Hardi d'gens ont d'mande à ches dernyi, "Quand tchi que l'Caouain s'en va passer d'vant l'Tribunal?"

Nou dithait quâsi, à en jugi par l'intéthêt que ches bouannes gens là prennent dans man cas, qu'i' voudraient m'vaie envié dans les tranchies, mais j'ai grand peux qu'i' s'sont d'sappointés sus chu point là, car jen'm'en vais pas y aller, pas oquo si vite tréjous, ayant 'té exempté jusqu'au 31 de Décembre. Le résumé d'man cas n'a pas pathu dans les gâzettes, chein qui sembléthait assez drôle, mais l'explication est bain simplye.

J'étais le seul journaliste présent chu jour-là, alors j'étais, comme nou dit, maîte d'la position, et j'étais libre de faithe comme bouan m'sembliait quant man rapport, et pour des raisons personnelles, je décidi de garder l'public dans l'ignorance quant à la décision du Tribunal à m'n êgard. Et pis quand même, ma cause était un mio complitchie et otchupi au mains une démi-heuthe, et si je l'avais rapportée comme i'faut, à cause de s'n importance, notre rédacteur en aithait supprimé pus des treis quarts avec s'n extchuse habituelle, "vu l'abondance des matières," ch'est pourtchi je réalisi qu'i' vaudrait bain mus vos raconter chenna dans iun d'mes articlyes.

J'étais don, assis à la p'tite tablye des rapporteurs, à êcrithe la décision qui v'nait d'être donnée sus un pouore djâbhye qui v'nait justement d'y passer, quand le Greffyi criyi à haute vouaix: "Fêlix Alexandre Mâthurin Caouain!"

Je raîponni "Présent, Moussieu!"

"Eh bain, avanchiz, s'i' vos pliaît!"

A chu moment-là, un jeune homme d'affaithe qu'avait 'té toute la matinée assis à côté du Greffyi à li aidgi à êcrithe ses certificats, s'en vint à mé et m'dis à l'ouotheille, "Tu f'thas mus de m'laissi te r'présenter devant l'Tribunal, car j'ai grand peux que tu t'en vas en faithe une couochonnie."

Je l'envyi s'faithe quatorze, mé, en li d'mandant si ch'est qu'i' pensait que j'avais des djaix chelins à fliantchi à la tête à touos les siens qui voulaient m'servi d'Avocat!

I'hauchi l's êpaules comme pour dithe, "Comme tu voudras, j'aithais peu t'sauver, mais puisque tu n'veur sain, pôques-té!"

Je m'mâti don en d'vant du Président, et le Greffyi se mins à liéthe m'n application.

"Félix Alexandre Mathurin Caouain, 40 ans. Journaliste. Mathié. Siex êfants. A et D."

Demande une exemption absolue."

Raisons pour la d'mande:

"Je sis orphélin d'péthe et méthe, et Marie Hibou et nos siex p'tits Caouains dêpendent absolument sus mé pour lus nouorrituthe, alors si j'étais appelé au service, i' s'saient bein certains de créver la faim ou d'tchaît à la cherge d'la paraisse."

D'ailleurs, je sis le seul et unique Caouain en Jêrri qui s'otchupe du journalisme, et sans ma collaboration, "Les Chroniques de Jersey" es'saient obligies de frumer la boutique, chein qui s'sait, au point d'veue d'importance nationale, une grande et sérieuse calamité. Je désithe suggéther bain respectueusement au Tribunal que ma présence dans l'île est absolûment indispensablye."

Le Président: "Comment qu'ous avez passé?"

"Pardon Moussieu."

"Comment qu'les docteurs vos ont classé?"

"Oh quant à chenna, les docteurs n'ont pas comprins man cas du tout. I'nont tins autchun compte des mes veines varices, que j'm'en vais vos montrer."

Le Président: "Oh ch'n'est pas la peine, ,mercie!"

"Comme i' vos pliaitha Moussieu, mais ch'est d'bouan tchoeu, ou viyiz! Et pis, craith'ious bain que v'la du monde qui lus sont motchis d'ma rompeûthe!"

"Je n'avons pas bésoin d'ouï tout chenna! Comment qu'ous avez classé?"

Le r'présentant militaithe: "Class A."

Un membre du tribunal: "Craîssous des patates?"

"Nennin Moussieu, mais j'ai un accord pour aller faithe la saison."

"Siez tchi?"

"Siez Laïesse Ernon à c'menchi, et pis opprès chenna siez Maît'e Cliément D'Caen."

"Sont-i' ichin pour appier vot'e démande?"

"J'pense que oui, Moussieu," Mais quand je r'gardi pour ieux dans l'auditouaithe, à ma grande surprinse, ils avaient dispathu et n'étaient pus à lus pliaiche auprès d'la porte. Ches deux peûles-là étaient hors à l'auberge, justement quand j'avais besoin d'ieux. V'là che que ch'est que de s'fier sus d's ivrouognes!

"Je n'les vai pas pour le moment," je dis, "mais ils 'taient oquo là i' y a deux minutes."

Le Président: "Il est bin êvident qu'i' n'ont pas bésoin d'vos services, alors chute partie-là de votre démande tchèt de d'sous. Ah, ça, en ch'qui concerne votre travas pour la gâzette, est-che qu'ou criyiz que nou n'pouorrait as se passer d'vos sevices pour tchique temps?"

"Ah, dame nennin, Moussieu! Ch'en s'sait une belle affaithe si nos chinq ou siex mille lecteurs étaient privés des articlyes du Caouain. Ergardez don, vous l'tout prumi, est-che qu'ou voudrethiez nos faithe accraithe qu'ou n'liaisiz pas l'caouain?"

Le Président: "Ayiz la bonté, si vos plaît, de n'me poser pas d'tchestions comme chenna. Ou pouvez vos assiéthe!"

Les membres du tribunal se minrent à dêlibéther entre ieux et pour un temps j'étais quâsi gêné quant à lus verdict. Ch'qui me r'consolait oquo un mio, ch'tait que quatre de ieux, sans pâler du président, étaient de mes lecteurs les plus assidus, alors, dans lus propres intéthêt i'd'devaient pas mantchi de m'exempter. Opprès tchiques minutes le Président dit tchique chose au Greffyi qui s'mins à êcrithe man certificat. Le Président annoncit la décision et me passi man papi. Chu papi-là est acheteu bain soigneusement serré dans l'coffre-fort à Mess Bisson.

Et savous bain t'chest qu'il est mins d'sus?

Eh bain ch'est chennechin: