Atlantic City, New Jersey,
U.S.A.
Lé 12 novembre, 1966.
Moussieu l'Rédacteu,
Comme ou' l'viyiz, j'sis à vouos êcrithe du Nouvieau Jèrri. J'sommes en mé, m'n anmîn l'Cap'taine Joseph Gehrlein et mé, d'pis hièr à méjeu, dans san yacht Storm King. Dé vièr chîntch heuthes l'arlévée j'passînmes lé phare dé Sandy Hook, et j'amathînes dans la cauchie du Atlantic Highlands Yacht Harbor pour la niet. À matîn, j'tions en mé à siex heuthes un quart et nouos v'la dans la cauchie dé chutte belle grand' ville. Lé temps dans l's Êtats d'La Nouvelle Angliétèrre n'est pon trop bé mais, ma fîngre, la mé n'est pon trop rude dépis hièr matîn. J'avons ieu d'la bliâse et d'la plyie à matîn.
Ch'est mé tch'est mousse et couque à bord, et v'la tch'i' m'fait penser ès pouorres dgiâtres d'mousses tch'allaient en mé à l'âge dé treize ou quatorze and dans les navithes à vailes et tch'êprouvaient à graie des r'pas pour cap'taine et naviguants. À c'menchi, i' n'lus y r'connaîssaient pon fort. Souvent il' 'taient malades comme des tchians, et la tâche 'tait prèsqu'împossîbl'e auve lé mouvement du navithe. en ont-i' souffèrt, les pouorres vièrs anchêtres tchi navidgeaient! Dans chu p'tit yacht ichîn la vie est pus aisie, atout l'êlectricité et toutes les c'mmodités. Et ch'est plaisant d'êt' à navidgi l'long d'la côte du Nouvieau Jèrri car mes pensées s'envolent d'ichîn à man vièr Jèrri et j'mé d'mande tch'est tchi s'passe là-bas dépis qué jé l'tchittis y'a quâsi un mais. V'là tchi m'pathais bein pus longtemps, car j'n'en ai pon 'couo ieu d'nouvelles - et j'n'en éthai pon pour trais s'maines car i' s'en va prendre chu temps-là à faithe lé viage au drein port d'arrêt - Fort Lauderdale, en Floride. Tch'est tch'a gangni à l'Eisteddfod? Ont-i' vendu un tas des supèrbes dictionnaithes à Fraînque Le Maistre? La saison des brécolis est-alle quémenchie, et les prix sont-i' bouans? Tch'est tch'a gangni les êlections? Né v'la des tchestchions tchi m'veinnent à l'idée. Quant ès êlections, jé v'nons d'en aver en Améthique étout, et comme d'amors y'a des gangnants et des pèrdants. Les consèrvateurs (parti Républicain) ont r'gangni gentiment d'pliaiches dans l'Congrès tch'il' avaient pèrdu dans l'êlection pour Président quand l'Président Johnson (parti Démocrate et Socialiste) gangnit auve eune grand' majorité et anm'nit en mème temps la victouaithe à un tas d'candidats d'san parti. Quant à mé, j'n'ai janmais ieu honte dé procliâmer à tout l'monde qué j'sis consèrvateur dans l'âme!
À bord d'un navithe, nou-s a tout pliein d'temps à dormi et penser quand nou n'est pon d'quart, et mes pensées sont souvent des vièrs temps en Jèrri et d's êlections d'chu temps-là. Quand j'tais mousse à St. Ouën, un temps d'êlection 'tait un temps d'fête pour grands et p'tits. Sans doute, les p'tits n'avaient pon d'vouaix, mais il' avaient la chance dé ouï la musique (nou disait la "Band" comme en Angliais, dêjà dans chu temps-là) jouer en d'houors des tentes près d'la Salle Parouaissiale, et dans des temps y'avait la chance d'aver eune boutelle dé limonade!
Les partis - Lé Louothi et La Rose - n'étaient janmais seux d'lus vieaux. Y'en avait des deux côtés, et i' fallait êt' rûsés pour sé faithe seux dé tchi bord qué l'vieau s'en allait voter, car nous n'savait janmais létché des deux partis tch'avait donné l'pus d'sou. comme lé vote 'tait au scrutin i' fallait înventer tchique maniéthe dé s'faithe seux. J'm'èrsouveins qu'eune fais iun des vieaux des Louothièrs fut arrangi comme s'il avait la gambe rompue. I' li mîndrent deux mios d'bouais à la garder draite, et des bandages tout l'tou, et pis i' l'assiévîdrent dans eune cârrosse atout la mauvaise gambe alouangnie. Arrivés à la Salle Parouaissiale, i' fallait qu'si l'Autorisé (quâsi tréjous un Juge) pour v'nîn r'corder la vouaix du souô-dîsant malade - tch'avait 'té dgèrni dé dithe à haute vouaix pour tch'est tch'i' votait. Quand i' donnait l'nom d'san candidat à plienne vouaix, lé Juge lî dîsait, "I' n'faut pon l'dithe en haut d'mème!", mais il 'tait trop tard et la vouaix 'tait légale et les Louothièrs 'taient seux d'lus coup!
Eune maniéthe d'empêchi un êlecteur dé voter quand l'parti opposé n'tait pon seux d'li et tch'i' n'y avait pon mouoyen d'en faithe un vieau, était d'l'enivrer et dé l'prom'ner dans eune aut' pâraisse jusqu'à tch'i' fûsse trop tard pour voter!
Quand les vouaix 'taient cartchulées d'vant l'êlection par les têtes dé parti comme étant à bein près êgales d'un côté comme dé l'autre, lé parti gangnant 'tait pûtôt l'chein tchi pouvait dêbourser l'pus d'sou pour acater l'pus d'vieaux! J'dév'thais p't êt' explyitchi qué ch'tait des vieaux à deux pids - ch'tait l'nom donné à un êlecteur tchi 'tait payi pour voter!
George d'La Forge
Viyiz étout: