En Améthique,
lé 5 dé juin, 1964.
Moussieu l'Rédacteu,
L's aut' sémaines, j'vouos ai pâlé d'Jèrri dans man janne temps. Chutte sémaine j'ai pensé qué tchiquechose concèrnant l'Améthique pouôrrait p't êt' întérêssi vouos lecteurs.
L'aut' sé, j'êcoutais un moussieu - j'pense tch'il est candidat pour Sénateu - faithe un discours entouor la politique Améthitchaine. Né v'chîn chein tch'i' nouos dit: "Quand l'pays fut dêcouvèrt, l's Indgiens 'taient à l'gouvèrner. N'y avait pon d'dette nationale, ni d'taxes, ni d'politiciens, ni d'bandits, ni d'împot sus l'èrvenu. I' n'fallit pon rempl'yi un tas d'formes et d'papièrs dévant pouver faithe autcheune chose, et les femmes faisaient tout l'travas! Et nouos anchêtres criyaient tch'i' pouvaient amender sus ch't êtat-là!
Tchi belle vie qu'j'éthions aujourd'aniet s'il' avaient continnué l'mème système! L's hommes n'éthaient pon à négrer lus vie pour gangni des sou pour payi eune multitude d'împots à un 'Welfare State', et i' pouôrraient aidgi ès femmes à faithe lé mênage. I' n'y éthait pon fort à faithe viyant qu'nou s'sait à d'meuther dans des 'Ouigue-Ouammes' - des manièthe dé tentes - et nou n'éthait pon à s'mett' fort d'habits sus l'dos. Nou pouôrrait aller à j'va ichîn et là, à la pliaiche d'aver à payi eune pétite forteune pour acater un moto. Nou n'éthait pon à soudarder. Nou laîs'sait l's Indgiens lus entre-battre auve la aut' tribus et restéthait à feunmer sa pipe dé paix dans les ouigue-ouammes!
Touos les bisons, cruëllement et bêtement tués par nouos pionnièrs pour faithe valer lus pieaux, éthaient continnué à vivre et éthaient multiplyiyé, etnou pouôrrait laîssi l's Indgiens en tuer tchitchuns au bésouain pour fourni d'la viande. À la pliaiche dé ch'la nouos anchêtres s'abûsaient à tuer les bisons et l's Indgiens étout! À ch't heu, chein tch'en reste, d's Indgiens, peuvent vivre à rein n'faithe dans lus rêsèrves. Et i' l'méthitent bein! Quant à nous i' faut travailliu, pas tant pour sé-même, mais pour maint'nîn eune bureaucratie d'êtat tchi grandit touos les jours!
Si j'nouos étions accouôteunmés à vivre auve l's Indgiens, et comme ieux, i' n'y éthait pon ieu d'gens tch'éthaient fait assez d'sou pour acater d's escliaves et touos les nègres es'saient en Afrique, bein heutheurs d'êt' siez-ieux! Quant à ch'la, i' n'faut pon oublyiyer qué les nègres Améthitchains, ouaithe qu'en nombre i' n'sont qué dgix pour chent d'la population, ont pus d'motos qué touos les Russes en Russie mîns ensembl'yes! V'là tchi montre tch'i' n'dévent pon êt' trop malheutheurs ichîn!
En pâlant des Russes - Comme nous, i' veulent êt' les preunmièrs à aller à la Leune. J'né s'sons p't êt' pon les preunmièrs à y'aller, mais ch'est bein seux qu'les cheins tch'y s'sont lus trouv'thont à tchiquechose quand i' s'sont d'ssus, et qué s'il' ont bésouain d'aîgue ché s'sa nous tch'éthons à lus porter s'cours! mais, r'vénons ès Russes: Quant à mé, bouann' gens, j'les laîs'sais y'aller tous, mé, à la Leune - hommes et femmes et toute la boutique. Et y rester! Ché s'sait eune mangnifique pliaiche pour ieux à pratitchi lus communisme. I' pouorraient, étout, prêchi lus êvangile dé Marxisme et d'co-existance à tchoeur-content à l'Homme dé d'dans la Leune, à la pliaiche d'êprouver à nouos faithe l'avaler ichîn!
Sans doute, nouot' gouvèrnément actuel nouos dit qué j'n'avons janmais ieu la vie si belle! Et les grosses têtes des sŷndicats d'ouvriyèrs nouos disent la même chose. I' dév'thaient saver, car nouos gâzettes nouos disient tch'i' sont souvent învités à baithe du thée à la Blianche Maîson!
Viyant qué l'gouvernement Angliais laîsse lé monde aller à l'hôpita, malade ou faîsant la minne d'êt' malade, pour rein, et lus donnent des boulets, d'la méd'cinne, des leunettes et des fausses dents pour presque rein, nouot' gouvèrnément crait qué j'dév'thions en faithe autant ichîn! Eh bein, à mains qu'ou' n'avez la tête viède, bouann' gens, ou' savez bein tch'i' n'y a pon telles chose comme 'rein pour rein'! Si j'avios continnué auve l's Indgiens, lé 'Medecine Man' éthait souangni les malades sans lus env'yer un compte pour la visite, mais il éthait fallu lî donner eune demié-douzaine dé cocannettes!
J'avons un tas d'malfaiteurs dans l'pays, et nouos mousses sont d'pus en pus difficiles à mênagi. et i' veulent garder lus j'veux longs à ch't heu, viyant qu'eune demié-douzaine d'êmânus Angliais nommés 'Beetles', ou tchiquechose dé même, tch'avaient bésouain d'aver lus j'veux copés, sont v'nus ichîn chantonner un tas d'bargouaîchîn tchi catouôlle lé tchoeu à nouos jannes hardelles tchi n'savent pon mus! Nouos Justiciers nouos disent qué l' 'Crime né paie pas!', mais i' n'y a pon un aut' pays au monde où'est qué l'criminel a atchumulé autant d'sou comme ichîn! I' m'veint à l'idée qué la seule manièthe dé s'asseûther qué l'crime né paiethait pon es'sait d'en donner l'mênagment ès bureaucrates du gouvèrnément!
Jé n'prétends pon pouver r'mièdgi tout ch'la, mais s'ou votez pour mé j'm'en vaie y'êprouver!"
Dgieu Mèrci, Moussieu l'Rédacteu, qu'ou' n'avez pon nouos problème en Jèrri! Ou c'mench-ous à l's aver?
George d'La Forge
Viyiz étout: