Swansboro,
North Carolina,
U.S.A.
Lé 19 novembre, 1966.
Moussieu l'Rédacteu,
J'sommes ichîn dans la cauchie pour la niet. J'avons 'té huit jours en mé - d'la mé tchiquesfais rude et tchiquesfais calme! Quand oulle est rude nou n'peut laissi rein d'but sus aies ou tabl'yes. Nouot' pétit yacht, Storm King, est bein nommé. I' s'comporte hardi bein dans eune grosse mé. Ch'est vrai tch'il aime à s'mouoilyi l'but du nez dans les louaimes quand l'vent est contraithe et tch'i' faut les bouter à la rencontre, et s'chôl'yer quand la mé l'tape dé côté, mais comme nou s'en dêhale tréjous sans avârie au but du jour quand nous s'arrête en port pour l'amathage, nou veint à admither sa capacité pour navidgi en seûtheté!
Nou vait des navithes dé toutes les sortes en mé. L'aut' jour j'tions au Cap May en Nouvieau Jèrri, et là ch'tait pûtôt des batchieaux-pêtcheurs. Pus tard, à Annapolis, dans l'Êtat d'Maryland, où-est tch'est l'Collège Naval dé La Marine dé Dgèrre des Êtats-Unis, ch'tait des navithes dé dgèrre qué nou rencontrait en appréchant d'la cauchie, et y'avait tchiques navithes à vailes dédans tch'étaient probabl'yément là pour l'exèrcice des matelots-êtudiants du collège. Lé collège mème a d'supèrbes bâtisses. Ch'est comme eune pétite ville en li-mème. I' fut fondé en 1845 et la crypte d'sa chapelle est l'sanctuaithe dé r'pos du fanmeux John Paul Jones,"Pèthe" dé la Marine dé Dgèrre Améthitchaine.
D'Annapolis i' faut d'scendre la Baie de Chesapeake pour sé trouver à Norfolk, en Virginie. Ou' n'est pon tréjous calme, chutte baie-là, mais j'eûnmens la chance d'aver bieau temps d'dans. À Norfolk ch'tait des navithes dé dgèrre à l'ancre partout. les porte-avions U.S.S. Franklin et U.S.S. Guam 'taient majestueux en passant. dé nouot' pétit navithe, tchi n'est qu'douze pids en d'ssus du nivé d'la mé, i' pathaissaient aver quâsi chent pids d'haut!
Nou vait des pliaiches tch'ont d'drôles dé noms. Dans la Baie d'Chesapeake j'amathînmes dans la cauchie d'eune pétite ville tch'a nom Salomons. Jé d'mandis à un homme s'i' savait la prov'nance du nom. I' n'savait pon. Y'avait un amathage pour batchieaux tch'avait nom Lord Calvert Anchorage. J'lî d'mandid si chu nom-là 'tait en honneu du fanmeux whisky Calvert, mais i' savait bein qu'nannîn. Ch'est nommé d'mème viyant tch'il est dans l'Comté Lord Calvert.
Dans un canal dans La Caroline du Nord, j'trouvînmes un nom tch'est bein connu, Elizabeth City, eune pétite ville fondée en 1790. D'nouos jours oulle a eune population dé 16,000 habitants. I' s'y faîsait un grand conmèrce, pathaît-i', auve les Indes Occidentales Britanniques lé temps passé, mais v'là tch'a dispathu auve les grand' dgèrres, et sa cauchie - tchi n'gèle janmais assez pour empêchi la navigation dans l'hiver - est un dêha pour un conmèrce considéthabl'ye dé produits d'agritchultuthe.
Quâsi endrait Elizabeth City, dans un aut' canal partie rivièthe, j'nouos arrêtînmes pour la niet à côté d'un village tch'a nom Coinjock. Né v'là un aut' drôle dé nom! Ch'est l'nom d'un chef décédé dé la tribu Cherokee des Indgiens, et i' pathaît tch'i' y'a un vièr fort Indgien dans l'vaîsinné. En pâlant d'noms, les Français appellent les Indgiens des "Peaux Rouges" et les Canadiens-Français l's appellent des "Sauvages"! J'avons, étout, travèrsé lé Albemarle Sound, et j'avons navidgi les rivièthes Alligator et Pango et l'Pamlico Sound. J'n'avons pon veu d'alligators dans la rivièthe dé chu nom-là, et jé n'crai pon tch'i' y'en a dans un pays situé aussi nord comme ch't'îchîn d'nouos jours, mais ch'est seux qu'la rivièthe en 'tait plieinne dans les vièrs temps.
Eune chose qué nou s'appèrchait est qué l'temps s'êcauffe à m'suthe qué nou continnue en direction sud. en Virginie i' fallait mett' sa cravate lé tout du co. À ch't heu nou c'menche a vouler êt' à la c'mînse! L'Êtat d'La Caroline du Nord est bé. L'couochi du solé au sé et l'temps doux m'font penser à L'Êta à St. Ouën en êté quand nou vait l'solé s'couochi entre lé "blockhaus" où-est tch'était la tour, et L'Êtacqu'sé. Quand j'pense à L'Êta, v'la tchi m'ramémouaithe qué j'n'ai pon d'nouvelles dé Jèrri dépis qué j'm'en fus à Londres y'avait un mais jeudi passé. Ouaithe qué j'mé pliais bein en viage - sustout en mé - chu mais-là m'a pathu bein long sans nouvelles, et j'ai envie d'arriver en Floride, où-est qué j'sis seux d'trouver des lettres à m'attendre.
À bord du yacht i' n'manque pon d'nouvelles. J'avons radio et télévîsion à nouos garder au râs dé tout ch'tchi'i' s'pâsse en Améthique et dans l'monde entchi, mais j'nouos en faîsons prîncipalement pour ouï tchi temps qu'j'avons l'avant à nous. La direction du vent nouos întérêsse hardi. Ouaithe qué l'vent n'est pon si împortant pour nous comme il 'tait pour les navithes à vailes, y'a des pâssages tchi n'ont pon grand' profondeu dg'ieau, et un vent d'côte peut vouos chavither assez pour embêter l'couque quand il est à êprouver à faithe d'la soupe!
George d'La Forge
Evening Post
Viyiz étout: