San Antonio,
Texas, USA.
Lé 28 dé janvyi, 1978.
Moussieu l'Rédacteu,
Ch'est mèrveilleux comme nou s'accouôteunme au changement d'pâtuthe sans y vaie grand' difféthence point d'veue d'jouissance dé la vie ordinnaithe. Y'en a tchi disent tch'i' n'peuvent pon dormi comme i' faut la preunmié niet tch'i' couochent dans un liet êtrange. Eh bein, quant à mé j'peux dormi autchun bord, même dans l'aithe! Et j'aime mus un liet tch'est dû qu' iun tch'est mo. Ch'a tréjous 'té d'même dépis qu' j'allis à la dgèrre dé 1914-1918. Ch'est r'mèrquabl'ye comment que d's habitudes dé même duthent longtemps. Là, sans doute, sus l'camp d'batâle nou s'accouôteunmait à dormi autchun bord et sus la tèrre comme sus la pièrre. Eune taile (“waterproof sheet”) vouos gardait raîsonnabliément sés s'i' y'avait d'la mouoillêtuthe. Nou dit qu' ou n'est pon rein d'bouan pour les cheins tch'ont des rhonmatisses, mais quand nou-s-est janne nou peut s'enduèrchi au bésoin à tout, et nou n'y prend pon d'avis.
Chose êtrange assez, y'a ieu pus d'mouoillêtuthe en Floride ch't hivé qu' d'habitude. Comme j'l'ai souvent mentionné, j'sis convaintchu qué l'clyînmat est en changeant partout l'monde. Y'a ieu hardi d'plyie ichîn au Texas étout. Pour lé moment, lé temps est bé et ensolilyi mais gentiment frais. Il est supèrbe pour marchi et s'promener.
J'veins d'érchéver la gâzette dé Jèrri du neuf dé dézembre ouaithe qué les cheinnes du 18 dé novembre et du deux d'dézembre né sont pon 'couo v'nues. J'vai tch'i' i' y'a ieu mauvais temps en Jèrri étout et qu' les stînmes ont ieu fort à faithe à crouaîsi la Manche. I' sont à aver eune vraie avalanche dé né au Cannada et dans l'Etat d'Michigan étout. Dans eune lettre èrchue d'man fréthe Fraînque à matîn i' m'dit tch'il' en ont ieu eune êpaîsseu d'quarante pouces d'en par ichîn et tch'il a ieu à embauchi d'aîgue pour en clièrgi assez pour aller à san garage et à la route.
La gâzette du neuf dé dézembre est plieine dé rapports entouorre les finnances dé l'Ile et d'l'apèrchu et des portraits des Sénateurs Cyril Le Marquand et Ralph Vibert et du Sieur Colin Powell. L'portrait tchi m'a frappé l'pus est l'chein du Sieur Ernie Gaudin et d'sa favorite vague. Il a un charmant souôri sus sa fache, et la vaque pathaît heutheuse d'êt' auve li. Oulle a raîson - san maître est un fanmeux Jèrriais et un charmant corps tch'a prouvé sa valeu comme fèrmyi et tch'a en même temps sèrvi san pays auve distînction comme homme d'êtat pour bein d's années, un sèrvice tch'est souvent oubliyé par lé monde eune fais qué l'sèrviteur s'est décidé dé n'pus combattre en politique, sachant qué l'chein tchi sèrt lé publyi sèrt un îngrat!
I' faut féliciter l'Sénateu Cyril Le Mèrquand pour aver si bein prépathé s'n apèrchu et l'aver ieu adopté, quâsi sans ardgûment. I' n'y'a pon d'doute qué s'n avis d'aller douochement auve les dêpenses à l'av'nîn est bein à propos. Mais chein tchi vouos frappe en liêsant lé rapport dans la gâzette est qué toutes les dêpenses proposées par châque conmité fûdrent acceptées presque sans oppôsition. Nou-s-éthait creu qu' auprès l'avèrti d'aller douochement les membres éthaient proposé eune réduction d's apèrchus, car y'a tréjous l'dangi qu' les conmités d'mandent pus tch'i' n'ont bésoin pour êt' seux d'en aver assez en cas d'réduction par l'assembliée d's Etats.
Eune chose tchi n'a pon cause dé félicitâtion est qué la mauvaîtchi dans l'Ile s'agrandit à la pliaiche d'amender. J'vai, en liêsant les débats dans la Chambre, tch'i' y'avait eune mouoyenne dé chînquante-sept malfaiteurs par jour en prison en 1976 et qué v'la tch'avait augmenté à souoxante-trais par jour en 1977. Si l'affaithe continnue, L's Etats s'sont d'mandés d'autorîser un agrandissement d'chutte prison. Est-ch' qu' ou s'sait si confortabl'ye qué les malfaiteurs lus y pliaîsent? A m'n idée il est grand temps dé les r'mettre à câsser d'la pièrre. I' pathaît qué les travaux forchis n'existent pus. Ch'est grand dammage. Ch'n'est pon la peunnition d'aut' fais d'êt' en prison. La preuve en est qué, dans ieun des gâzettes èrchues dreinement, j'liêsais qué l'Juge dé La P'tite Cour est d'avis tch'i' faudrait appointer un traîsième Juge pour chutte cour-là.
Tchi difféthence dé y'a eune souoxantaine d'années! Quand j'tais Commis Vicomte ché n'tait pon souvent qué l'Juge Vaudin né pouvait pon jugi les causes dévant li dans l'couothant d'un d'mié jour!
George d'La Forge
Viyiz étout: