Jupiter, Florida
U.S.A.
Lé 26 d'novembre, 1966
Moussieu l'Rédacteur.Nouot' viage nouos a montré, en pâssant, des villes fanmeuses dans l'histouaithe des Etats-Unis d'Améthique. Entr'autes, j'avons arrêté à Georgetown, dans la Caroline du Sud. Ch'tait la preunmié pliaiche à aver un run êtablyi par des gens d'Europe sus l'continent d'l'Améthique du Nord au nord du Méxique. Ch'tait en 1526, et ches gens-là 'taient d'Espangnos. Lus chef 'tait Lucas Vasquez de Ayllon. Ouaithe tch'i' trouvîdrent lé pays bé et l's Indgiens av'nants, il' attrapîdrent des fièvres et lus en r'allîdrent en Espangne. Les préchaïns à s'arrêtèr-là fûdrent d's Angliais - en 1705 - et il y restîdrent. Lé fanmeux Français, Lafayette tch'aîdgit ès Améthitchains à gangni lus dgèrre d'îndépendance, y d'meuthit. Dé là, la d'mouaîselle Theodosia Burr allit à bord d'un navithe tch'avait nom Patriot pour aller en Europe qu'si san p'pèe. Aaron Burr, pour lé ranm'ner en Améthique. Chu navithe-là dispathut sans laîssi autcheune trace, et pèrsonne n'en a janmais r'ouï pâler. Il est probab'lye tch'i' fut naufragi en plienne mé au large du Cap Hatteras, mais pèrsonne né l'sait pour seux - ch'est iun des grands mystèthes dé la mé.
Dans l'temps d'la dgèrre civile, la cauchie d'Georgetown fut d'fendue par eune bat'tie d'seize canons montés dans eune fèrme à côté. La bat'tie fut dêtruite par l'Amitha Dahlgren, mais sa frégatte fut coulée par eune mine, et nou vait l'haut d'sa cheunm'née acouo aujourd'aniet à me bâsse !
Eune aut' ville tch'est întérêssante et historique est Charleston, dans La Caroline du Sud. Lé fanmeux Fort Sumter est situé dans la baie à côté d'la ville. Ch'tait contre chu fort-là qué l'preunmié coup d'canon tchi fit la dgèrre civile s'êcliater fut tithé lé 12 d'avri, 1861. Chutte dgèrre-là - entre l's Etats du Nord et l's Etats du Sud - duthit quatre ans. I' pathaît qu'au mains chînquante mille personnes visitent le fort touos l's ans. I' fut dêcliathé monument historique en 1948.
Lé Fort Moultrie, situé dans l'Île Sullivan à l'est d'Charleston, est fanmeux étout. Ch'tait là qu'Edgar Allan Poe fit eune partie d'san sèrvice militaithe, et l'fort est l'empliaichement du mystèthe dé s'n histouaithe, The Gold Bug. Ch'tait dans Folly Island, eune aut' des îles dans la baie, qué Du Bose et Dorothy Heyward êcrivîdrent la grand' partie d'lus histouaithe Porgy tch'est dev'nue la base dé l'opéra de Gershwin, Porgy and Bess.
L'Espangno Lucas Vasquez de Ayllon, tch'êtablit un run à Georgetown en 1526, avait fait pus d'un viage en Améthique. En 1520 il 'tait à Beaufort, dans La Caroline du Sud, et quatre ans pus tard il êprouvit à s'êtablyi dans la contrée mais n'y rêussit pon. Cap'taine Jean Ribault, Huguenot Français, navidgit la rivièthe, de Beauport, et mînt 150 Français à terre sus un run tch'i' nommit Port Royal. Il y bâtit un fort, et pis s'en r'fut en France pour ramasser un tas d'tchi tch'il avait besoin pour lé run, et du canon pour lé fort. I' fut hors si longtemps qu'la colonie pensit tch'i' n'allait pon r'vénîn ! Atout l'aîgue des Indgiens i' bâtîdrent un navithe pour lus en r'aller en France. I' lus trouvîdrent sans mangi à maîntchi c'mîn dans l'Atlantique et eûdrent la chance d'êt' trouvés et sauvés par un navithe Angliais. Eune fliotte dé navithes dé dgèrre Espangnos dêtruisîdrent lé fort abandonné en 1564, et êtablyîdrent un poste d'soudards sus l'empliachement. I' y réstîdrent 21 ans et en sortîdrent pour aîdgi à d'fendre St. Augustin, en Floride, contre eune attaque par Messire Francis Drake, et Port Royal fut abandonné. En 1711 l's Anglais avaient l'control du pays à l'entou et la ville dé Beaufort fut fondée.
J'avons navidgi l'long d'la côte dé Georgie pour eune volée, et j'nouos sommes arrêtés à Savannah, la deuxième pus grande ville et l'chef port dé l'Êtat et iun des ports les pus împortants sus la côte du sud d'l'Atlantique. Ch'est un dêha pour lé transport par navithe et par c'mîn d'fé à tèrre, des produits du pays avaîsinné - pétrole, bouais, chînment, fé, engrais, papi, thé, café, chucre, souffre, soda, machinnes d'agritchultuthe, etc.
S'i' fallait continnuer à mentionner les pliaiches d'întéthêt historiques qué nou visite et qu'nou vait en viage dé New York à La Floride, nou n'en finnithait janmais. La chose èrmèrquabl've pour mé est qué l's Angliais colonisîdrent chu grand pays 'chîn, si liain d'siez ieux et maugré l's êfforts des Espangnos et des Français à s'y êtablyi étout. I' faut penser que ch'tait viyant tch'il' 'taient si bouans naviguants et tch'il' avaient l'esprit d'aventuthe dans la couënne ! I' fallait du couothage pour enduther l'manque de c'mmodités, l'clyimat d'hiver, bêtes sauvages et pays êtrange, et produithe dé tchi à mangi dans des contrées otchupées jusqu'à chu temps-là par tchiques tribus d'Indgiens tchi vivaient dans des manièthes dé tentes, et des troupieaux d'bisons tch'étaient lus souche dé nouorrituthe !
George d'La Forge
Viyiz étout: