Fort Lauderdale, Florida,
U.S.A.
Lé 29 dé novembre, 1975.
Moussieu l'Rédacteu,
M'èrvélà dans les pays cauds, il avait g'lé ma dreine niet dans l'Michigan, mais deux heuthes et d'mie en avion par dessus l's Êtats d'Ohio, Kentucky, Tennessee et Georgia - eune affaithe dé tchînze chents milles - m'am'nîdrent ichîn où'est qu' la chaleu du bieau solé vouos rêcauffe les sangs. J'pensais qu' la nécessité d'couoyer la pêtrole éthait p't-êt' réduit l'nombre d'motos par les c'mîns dans chutte ville dé Fort Lauderdale, mais i' m'sembl'ye tch'i' y'en a acouo pus dans les rues, et nou-s-en vait tchi veinnent dé quâsi touos l's Êtats du nord dé l'Améthique et du Cannada. Sans doute, tout l'Cannada est au nord des Êtats-Unis, et il y fait eune fraid d'tchian dans l'hivé. Tout l'monde des deux pays tchi peuvent y'affaûrder veinnent passer un mais ou deux au solé d'La Floride pour raccourchi un mio l'hivé. Y'a sans doute d'aut' êtats tchi jouissent d'un hivé pûtôt ensolilyi et raisonnabliément caud, comme lé Texas, la Louisianne, Mississippi, Alabama, la Caroline du Sud et Georgia, et l'hivé n'est pon fraid en Califournie.
Quant à mé, j'mé d'mande tch'est qué j'sis à faithe ichîn, si liain d'Jèrri, quand j'pouorrais êt' à joui d'la campangnie d'touos m's anmîns là-bas, et à m'caûffer au pid d'l'âtre d'la salle dans l'Ménage ès Feuvres à la pliaiche d'êt' à m'caûffer à l'arsion du solé ichîn. Eh bein, jé n'sai pon trop bein. Est-ch' qué j'sis réellement lé Pigeon Voyageur qué l'monde m'ont donné comme titre? J'pense bein qu' oui. Mais la grand' raison est qu' toute ma fanmil'ye, êfants, p'tits êfants, fréthes et soeu, sont tous d'chu côté 'chîn d'la mé, et qué j'n'aime pon m'êcarter d'ieux toute l'année - sustout comme j'nouos vieillisons, trais d'nous (fréthes) ayant dêpassé la huiptantaine. Quand j'ai pâssé tchique temps auve touos ieux, j'aime bein m'en r'aller en Jèrri j'aime bein m'en r'vénîn les r'vaie en Améthique! Mais mes pensées r'vont souvent en Jèrri.
N'împorte où'est qué j'sis, j'pense au pâssage du temps et à la vie trantchil'ye dé mes p'tits jours quand les fanmil'yes 'taient grandes et qu la vie s'pâssait en fanmil'ye dans les mênages dé la campangne. Les gens brûalent des couépieaux et du vrai dans l'âtre d'la salle et fouângnaient l'pain, des galettes à vrai et des gâches à fouée dans l'fou à côté. I' l'caûffaient atout des fagots d'bouais êpilé des bouais sus les fossés, tchi dév'naient têtards. Siez nous, lé tro à pétri faisait sèrvi d'tabl'ye. Y'avait un banc d'châque côté pour s'assiéthe ès r'pas. La filyie 'tait dans la carre à côté d'l'atre.
Lé râclyi, atout san pain et jambon, 'tait à sa pliaiche suspendu à la poutre tchi supporte lé pliafond, et quand Papa et Manman 'taient gênés viyant qu' la saison d'patates n'avait pon 'té bouanne et qu' les fèrmièrs d'alentou n'payaient pon lus comptes, Papa dîsait à Manman: Né t'gêne pon, don, Ann, y'a acouo du pain sus l'râclyi! L'crâsset 'tait à sa pliaiche, ouaithe qué les lampes à paraffinne avaient c'menchi à s'faithe sèrvi, et la salle pathaîssait hardi comme la tchuîsinne Jèrriaise au musée d'La Société Jersiaise.
Dans mes p'tits jours, la fèrme tch'avait 'té faite valer pûtôt pour les bésoins d'fanmil'ye dans les pus vièrs temps, 'tait dév'nue affaithe commèrciale, car la tchultuthe des patates 'tait profitabl'ye. Mais les garçons piésnés allaient acouo en mé et à La Côte travailli pour les Robîns, les Früings et les Boutilliers. Lé grand restait pûtôt à travailli sus la fèrme auve san p'pèe. Ch'tait à s'n întéthêt viyant tch'i' s'en allait l'héthiter pus tard.
Quand j'vai les moto-cyclettes tchi vont quédaine dans les rues ichîn, et tchi font un brit à vouos dêfoncer l's ouothelles, j'pense à la preunmié machinne à pedales que j'ai connue en Jèrri y'a huiptante ans. Oulle avait eune grand' reue et eune toute pétite. Oulle 'tait appelée Penny-Farthing en Angliais, et l' cycliste 'tait jutchi sus l'haut d'la grand' reue et i' n'en fallait pon fort pour lé faithe tchulbuter et s'rompre l'nez! I' n'y avait pon fort dé jannes hommes dans la campangne tch'avaient l'mouoyen d'en acater ieune.
Lé Jersey Railways and Tramways Limited, et lé Jersey Eastern Railway 'taient êtablyis dans l'Île, mais un tas d'mousses tchi d'meuthaient dans les pâraisses du nord n'avaient pon veu l' train. Papa l'appelait eune carrosse tchi va sans j'vaux et m'em'nit l'vaie à Bieaumont viyant qu' j'avais 'té un bouan garçon.
Ou-s-allez p't-êt' mé dithe - et atout bouanne raison - qué j'vouos si raconté tout chenna d'vant. Pardonnez-mé pour autant, s'i' vouos pliait. I' n'y à qu' chîn s'maines qué j'ai tchitte Jèrri, et mes pensées sont acouo pûtôt là qu' ichîn, et ma vieilleche sé console probabliément en reunminnant entouorre lé bonheu d'ma jannéche ès Landes à St. Ou.
George d'La Forge
Viyiz étout: