aver des nouvelles dé Jèrri en arrivant ichîn, mais la dreine gâzette hebdomadaithe étant du 27 octobre, les nouvelles ont dêjà un mais d'viellèche! J'ai 'té frappé par la sagesse et l'bouan sens d'l'avocat E.H. Le Bro dans s'n êcrituthe des tchestchions tch'i' suggéthe pour la rêponse des candidats pour l'êlection d'députés et d'sénateurs. Ses idées et sentiments pour lé bein d'l'Île et des Jèrriais sont supèrbes et méthitent d'êt' prîns à tchoeu par touos les membres d's Êtats, sans pâler des candidats! Ch'est grand danmage tch'i' n'est pon dans l's Êtats li-même, l'Avocat!
J'sis content d'vaie qu'Moussieu P.M. de Veulle avait décidé d'prandre pour Député à St. Cliément. I' n'y en a pon un aut' dans l'Île pus capabl'ye qu'li. Jé n'sai pon l'rêsultat d's êlections, mais j'espéthe qué les St. Cliémentais ont ieu l'avis d'l'êlithe!
George d'La Forge
Viyiz étout: