Mousieu,
Je pense bain quou n'me connaissiz pon, car je n'hampionne pon souvent jusqu'en ville; j'ai des rhumatis, de maôudits ahans qui m'empêchent quasi de gabarer. Mais quique je n'sorte pon fort de d'siés nous, va qui n'm'empêche pas de lière vot gazette viron touos les Samedis aux siers; not fille Suson nos l'apporte quand ou va vendre nos dairaies au marchi, et ou me faites quique fés rire tant que, j'en jure, j'aimerais mus me passer d'un bouan fricot, vere madé, même de ma prinse de sno, que d'être obligi de passer ma seraie sans vot gazette! Il arrivi une bordaie à chutte pouore chrêtianne d'ervenin de la ville sans l'apporter: sou m'aviez veu: j'tais comme un pêsson hors l'iaôu; j'en tais dans une diverse ire chutte fés la! j'sies seux qui n'y a vitupères que je ne lus disse! Ma femme fit tout chain quou peut pour me tranquilliser: ou me fit, se me fit-alle: Eh! man Jacques, ne te maris pon, man chier Jacques! Tu sais bain que la pouore hardelle ne l'a pon fait exprès; oul avait pus afaire anniet que d'amors; oul a tai à la Verte Porte te traichi du sno, man chier, car tu n'en avaie brin dans tan pot: oul a accaté étout de la couorinte pour faire de la gâches pou le Jeu de l'an; et qui pus est, oul a criai sies les couosin Bernabai pour lis demander si pouvait nos épaingni quique cercles pour erlier nos futailles. Chest-en-qui, ne la hoingne pon d'aoûtre, la chière êfant: tu vé quoul est toute trembliante, chest assez pour quoul en ait du ma. - Eh ben! eh ben, se lis fis-je, je ne dirai pus mou. La dessus j'allumi ma pipe, et m'en alli à l'hus, oué je resti un p'tit brin, et en oprès j'alli me rouoler pour ne pus r'penser à chu chier Concionnel.
Mais maougré que je nos counaissions pas, ou z'avais deu connaitre man bouan homme de père, vous? I vendait des saôulers au marché, et ou l'iavauz veu bain des fés, n'y a pas de doute. Le pouore vi, au repos du bouan Dii set-i, avé pus d'octante ans quand i halli en rade et s'en alli. J'ai oui que quand i happi une femme i disait que sou lis baillait des avers, i lus donnenait une bouanne education. Oul en oeu deux: ma soeu Susanne et mé. Et ainchin qui l'avait dit, je fûmes enviais sies la vieille Manon Braie qui gardait école à la Bretonnerie, oprès le Clios de Pauvres, à St. Saôuveux. Chutte bouanne vieille femme là nos apprint à épeler a liere et a écrire un mio, tant et si bain que le p'tit, de sciènche que j'ai, chest à la vieille Manon que jel dé. - Mais pour revenin à vous, Mousieu l'Editeu - j'oué bain souvent devisier de vous sies nous; car ou connaissiz nôt vêsin Judion Chouquet, n'y a pas de doute? I vos connait bain li tréjous, et ou pouvais compter dessus, ch'est iun de vos vrais ammins, ch'tinna. - Eh ben, san fils vaint siès nous quasiment touos les siers, car ou savaiz la oué, il y a de jeunes drinnettes, y a tréjous de l'attrait; eh, quément; savons-je pon bain commest qu'il y faisait dans not jeune temps? I faoût bain que jeunesse s'acquitte. - Comme je vos disais, le garçon vaint bain souvent siès nous le sé, et viyant que j'aime a savé les nouvelles, i m'apporte parfés la Chronique. Samedi, qu'était le bouan Jeu de Noé, i vint pour passer sa seraie ov nous et i m'apporti la gazette du Vier Marchi. Je vos ai apoortai la Chronique, s'em dit-i; je sé bain quou n'vos en souciaiz pas trop, mais viyant que les Etats vainnent de passer un projet de loé au sujet du nouviaou chimetière de St. Saôuveux, et qu'il y en a un long libelle dessus, j'ai pensai que va qui vos amusezait - Bon, je coule ma main dans ma paoûte pour traichi mes lunettes, car la veue m'emple d'iaôu, et jen'serais liere sans. Bon, pas de lunettes, Ach'teure que faire? Peggy, se fis-je à ma femme, ouès donc que tu as mins mes lunettes? je ne serais les trouver. - Je n'les ai pas touchies tes lunettes, man chier, se me dit-alle; eh, quément, se fit-alle, en me regardant, et en s'sgouffant à rire: tu les as sus le front! Demandaiz si je resti ebahi, mais je n'en sonni, sem'nâge, pas le clairon.
Enfin v'la mes lunettes ajûtais, et oprès avé prins une pipaie de pt'un, je passe man chipaôudé a not vêsin, pour qu'il en halle étout une ôquie: en oprès chonna je m'mets à liere chu Projet de Loé. Quand je vins à l'Article 16, je vis que, “le temps à venin les Catholiques et les Dissidens pouorront faire enterrer lus gens dans chû nouviaôu chimetière par un Ministre de lus criyance.” Tout chonna est bain bon, je sies pour de mé pour que ches gens la saient traitais comme des Chrêtians et comme des Frères. Mais ch'est qu'il y a aôutre chose: j'ai oui que d'oprès la Loé sus les Enterrements, le Ministre qui fait un enterrement est obligi de signi san nom sus l'Registrte de la Parêsse, quand le corps a tai mins en terre. Va qu'est bain bon; mais je suppose qu'un Catholique ou Dissident vaine à mourir, et qu'un Prêtre Catholique ou un Ministre Dissident faiche l'enterrement et qu'en oprès i n'appose pon san seing sus le Registre, l'extrait d'une telle enterrement ssait i vâliable? Car ch'est que je connais mé un cas ouès qu'un vier Irlandais s'en alli dans l'aôutre monde, et fut enterrai par un Prêtre Catholique; mais le Prêtre ne signi pas l'enterrement, et ne l'a jamais fait; acheteu l'extrait de l'enterrement de chu vi là 'ssait-i bon à quique chose? ch'est que je ne l'cré pas, mé; car si faôut envier l'extrait d'un enterrement en Angleterre, si la signature du chain qui l'a fait n'y est pas, j'ai tréjous oui qui n'vaôut ren. - Et pis oprès, je suppose que le Recteu ou Viquaire de la Parêsse vainne à mouorir et laisse sus san Registre quiques enterremens qui n'saient pas signies, qu'est que le chain qui le remplièchecha pouora penser? I n'pôuora pas manqui de trouver chonna drôle. I dira, ou s'en le dit pas, il l'pensa, que l'aoûtre tait un vier piercheux, un vier begaôud, qui laissait tout couore, sans se mettre en peine commest quel s'affaires allaient.
Et ou viiz, tout ch't'inconvenient-là nessait pon, si nos grosses têtes avaient seulement sonji à ajouôté à lus article 16: “Et tout Prêtre Catholique et Ministre Dissident, oprès qu'il era fait un enterrement et quou 'ssa enregistraie, 'ssat obligi d'y apposé son seing.”
Si un Prêtre Catholique ou un Ministre Dissident enterre iun des siens dans le Chimetière de St.-Saouveux, et si n'est pas obligi de signi l'enterrement dans le Registre Parêssial, que nou li en baille un aoutre donc, car i m'est avis qui n'est pas fair que toute la bliâme erquès sus le co du Recteu ou Viquaire, si s'trouvent sus san Registre des omissions dont i n'est pas la caôuse.
Crious pon, Monsieu l'Editeu, que chonna devrait être décédai? chessait le moyan d'éviter hardi d'inconveniens - ch'est la m'opinion tréjous, à mé; mais p't'être qu'ou diraiz qué jé r'dotte; qu'un pouore hampion qu'est vi comme la Rue des Alleurs, devrait penser à aôutre chose qu'à des Projets de Loé - ou z'ériez p't'être raison de l'dire; mais excusaiz.... j'espère qui n'y a pas de faôute.... je ne voudrais pas vos faire mârir pour tout le p'tun de la Vrégine. - Ma vieille Peggy, quia oui quou z'êtes marié, fait bain ses r'commendations à Madame vot femme, et vos souhaite à toues les deux une bouanne annaie, et mé étout, et de bouan coeu, mafé; et j'vos souhaitons par sus le marchi.
Comme i ien a qui dient:
Une Bourse bain guernie!!!
Je sies, &ct., vot. Serviteu,
Jacques Coignard dit Patouoillard.
St. Saouveux, Déc. 28e. 1847.
Viyiz étout: