J'avons décidé d'raconter eune histouaithe dé Nouvieau Jèrri - l'histouaithe du Dgiâbl'ye dé Jèrri.
Au jour d'aniet ch't êtat Améthitchain est quâsiment couvèrt d'villes et d'mannifactuthes. Mais y'a eune contrée là-bas tch'est acouo sauvage: dans l'Sud d'l'êtat, y'a d'grandes forêts d'pîns où'est qu'les Îndgiens d'la contrée avaient 'té êpeûthés par eune manniéthe dé dragon d'pis les touos vièrs temps.
Les colonnistes dataient l'appathition du Dgiâbl'ye dé Jèrri à mille sept chents trente-chînq, quand eune cèrtaine Missis Leeds, duthant les douleurs dé donner naîssance à san treizième êfant, maûdit lé nouvieau né. L'êfant fut changi dans un tèrribl'ye monstre auve la fache d'un j'va, l's ailes d'eune caûque-souothis, eune coue fourtchie et des chabots. Chu Dgiâbl'ye s'envolit amont la cheunm'née et s'en fut d'meuther dans la forêt. I' soulait tuer les vaques et les brébis ès fèrmièrs pouor san mangi.
Lé Dgiâbl'ye rencontrit d'la rouoyauté au dgiêx-neuvième siècl'ye quand l'fréthe à Napoléon, Joseph Bonaparte, l'ancien Rouai d'Espangne, lé vit en allant à la chasse. Mais nou n'pouvait janmais happer l'Dgiâbl'ye pa'ce qu'les tchians r'fusaient dé siéthe ses pas.
Au mais d'Janvyi mille neu chents neuf y'eût eune sémaine quand l'Dgiâbl'ye dé Jèrri fut veu par pus d'mille pèrsonnes tout l'travèrs d'la contrée. Nou dit étout qu'lé Dgiâbl'ye appathut avant l'attaque sus Pearl Harbour - ch'fut un avèrti.
D'pis chu temps-là, y'a ieu des gens tchi dithent qu'il' ont veu l'Dgiâbl'ye et acouo pus tchi dithont qu'il' ont ouï la bête hueûler hôrribliément dans les forêts, et y'a même des jannes gens d'achteu tch'y vont chèrchi chu monstre auve lus caméras et tchi mettent lus photos sus l'Ithangnie. Et l'êtchipe dé hockey sus gliaiche a nom “New Jersey Devils”!
Lé Dgiâbl'ye dé Jèrri, ch'est-i' un démon? Ou eune criatuthe înconnue qu'la scienche n'a janmais dêcouvèrte jusqu'achteu? Ou p't-êt' y'a eune fanmil'ye dé ptérodactyls tchi sont acouo vivants, muchis dans les forêts d'pîns en Nouvieau Jèrri?
Viyiz étout: